時間過得真快，而家已經係十號喇，距離上一次寫日記，即係九月廿七日果篇《離別》，已經有十幾日喇，自從哩一篇日記之後，都好似無乜心機再寫日記，我再次寫日記既哩一刻，我睇緊一班曾參與登陸諾曼第的美國101空降師E連老兵，講述以前既作戰經歷，我地絕對要向E連所有官兵致以最高敬意。
今晚又係星期六晚，家姐例牌唔晌屋企過夜，又係得我一個人晌度發呆，提到我家姐，我同佢感情都算係幾好，甚至可以話係姊弟情深。我自幼就已經好鐘意同我家姐一齊，一齊既時候總係會高興，晌我廿二年人生裡面，我諗唔起幾陣時同佢一齊係會唔開心。我由滿月開始，就已經同阿麻阿爺、三個姑姐和家姐一齊住，我直至大約七歲先至同返父母一齊住，但都只係同父母一齊生活左兩年。
回憶起當時，七歲既我正要面對與家姐分開生活，起初並唔感覺到有咩問題，直到佢比左一堆野我，我都唔係好記得係咩喇，只係好似一ｄ比我解悶既野，就由果一刻開始，我覺得有ｄ生離死別既感覺，雖然我無表露出泥，但心裡卻隱隱作痛。一年苦悶寂寥又痛苦既日子過去，佢終於升中一喇，亦同返父母一齊住，即係我地又再次一齊生活。佢讀中一哩年，亦即係我同父母一齊生活既第二年，亦係最後一年，雖然父母經常給予我皮肉之苦，但卻可以算係我童年之中，最開心的一段時間。
當時，我家姐經常有ｄ新奇刺激既玩意比我，個個星期都有新鮮野玩，佢時不時放學又會買野食返屋企，最記得有一次阿媽早返，佢就晌阿媽未開門之前，將ｄ冰條等零食掉晒出街，而家諗返起都好好笑，講起哩件事，卻又令我想起八歲生日，我老母果日又係無啦啦早返，但唔係同我興祝喎，佢直頭就唔記得，仲一入門口就鬧鬼我，直到而家我都好記得，亦係我到而家仍咁憎佢既其中一個主要原因。
小學二年級之後，我就跟左一個姑姐姑丈住，直至二零零二年。晌哩十年多時間之中，與家姐都係聚少離多，即使後來佢搬返去同阿麻一齊住，依然無咩機會見面，其實聚少離多又的確無可避免既，因為果陣我咁細個，點同而家呢，而家鐘意唔返屋企訓就唔返，帶邊個上屋企都得，基本上係無皇管，搞咩都得，只要唔比幾個「老闆」知就乜事都無。
早兩年開始同家姐一齊住，初時都有ｄ唔習慣，話晒都分開左十幾年，但我又估唔到好快就適應。記得同佢一齊住之後，佢第一份送比我既禮物，就係出左部電話比我，雖然唔係ｄ咩好IN既款，但有得用好過無得用丫，而我又只要求打得出打得入，同埋有個免提聽筒比我扮G4，就已經可以喇，哈哈哈……直至現在，我都唔記得佢買過幾多樣野比我，因為實在太多，有平有貴，但晌我心目中，平貴並唔係最重要，重要的是在於那份意義，所以當我每一次整爛佢送比我既野果陣，我都會好唔開心。
直至目前為止，我記憶之中，我整爛過一件佢送比我既野，包括一隻手錶、蜜蠟手鏈和一隻金髮晶戒指，其中以金髮晶戒指令我最感遺憾，因為哩份係我升到中六，佢送比我既禮物，金髮晶本身已經唔平，而原石戒指更加絕無緊有，所以我仍保有戒指遺骸，希望有一日我能夠搵返一隻相類似既戒指。
剛才提起部電話，我而家時不時仍會使用，早前更借過比深培姐姐用，現在每當有來電，就會響起《哈姆太郎》哩首歌，都好令我懷勉一下過去，所以我係一定唔會整爛哩份禮物。
早前有一晚，我家姐由於打銀行工，又有唔知乜鬼金融專業資格，就反而令佢晌銀行開ｄ乜鬼投資戶口有困難，所以就叫我去開，當時我梗係反問佢，點解佢唔叫佢自己條仔開呢，但佢答：「你姓咩呀？我姓咩呀？佢係咪姓李呀？隨時可以同佢分開都得架喎。」佢講完哩句我就明喇，我晌佢心目中，比佢條仔總要得多，正如我話過，若果無仔女的話，保單受益人會寫我家姐。
到左最近，我晌度煩緊幫我表弟搵補習老師哩件事，當我家姐得悉深培姐姐唔再補落去果陣，就即刻同我講，話加深培姐姐人工，差額由佢補貼，不過總係事與願違，始終係談判破裂……查實晌可接受補貼限額範圍內，就由我話事唧，不過我家姐卻話明哩個補貼優惠，暫只可用晌深培姐姐度，佢好少咁大細超，難道佢發現到ｄ野？
自從同家姐一齊住之後，我服飾自由度大增，我可以著我鐘意既衫，即係我幾時著西都得，除左同佢一齊出街既時間。記得以前同姑姐住果陣，總係唔比我著得整齊ｄ，我都唔明點解。我覺得著得整齊ｄ完全無問題丫，特別係去買野果陣，對眼生晌頭殼頂既售貨員及侍應，都會態度好ｄ啦，先敬來衣後敬人嘛，同埋咁著至可以含蓄地突顯我操得咁FIT既身型嘛，要胸肌有胸肌，要手擘有手擘，就連背肌都操到下出泥，哈哈！yeah^.^V，雖然有點「空心大老棺」，但眾多意見都一致認為哩個係最適合我既外形。
現時我研習玄學，終於可以算係解開，點解我一鐘意同家姐一齊喇，原因其實好簡單，因為我地兩條命，都可以互保不足。我得悉哩個答案之後，都非常高興。自此之後，有異性無人性哩個做事準則，就唔再適用於佢，佢同我心目中既女神，有著同等地位和重要性。
文章定位：
