鼎提轉來厝，我就後悔矣。佇菜市仔，感覺伊大細適合，轉來一下量，34公分，和我本來用的差不多，根本無需要。我問做伙運動的兩位朋友有需要無？in親像拍著驚，講：「免，免，阮兜的鼎傷濟矣！」
後來，我佇食飯團群組貼鼎的相片，說明伊的寸尺和材質，問有人欲愛無？「相送，拜託有人會當接收。」
無聲無說。
新新的鼎，總是袂當擲掉。囥*咧鎮位，看著鑿目；只好怪家己買物件無小考慮一下。
兩個外月後，一遍逐家去世貿看畫展，阿華倚來我身軀邊仔，細細聲問我彼口鼎猶佇*咧無？猶佇咧！猶佇咧！猶藏佇眠床跤。上罕得煮食的人對伊有興趣，我足歡喜。毋過是按怎伊的口氣遮爾神祕？驚人笑伊竟然需要鼎？
兩人蹛*近近仔，伊講另日叫囝婿來提。
下回約食飯的時，我提去予伊，順路。伊講真歹勢，遐爾重，無應當予我提。阿華是跤尖手幼的人，出門著「秤」皮包的輕重，銀角仔加一兩个都袂使；我無遐爾幼秀。準做彼口鼎重嘛無要緊，驚萬一伊反悔，緊提去較放心。
頂個月，我的新冊《落西北雨的下晡》分享會，主持人聽講在座有我的朋友，邀請in起來講幾句仔話。
阿華講彼口鼎的故事；講我無嫌重，親身提去予伊。伊共in查仔囝講自收著彼口鼎以後，見著我，攏看著我的面寫一逝*字：「彼口鼎你有用無？」這暗，來參加分享會前，母仔囝趕緊共伊承滿滿的水、燃滾、水倒掉，完成「開鼎」動作；然後共伊囥佇電動掠龍椅頂頭。「我共囡仔講，暫時逐家攏袂使去用彼張椅仔！」
聽眾笑甲東倒西歪，氣氛足樂暢。
我真意外，無疑悟*彼口鼎予伊遮爾大的壓力，而且，煮一鼎水就是「開鼎」典禮？我轉達的鼎的保養方法毋是按呢啊。賣鼎的交代我愛先用油共鼎齊匀抹一遍、gá-suh（瓦斯）火頂頭烘一下，隔一工才開始用。我共這个儀式教伊的時，伊的反應足笑詼，伊講：「我用苦茶油，苦茶油真貴呢！」食貴參參的料理攏袂喝疼，一屑屑仔油竟然毋甘？
伊會予鼎坐佇掠龍椅，阮會當理解。講著投資（包括失算的經驗）、性平觀念，伊理路清楚；毋過，厝內的工課是伊的弱點。伊講in大官看著伊疊佇烘碗機內底的碗盤，怨嘆某hân-bān做厝內工課，「哪知影新婦疊碗盤也若sa̋-kà-suh（日語馬戲團）。」
伊共李鹹（蜜餞）當做烏棗煮雞湯。尾後閣去𥴊仔店理論，賣的人喝冤枉，講伊家己指李鹹講欲買這，「我毋知你其實是欲買烏棗啊。」
一遍阮咧講目睭的「飛蠓症」，伊講：「拄才有一隻蠓仔對我面頭前飛過，這敢就是飛蠓症？」
伊驚貓仔，有一陣轉去厝，入門前先共家己「勼*」甲細細，才閃身入去。對門厝邊飼貓？聽過狗顧門，毋捌聽過有人飼貓顧門。伊講厝邊無飼貓，是大門邊掛一幅貓的油畫，是女主人老爸的作品。畫了真好，若活的；電梯門拍開，貓仔兩蕊目睭就掠伊金金看！
後來姑不而將，in翁去拜託人共彼幅圖徙走。「伊若毋去講，我就欲搬厝！」
上好笑的是，一年伊去法國南部出張，計程車停佇青紅燈前的時，車門忽然間予人拍開，共伊跤腿頂頭的皮包搶去！後來去警察局做筆錄，人問伊予人搶去的皮包內底有啥物件？伊第一个報的竟然是「化妝包」。法國警察頭攑起來，講：「你佮阮某仝款。」
阮笑伊有夠譀古，伊竟然認真講化妝包當然要緊。「第二日早起，我共隔壁房的韓國小姐借化妝品。」啊皮包內底猶有啥？伊講有護照、現金、信用卡，有彼日產品發表會伊上台欲講的簡報資料和投影片。遮的敢毋是上重要？好咧伊講靠家己的記持，共公司產品的企畫、特色等等寫佇A4紙頂頭，請逐家倚來會議桌邊仔看，聽伊詳細補充說明。
結果彼場發表會，伊的表現袂輸其他國家的同業；後來的發展，也證明伊的簡報成功。
為著申請證件，伊揣*過台灣的辦事處，甚至中國大使館，一路驚險委屈，……後來靠佇尼斯機場外事處提著的臨時通行證，才安全轉來台灣。「尼斯機場的外事警察交代我到巴黎盤機的時陣，千萬毋通跳機。我共in講，我才無稀罕恁國家！是恁國家的人搶我的物件啊！」
伊是見過世面的人，口才也足好，聽伊講古，阮攏若佇現場。
就是因為伊有本事，提伊的弱點來講耍笑才較心適。
毋知這陣彼口好命的鼎是毋是猶坐佇電動掠龍椅頂頭？主人會一半擺開機予伊「鬆一下」無？
閣有，萬一彼口鼎無好用，我會當牽拖講伊開鼎的儀式無照起工。
囥（khǹg）：放
佇（tī）：在
蹛（tuà）：住
逝（tsuā）：行
無疑悟（bô-gî-ngōo）：想不到
勼（kiu）：縮
揣（tshuē）：找
《自由時報副刋》2024/4/1
文章定位：
