松阪牛佮Sukiyaki Lîm Tong-îng
松阪牛（まつさかうし）是日本國寶級的和牛（日本牛肉），公認是世界上頂級、上貴的牛肉。就是三重縣松阪市佮附近生產的黒毛和牛。松阪牛佮神戶牛、近江牛予人號做「日本的三大和牛」。
30年前做生理的時，有一位人客就是佇松阪。彼時就捌聽過松阪牛，講是飼牛的時，予牛啉bí-luh，共按摩，予伊聽音樂。心肝想講，這聲好矣，生理若做成會捷去松阪，就會當食松阪牛。千算萬算，毋值天一劃。無疑誤這攤生理是做甲步罡踏斗(pōo-kong ta̍h-táu)，拂甲捌家己捾樣品（hand-carry）到松阪，閣是暗時十一點到，隔轉工六點離開趕飛行機轉來。到尾仔生理做無成，連松阪街仔都一步就無踏到，就莫講松阪牛矣。
三十外年後，頂頂禮拜的「三人の旅」，我才踏入松阪的街仔，感慨誠深。
同行的日本朋友欲買松阪牛肉，就到「松阪肉元祖」「BEST BEEF」的「和田金」，是140幾年的老店。是對賣牛肉，閣來開sukiyaki（壽喜燒）店，才閣開農場飼牛，就是予牛啉bì-lù，共按摩，予伊聽音樂的彼間店。
來到松阪，無食松阪牛嘛講袂得過。就到有名的「牛銀本店」食Sukiyaki。「牛銀本店」是一間有120年歷史的賣牛肉老店，猶是維持傳統的坐佇tha-thá-mih頂食。
Sukiyaki嘛是日本創造的一種獨有的，由專人替人客料理牛肉的食法，也是展現日本的「おもてなし」（款待）的精神。20幾歲的時佇日本予人請過食Sukiyaki，感嘆哪會有遮爾好食的牛肉。以後就毋捌食過遐爾好食的Sukiyaki。會記得台灣的「吉野家」捌賣過Sukiyaki，家己照伊講的煮，食了後干焦是「鹹篤篤」的感覺，毋知咧食啥！
到牛銀食Sukiyaki是關西口味。嘛才知影Sukiyaki有關東佮關西兩種口味。關東口味是共肉佮蔬菜做伙用醬料煮。關西口味是用醬油佮糖共肉煎熟，搵生蛋汁食。然後才用煮過的肉汁來煮蔬菜。(無食生蛋的人，莫搵啥食嘛誠好食。)
第一擺佮佇牛銀食了後，才知影Sukiyaki遐爾好食主要是肉質佮煮的工夫。好肉的價數就懸。阮是食中晝，上俗的著日本票一萬捅箍。看伊的菜單猶有一客日本票二萬五的，至少著兩个人做伙食。
講著Sukiyaki就想著Sukiyaki song這條歌。
Sukiyaki song（上を向いて歩こう，坂本 九唱。攑頭向前行）佇我做學生的1960年代就紅到美國、歐洲去矣。
（260430Tong-îng）
FB連結：https://www.facebook.com/share/p/18TthhtKDn/
文章定位：
