量米柴箱仔.
幾個月前，台灣一條大新聞，講東歐犯罪集團用惡意程式侵入一銀ATM電腦系統，六十點鐘內uì（從）全台灣二十外間分行、四十一台機器盜領出八千三百九十萬箍！
這條新聞予我先驚一大趒（tiô）的是，現金機內底竟然囥（khǹg，放）遐爾濟銀票，平均一台予人領出兩百萬！像我這款過小日子的人，每遍kan-na（只）領幾千箍，上濟大概一兩萬；根本袂去想著彼內底遮爾驚人的機關！
另外，予人見識著電腦的神通。盗領案的駭客佇別的所在監控，「車手」照指示的時間去指定的現金機邊仔等，免出手，免驚留落手印；恬恬仔承（sîn，承接）一直吐出來、一直吐出來、一直吐出來的銀票就好！
毋知in（他們）是用啥承？帆布袋、旅行袋抑是塑膠袋仔？
彼个場面煞（suah，竟然）予我想著少年時佇米絞（碾米廠）看米uì大柴箱仔流出來的情形。
彼時陣，阮兜（tau，家）佇田庄猶有幾分地，予老爸的大兄阮阿伯種作；每遍收成時分著一寡粟仔（稻），攏寄佇街仔的米絞，厝內無米的時媽媽才差阮去「叫米」。意思是請in送來，彼陣，無幾个人的厝內有牽電話。
店一進閣一進，誠深，行入去內面，才會看著米絞（碾米機）；米絞真大台，拄（tú，頂）到天蓬（天花板）。絞米的聲音轟轟叫，米糠屑仔規厝間飛。
聽講粟仔倒入去，絞出來的是糙米，分出去的是粗糠；糙米倒入去，絞出來的是白米，分出去的是米糠。粗糠佇大灶內底燃（hiânn，燒），嗶嗶擗擗，好燃閣好聽；米糠攪飯予雞食，省米，閣聽講對雞的消化系統有大路用。這兩項阮兜攏有需要。彼陣阮兜有飼雞，米糠相送抑是著付錢，袂記得。
佇店口攏看會著的是一跤下面有一个小門的大柴箱仔，彼囥佇一台大磅仔面頂，米倒入去柴箱仔到需要的重量，捒（sak，推）開小門，米就會流落來。份量少的米用斗抑是升量就好；貯入去柴箱仔內的米，可能一兩百斤，敢若是欲裝袋，所以米會像ATM吐銀票按呢一直流落來。
|
阮的厝佇博愛巷（以前無路名，直接叫做員林鎮博愛巷），因為拓寬道路，本底應當有七八十坪的厝和前後庭，拆甲賰（tshun，剩）三、四坪；二十外年來，阮阿兄共伊租予人開店。有這塊小小的所在佇咧，每遍轉去員林，阮猶是會越（繞路）去遐，徛（khiā，站）遠遠看彼間店仔；看出入的人濟，就替厝跤（房客）歡喜。只是，攏會懷疑這屑仔所在是原來的灶跤抑是洗身軀間？
前年，我和小弟轉去的時，順紲去舊厝附近彼條街仔做一个「回顧」；發現真濟傳統的舊店，像拍鐵仔店、油行、拍棉被店、塗豆糖店攏猶佇咧。
|
|
阮交關彼間米絞也佇咧，伊已經有七八十年的歷史，tsit-má的頭家七十外歲，猶會記得阮阿兄。伊講時代無仝款，早就無家己絞米、攏共工場批米來賣矣。伊比店內疊懸懸（高高）的米包，講少年時攏扛規百斤的米，這陣kan-na有法度扛三四十斤；徛佇伊邊仔的囡仔，是in囝，「伊扛規百斤就無問題。」
這个少年的看起來誠斯文，我的小弟講伊親像以前坐佇數櫃前咧擉（tia̍k）算盤彼个阿姆，「伊是毋是恁媽媽？」「毋是，伊是我的阿媽。」阮笑起來，時間過了真緊，阮家己都老矣。
|
米絞頭家講阮兜以前是用粟仔換米，粟仔uì田庄直接送去遐，100斤粟仔換六斗米；阮隨時會當來「糴」。「恁有一本簿仔，每遍糴偌濟米，就記佇面頂。」著啊，我和小弟想著彼當時囥佇菜櫥仔邊彼个銅的米桶，懸懸的長四角形，蓋面頂有手扞仔（tshiú-huānn-á，把手）。銅會生青青的鉎（sian，鏽），每擺出大力鑢（lù，刷）過，銅面就變做紅金色。
看米絞的頭家抑是辛勞（夥計）用斗和升量米，印象嘛是猶真深。斗圓柱仔形，彼也是做囝孫的佇爸母過身的時捧的「斗」；升/合是大細無仝款寸尺的四角形柴盒仔。量米的時攏會用敢若尺的物件佇斗/升面頂抹一下，按呢著無相偏（phinn，占便宜）；袂量傷（siunn，過於）濟抑是傷少。
|
毋知啥物原因，阮兜有「五合」和「二合五勺」兩个柴盒仔，面頂有刻「榖類用」三字。年仔節做粿的時，有的厝邊會來借去量秫米（tsu̍t-bí，糯米）；阮欲挨（e，磨）粿就去用隔壁阿幸姆兜的石磨仔。我氣力無夠，無法度挨，負責khat（舀）米；毋過跤手慢，不時會袂赴（來不及）共米倒入去。彼陣是物資無真充足、厝邊相借物件的年代；嘛是大門規日開開的時代，一聲就會當行到人兜的灶跤。
|
|
後來敢若阮兜彼幾分地賣予阿伯，無粟仔寄佇米絞，不管平時食的蓬來米抑是年仔節做粿的秫米，欲糴就著用錢買矣。……
彼日，我和小弟兩人共隨人會記得的代誌講出來「鬥」，親像咧拼圖。毋過，記持（性）有限，時間閣過遐爾久，真濟代誌攏若媽媽以前愛講的「茫茫渺渺」矣。
予我感覺親切的是，米店彼跤年紀真大的柴箱仔猶佇咧；色水紅金紅金，親像古董矣。
2016.12 月號《文訊》雜誌
|
|
文章定位：
