好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

  自開始煮菜就聽講煠（sah8，白水煮）卵，一定愛用冷水，卵才袂破去。上好閣擲一屑仔鹽花仔落去。幾十年來，我攏毋敢違背這个規矩；煠的時陣，一半擺閣用箸去夾看覓，夾會起來就表示卵熟矣。

               彼一工，為著欲做溏心卵（有人叫做糖心卵），就是卵清熟矣卵仁猶軟軟膏膏彼款卵，我上網路去揣（tshue7，找）伊的做法。面頂講水滾起來，才共卵囥（放）落去滾五分鐘；然後禁火、浸冷水、擘（peh，剝）殼，佇豆（醬）油內浸一日。（豆油內會當摻你佮意的配料）。

    水滾了後，才共卵囥落去？我用落（漏）杓仔勻勻仔（謹慎小心地）共卵兩粒兩粒囥落去，想講破去變做卵花湯，嘛無要緊，總是愛試一下。想袂到佇滾水內底足足煠五分鐘，十粒卵的殼根本無煏（piak，裂）開，糖心卵也做成功矣。

      隔一日，佇電視頂聽某一个飯店的大師講苦瓜，除了炒鹹鴨卵，其他無論煮湯、紅燒，苦瓜的子攏免挖掉，切切落去煮就好。按呢啊？除了用冰糖豆油紅燒，自早，我毋但共苦瓜的子挖掉，閣共內底彼層瓤（nng5）剾清氣；因為人攏講按呢才較袂苦啊。

    既然大師按呢講，彼日我煮苦瓜湯，真正無挖無剾，規粒切切就落鼎煮；心內想苦就苦，苦瓜本來就應當苦。結果並無較苦，因為無拍損（浪費），閣省工，顛倒感覺滋味較甘呢。

短短兩日內，竟然有兩个久長以來遵守的「真理」予人拍破，新煮法的效果閣真好；可見煮食也著愛會曉變竅（隨機應變）、「與時俱進」啊。 2017.2.7《中華日報》副刋