好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

彼个青紅燈的時間真長，等甲無聊，我才會去讀tshai7（豎）佇邊仔的交通標誌。伊面頂畫一个大大、內底有一條斜線的紅箍仔和「停」字的禁停符號，另外，閣寫：

騎樓。人行道sidewalk

違者拖吊tow-away zone

         彼幾个英文字，tow我無熟似（和我有熟似的英文字本來就無濟），我心內想，拖就是tow？敢遐爾拄好（巧），英語和華語的音仝款？和台語嘛差不多。

三不五時會看著翻譯錯誤的標語抑是道路標示予人掠包（揭穿）的新聞；有的照音譯，有的無管文法、一字一字綴（tue3，跟）咧翻，翻甲真譀古（ham3-koo2，荒誕），真好笑，tow無定著也是離譜的翻譯？

世界文化的交流，無仝的語言互相借用嘛是誠自然，尤其是名詞。逐家上知影的就是英文的tea，伊的來源是閩南語的茶；其他像功夫、風水、豆腐，英語也是照華/台語抑是廣東話念。

幾若年前有一个同事講英文的king 和queen是ui3（從）台語的「乾」和「坤」來的。雖然明知影這是烏白臆，毋過，兩種語言的音和意思確實足合。彼當時我猶笑咧講，「啊take it也可能是 ui3台語的提去（theh8- khi3）來的囉。」

一个同事紲落去講笑，「啊fossil是借咱講的化石，country是台語的牽出哩。」

Tow無可能是借咱的話，若是翻了毋對，一定是因為照讀音烏白翻。

轉去厝，我隨去查字典。tow，伊第一个解說是：拖。

人根本無烏白翻，是我家已毋捌（不識）字啊。

2017.4.9《中華日報》副刋