好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

 彼間餐廳有真濟冊，經營者是一位「博覽群書」、創作、演講攏有名的作家。看著長長冊架的冊，我隨倚去看。服務生講地下室的冊是非賣品；一樓的冊，隨在人讀，也俗俗賣。我臆，應當是老闆讀過無欲保留的。

會當講這是一个開放的私人圖書室，是老闆個人的冊庫，也加減有鼓勵讀冊的功能；有人買，就等於疏開一寡冊。開這款餐廳，一兼二顧，真讚。

  可能罕得有人佇現場提來讀，冊攏若新的，我買兩本，用餐巾紙包起來，才囥（khǹg，放）入去冊包內。疫情時期，想講轉去厝才用酒精噴噴咧。

紙巾是食飯的時鋪佇大腿、必要的時拭喙的。大張，所以，早起順手用伊來練大字。想袂到效果比寫佇宣紙面頂較好；柔軟，寫起來手感好，筆勢較穩，字也較大範（大器）。

一定是因為無壓力，無計較寫了好抑bái；閣廢物利用、毋驚紙拍損，才放心烏白「畫符仔」的關係。

紙薄薄兩層，寫好，共面頂彼面掀起來，𪐞（tòo，暈染）佇下面的字若拓印。

閣有真美妙的聯想：電影內，一見鍾情的男子討著女子的電話號，會共寫佇紙巾頂頭。毋過，有時紙無小心沐著茶，字糊去。臆過來試過去，數字攏毋著；經過千辛萬苦，最後，兩个有緣的人才見著面。「歌仔戲攏按呢搬」，才予看戲的人綴（tuè，跟）咧著急。

這是老派的人才會想著的古典劇情；現代人，手機仔提起來，共對方的電話號拍入去就好；真方便，也真無趣味。

閣較有文化的聯想是：貝多芬的時代，作曲家食飯的時，忽然間頭殼內出現一段無隨寫起來驚會走無去的靈感，趕緊共寫佇紙巾頂頭，後來變做傳世的音樂作品。

烏白想，煞（suah，竟然）予彼張紙有特別的趣味。

可能上有意義的是，彼兩本冊攏兩三百頁，會當予我讀規禮拜。

2022.六月號《文訊》雜誌