2020-11-18 08:37:27| 人氣808| 回應1 | 上一篇 | 下一篇

《台語日常》結局

推薦 1 收藏 0 轉貼0 訂閱站台

    

一齣連續劇我看到三分之二,劇情有「山雨欲來」的氣氛;當咧掛心的時,朋友講伊看完全劇矣,「結局予我看甲『淚流滿面』!」

敢最後男女主角不得已分開?彼毋是我希望看著的結局。我安慰家己,也有可能是故事予伊感動甲哭啊。

想過來,想過去,心內的小劇場搬無仝款的劇情。其實,佇網路看劇,若欲知影結尾啥款,真簡單,點最後彼集出來看就好。毋過,我無按呢做,看冊,看戲,享受的是過程,早早知影結果,心情就無辦法綴tuè,跟)咧起起落落矣。

Kan-na(只)無啥入迷的劇,毋知是毋是欲繼續看落去,我才會先去看最後彼集。按呢做,等於共好奇心謀殺,斷後路,就有可能安心棄劇;而且,也感覺有(從)頭看到尾矣。

R的心情閣較特別,伊講半暝好奇,想欲先看故事最後的結局;毋過,猶是無去看:「感覺按呢做,是毋知廉恥。」

遐爾嚴重?因為偷食步,對同齊看的翁無公平?抑是想著人拍一齣劇用遐濟工夫和精神,無照起工慢慢仔欣賞,是對編劇、導演和演員無尊重?伊講毋是,是心內感覺「偷偷仔做」,就是無道德。啊?

差不多三十年前讀過一篇小說,AB兩人蹛(tuà住)仝宿舍兩人攏愛讀偵探小說。B逐遍先讀完,起頭是擋袂牢,就共A講故事的結局;後來刁意故一方面展家己看冊的速度,一方面看A氣怫怫,真娛樂。

後來,A想出幾若个方法欲予B這个人消失。是用啥方法、結果有成功無?我袂記得矣,予你家己編故事。

《自由時報》副刋2020.11.18

 

台長: Liu 靜娟
人氣(808) | 回應(1)| 推薦 (1)| 收藏 (0)| 轉寄
全站分類: 圖文創作(詩詞、散文、小說、懷舊、插畫) | 個人分類: 台語文作品 |
此分類下一篇:《台語日常》模仔好
此分類上一篇:《台語時間》予你等遐久

collee
2020-11-18 19:43:09
是 (若未登入"個人新聞台帳號"則看不到回覆唷!)
* 請輸入識別碼:
請輸入圖片中算式的結果(可能為0) 
(有*為必填)
TOP
詳全文