好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

 圖◎徐世賢

整理冊櫥的時、佇一本民國92年出版的散文選集內底讀著我一篇文章《自家的山水》，其中兩段翻做台語文是按呢：

禮拜日，逐家去一个同窗in兜（tau，家）𨑨迌（thit-thô，玩耍）。

In兜是一棟連裝潢在內價值兩千萬新台票的花園別莊，闊閣新式；浴間有一个阮看袂出是啥作用的「柴櫥」。主人講彼是「三溫暖」用的。有人講：「哇！連這種設備都有，這款厝才叫做厝。」也有人厚操煩，講：「遮爾大間，欲按怎摒掃！予我蹛（tuà，住）都會驚。暗時鎖門，樓頂樓跤，凡勢會有門鎖無著。」

女主人雖然穿插有貴夫人的範，猶親像高中的時，保存南部人的實在；阮問啥，伊答啥，無一點仔驕傲，也無假仙講客氣話。伊講in翁每個月予伊十萬箍家用；菜錢之外，煮飯工人一萬，摒掃工人八千。花園工人和司機的錢，歸in翁開支。問伊這款富足生活的滋味啥款？「無啥，和恁仝款啊。」伊笑笑仔講。這句話有意思，伊的生活和阮的仝款，也是「今仔日和昨昏sio-siāng（相像）」，莫怪感覺 「無啥」，慣勢矣。

我猶會記得伊的毛筆字寫甲足媠，是會當裱起來掛的。問伊猶有咧寫無？伊應：「哎呀，哪有可能！」 

這篇文章是1985年的作品，這種有專人負責煮飯、摒掃、開車和照顧花園的生活，免講三、四十年前，這陣應當也無濟；我熟似的人也kan-na（只）這位同窗有這款命。我會記得讀高中的時，伊毋但毛筆字媠，用炭筆畫的伊麗莎白泰勒、奥黛麗赫本，也袂輸相片，連兔仔毛的頷領都一絲一絲足分明；彼陣，阮根本毋捌用過炭筆。想起來，伊彼當時應當有去學書法和畫圖，可能有想欲考藝術學院。

彼間佇淡水的花園別莊，阮頭尾去過兩遍，後來敢若有聽講in搬來台北；但是同窗的聚會攏無看過伊。讀著這篇舊文，煞（suah，竟然）真思念伊，毋知伊這陣啥款？有健康無？我退休後，有學寫毛筆字，也練習用炭筆畫圖；伊本底就有基礎，後來有閣寫、閣畫無？

我共我這兩段文章貼佇同學群組，問逐家有伊的消息無？

結果彼工我的鋪文後面，有三个回應： 1.一張樹葉仔的圖，面頂寫：早安/一葉寧靜/ 靜心自在/ 期待疫情早早過去；2.青菜的正確切法；3.蕹菜按怎炒才會青翠。

想講第二工，凡勢有人探聽了後，會共我答覆；可惜，佇面頂分享的，一个是：無論老抑是少年，毋通雄雄徛起來，才袂跋倒。另外一个短片親像咧共伊呼應：一隻雞公頷頸伸長長咧啼，啼聲響亮閣牽足久，若空襲警報，然後，忽然間，伊倒摔向（往後摔倒）！我笑出來。毋過，這嘛和我的問題無關係。

唉，人老矣，真濟代誌毋是袂記得，就是無關心（看破？）。彼款毋是反應的反應煞有一點仔「禪」意；我共解說做：免想遐濟，好好仔切菜、煮菜；毋通跋倒，平安自在上要緊。

《自由時報副刋》2022/8/30