新聞| | PChome| 登入
2026-04-22 10:51:04| 人氣12| 回應0 | 上一篇 | 下一篇
推薦 0 收藏 0 轉貼0 訂閱站台

趕貨、拚暝工

趕貨、拚暝工 Lîm Tong-îng

會記得2024年《羅生門 La-sioh-bòng》台語版，準備出版的時，責任編輯定定佇半暝仔發文，連去外國出差嘛咧審稿。本成我一直認為製造業是較歹命，才著趕貨、拚暝工！原來出版業嘛是仝款，真正是鼓井水雞。
我踏入社會就進入製造業，參與精密製品的製造。一个製品是由幾若百項零件組成的。零件有廠內做的，有協力廠做的，嘛有日本來的。按呢，任何一點，一个工程若有失覺察做無好，就會影響整體的交期。猶毋過，交期是早就定佇遐。「照品照行」就是「製造業的基本」。而且後段，後後段攏準備好咧等你。
失覺察影響交期的工程，就需要假日無歇睏抑是拚暝工來共補轉來。這个現象佇愈競爭的行業愈嚴重，逐間公司攏嘛欲早一工共製品送到市場。
長年佇製造現場，後來做生理嘛是工業產品。不時就會拄著趕貨拚暝工，到底有拄過幾擺，實在是濟甲袂曉算。猶毋過，人生第一擺的趕貨拚暝工就記甲牢牢牢。
有一擺，佮技術者去日本安裝機器。工場是佇郊外，對旅館到工場，家己是僫坐車。就由蹛旅館附近的工場長順紲載阮。就按呢一禮拜五工、逐工的來回車內，就佮工場長開講，講台灣、講日本、講天講地、講鱟桸講飯篱。會記得當當講著較早趕貨拚暝工的代誌，兩个人的目睭攏金起來，熱phún-phún、精神攏來矣。就親像台灣的查埔人，做伙攏會講著做兵的代誌，閣攏講袂煞是完全仝款。
趕貨拚暝工毋是輕鬆的代誌，上好是莫！猶毋過，只要是人做的工課，一定無彼款「絕對無問題」的代誌，往往攏會失覺察。愈大陣人參與，失覺察就會愈濟。
這个世間無論啥物行業，趕貨拚暝工應該是萬年袂斷的症頭。這改拚了，無偌久就會閣來，誠害！
趕貨拚暝工，敢是所有從事者的勳章？！
（260212Tong-îng）

我要檢舉
台長： Tong-îng Lîm
人氣(12) | 回應(0)| 推薦 (0)| 收藏 (0)| 轉寄
全站分類: 圖文創作(詩詞、散文、小說、懷舊、插畫)

我要回應
否 是 (若未登入"個人新聞台帳號"則看不到回覆唷!)
* 請輸入識別碼：
請輸入圖片中算式的結果(可能為0) 
(有*為必填)
TOP
詳全文