阿龜的故事
土佐國名越（2）的好額人權右衞門，伊的查某囝阿龜對翁婿八右衞門是非常的佮意。阿龜是二十二歲，翁婿八右衞門二十五歲。就是因為足佮意伊翁婿，世間人就認為伊應該是一个誠gâu怨妒的查某人。不而過，查埔人並無做過予伊怨妒的代誌。從到今兩个人是猶毋捌講過予人會慼的言語。
誠不幸，阿龜是破病身命。結婚了後未到二年，就著著當時土佐的流行病，所有的好醫生攏揣無方法共醫。得著這種病的人是食袂落、啉袂落，人是干焦疲勞、眩眩（hîn-hîn），會做怪夢爾爾。雖然受著無暝無日的看護，阿龜的身體就是一工一工那來那荏，到尾仔是連家己就知影無救矣。
伊就共翁婿叫來，共講：
「我得著這款病，受著你遐爾仔體貼的照顧，我是無法度用言語來表達。親像你按呢對我遮爾好的人是無地揣矣。我，想著我著佮你離開，心肝是誠艱苦。-----你想看覓，我就猶未二十五，——而且親像我的翁婿遮爾好的人，這个世間是無第二个矣，——總是我是無死袂使得。-----毋是，袂使得，袂使得，閣較按怎共我安慰嘛是無效啦。啥物款的醫生就攏講無救矣neh。本成是想講，看會當閣活二、三個月袂，毋過下早起照鏡一看，就知影今仔日著愛死，——著，拄拄好今仔日。我對你有一个心願neh——你若想欲予我會當安心死去——這个心願請你一定就予我達成。」
「你就講看覓，是啥物？」八右衞門應講，「我做會到的代誌，啥物代誌我攏會真歡喜替你做。」
「這是——是你一點點仔就袂歡喜的代誌」阿龜就答講，「你猶遐爾少年，這款代誌來拜託你，是相當——非常——困難的代誌lioh！毋過，彼个心願佇我的心肝底是親像火咧著。死進前就予我講出來。請，-----neh——你，我若死，遐的人應該是早慢就會叫你閣娶某，neh，ē，請你佮我約束，就是莫閣結婚，——你無愛honnh-----」
「啥貨，彼款代誌喔！」八右衞門喝出來。「你的心願是干焦按呢，是無？彼是無啥物。好，佮你約束。絕對袂閣揣一个人來代替你。」
「啊，足歡喜咧！」阿龜是對眠床騰起來有半个身軀，那喝出來。
紲落來，就閣向後壁䖙落去，同時阿龜就斷氣矣。
阿龜死了後，八右衞門的身體是沓沓仔變䆀。起初逐家對伊的樣相（iūnn-siùnn）的變化，攏解說是因為傷過傷心所致的。村裡的人是干焦喊講：「伊到底是有偌愛彼个牽手咧？」。不而過，一月日一月日過去，面色是愈來愈白、人是愈來愈荏，無偌久就瘦甲無成（sîng）人款，成一个幽靈矣。逐家才開始懷疑，猶遐爾少年的人，遮爾緊就變甲遐爾荏，毋是干焦傷心所致的會當解說。醫生攏是講八右衞門的病，毋是普通的病，對人的樣相是誠僫理解，應該是心肝底有koh樣的煩惱才來發生的病。爸母是問了閣問就是問袂出來。——伊是講，伊的代誌爸母攏知影，無啥物悲嘆的原因。爸母就勸伊再婚。不而過本人是再三堅持，因為佮亡者的約束是絕對袂當拍破的。
紲落來，八右衞門的身體是一工一工愈來愈荏。家族的人攏煩惱伊的性命保袂牢。毋過，伊阿母一直是相信原因是藏佇伊的心內、無講出來的。有一工，阿母誠傷心是那哭那共款勸（khuán-khǹg），叫伊一定就愛共彼个身體變荏的理由講出來。到尾仔對阿母的苦勸，伊擋袂牢就共講出來。
「這款代誌對阿母、對凊彩人攏是誠僫說明。講出來應該嘛是無人會相信的。老實講，阿龜是猶無法度佇彼个世界成佛，我替伊做過足濟的超度法會攏嘛無效。我若是無佮伊做伙去冥土，伊敢若是無法度成佛。逐暗阿龜攏是轉來睏佇我的身軀邊。對喪禮的彼一暗開始，逐暗攏來毋捌一暗無來。我定定會想講，伊到底是有死去抑無？行姿和行動攏是佮在生的時仝仝，——干焦是佮我講話的時，有較細聲爾爾。閣一直共我交待，伊來的代誌就莫ga̋ng講。應該是愛我嘛死的款。我嘛是想講：我若是干焦家己一个人就無想欲活落去，不而過就親像阿母講的，我的身軀是爸母的，頭項代誌就是著有孝爸母。就是按呢，所有的代誌我攏總講出來矣。-----是，逐暗佇我拄欲睏的時陣來的，就留落來到天欲光。聽著鐘聲就出去矣。」
八右衞門的阿母聽著是掣一趒。隨趕緊去到檀那寺（3），共後生的告白內容講予寺僧聽，請求協助。寺僧是一个有歲的、誠有經驗。聽了後並無著驚，就隨講：
「這款代誌是定定有，毋是頭一擺。應該會當共令公子鬥跤手。不而過，這馬就是上危險的時陣。照我看，令公子的面已經有死人面矣，阿龜 sàng 若是閣轉來一改，伊就無救矣。應該做的代誌這馬著趕緊來做。先莫共令公子講，隨招集雙方的親情來寺裡。為著令公子是需要挖阿龜的墓。」
親情就攏來到寺裡，嘛攏同意挖墓，寺僧𤆬逐家來到墓地。遵照寺僧的指示，先共墓石徙到邊仔，拍開墓共棺柴扛出來。棺柴蓋拍開的時，在場的人攏驚甲咇咇掣。彼就是因為阿龜佮破病進前是完全仝款，猶是遐爾媠，面浮出笑容坐佇眾人的面頭前，——這是因為阿龜並無死去。不而過，寺僧命人共死體對棺柴提出來的時，逐家的著驚隨變做恐怖。彼就是因為人已經死去遐爾久，毋但是一直保持正座（4）的姿勢，而且屍體摸著是佮在生的時仝款燒燒、金滑金滑。
就共死體提到殯葬場，寺僧攑筆佇死人的額頭、胸坎、跤手頂懸，寫神聖功德的梵文字。寫了後才共死體埋倒轉去原來的所在。欲埋進前閣為阿龜做「施餓鬼法會」（5）。
以後，阿龜就無閣轉來翁婿的身邊矣。八右衞門是沓沓仔恢復健康佮氣力。不而過，伊是一直遵守彼个約束無？日本的作者就無寫。 （了）
注記
2. 土佐の国（とさのくに）：現在高知縣的大部分。
3. 檀那寺:家庭所屬的寺廟。a family temple，家族寺。「tân-ná sī」
4. 作者原注： 佇日本，屍體一般是用四角形棺柴，正座囥入去。
「正座せいざ」：日本佇tha-thá-mih頂懸的正式活動的正式坐法。台語稱「跪坐kuī-tsē」。
5. 施餓鬼：佛教認為六道輪迴裡的餓鬼道眾生誠艱苦，無法度食枵飢喙焦難耐，就以慈悲心提食物佈施給餓鬼，減輕伊痛苦。稱「施食餓鬼法會」。
*****（刊載佇《海翁台語文學》雜誌288期，2025年12月）
文章定位：
