日本的衛星電視 Lim Tong-îng
語言，毋管啥物語言攏著愛一直伨伊，若無，就親像「三日無餾，𬦰上樹」隨就袂記得了了。語言是比人較現實，袂使得一工無插伊，親像「一日討海，三日曝網」是會隨走甲無看人。我進社會佇日本公司服務，就隨開始學日語，就按呢佮日語結一世人的緣。後來家己創業做台日貿易，日語的能力是愈重要。就按呢一直想辦法來接近伊，較捷佮伊做伙。工課上是逐工佮日本人做伙，講日語
、寫日文。本成就真愛看冊，就改看日文冊，看日本的電影、電視劇，聽日本的廣播等等來繼續精進日語的能力。
日本佇1989年6月開始播送衛星電視（BS TV ）， 丈人隨就蓄一組BS TV的設備（就是俗稱的「小耳朵」）來收看，我嘛趕緊綴伊蓄一組。就按呢，日時上班佮日本人接接是講日語、寫日文。暗時、歇睏日佇厝裡是看日本的電視，看日文冊、看日本戲劇，規工攏是浸佇日語的環境。
日本衛星電視開播的時是類比電視(Analogue Television)，有NHK BS1、BS2 二台佮五大民營電視台——日本電視台（NNN）、東京放送（TBS）、富士電視台（Fuji TV）、朝日電視台(TV Asahi)和東京電視台（テレ東，TV TOKYO）。後來就閣有WOWOW、日本BS放送和放送大學的電視台加入來。當時BS電視台的數目是比台灣的電視台較濟，節目閣較豐富。本成厝裡是裝第四台（有線電視），自從大漢囡仔讀國中就共退掉。就按呢自開始看日本的BS TV到今，我就無閣看台灣的電視矣。
其實，日本衛星電視播送，受著上大致蔭的是親像阮丈人的彼代人，就是戰前受日本教育的彼陣「失語的一代」（我是共號做「改朝換代的一代」），當時已經是六七十歲以上的老大人矣。
NHK是付費的公共電視台，著付「收視費」（NHK叫做「受信料」）。收看NHK BS電視的台灣人，因為毋是日本人閣是蹛佇外國，毋捌聽講欲來收費。民營電視台的BS TV因為有廣告是免錢的。猶毋過，等到2000年12月衛星電視改做數位播送，（digital TV）代誌就無仝款矣。看NHK的 BS1、BS2，電視畫面的倒手爿下跤，會顯示一搭量約仔20cmX15cm大的字幕，叫做「確認メッセージ」（確認Message），就是著付「收視費」的通知。毋知是按怎，電視開了後過一段時間字幕就消失，就按呢無誠大的影響。毋知閣過無偌久，這个「確認メッセージ」就一直牢佇遐、袂消失矣。
畫面有一搭字幕，就看袂完全實在是真礙謔。彼時的收視費是偌濟就已經袂記得矣，這馬的收視費是一年日票21,765箍並無懸。我是想欲付，曷就毋知欲按怎付？就拜託日本朋友去NHK問看覓，NHK的回答是講：外國人是無「法條」通收費。朋友誠扭掠隨建議講：若是按呢，就共「確認メッセージ」消掉，NHK的回答仝款是無「法條」通來做。落尾朋友就想著一个方法：共我當做伊家庭的一員，派到台灣做工課的方式來付收視費－—NHK有「家族收費」的方案，就是家族成員蹛無仝所在的收費方案。毋過，這个提案無實在，當然In是袂接受。
有一擺參加一个台日經濟界的晚餐會，誠拄好，日本台灣交流協會台北事務所（就是日本駐台大使館）的經濟組長坐我邊仔，這敢是主辦單位刻意安排？就共這層NHK BS電視受信料的代誌講予伊聽，對伊的表情看起來應該是誠有趣味。我嘛對NHK揣無法條來收費，提出另外一个做法予伊做參考：
「建議日本的外務省，請NHK共台灣人收看NHK BS電視的收視費免除，抑是逐年編預算替台灣人付這條收視費。理由是按呢：『收看NHKBS電視的台灣人，應該攏是捌日本話，內底有一陣人是戰前受日本教育的台灣人（當時猶是日本國籍），應該攏是對日本有好印象的人。而且，日本衛星電視的衛星是行佇東經110°，台灣是拄好收會著，時差嘛才一點鐘，真合台灣人的生活作息。台灣人收看衛星電視，播送費用並無增加，準講有，嘛是一點點仔爾爾。
全世界所有的國家，逐年攏有編足濟的預算，提供外國人的獎學金，做宣傳，提供優惠，目的就是欲予較濟外國人認捌家己的國家、有好印象。已經對日本有好印象的人，共收彼一點點仔的NHK BS收視費，佮這款的宣傳預算比起來，講是「屑仔sap-á」嘛應該袂超過。共台灣人的NHK衛星電視收視費免除掉，遮的人對日本的印象一定會愈好，就閣愈拍拚鬥宣傳，效果一定是會予你想袂到，世間無比這閣較好的CP值矣啦！」
伊是那聽頭那頕、喙是那講真有理，應我講轉去會反應看覓。
伊的回答，敢干焦是「做官喙」抑就是「喙講講咧爾（lip service
）」?我是毋知。後來伊是有向日本外務省抑是NHK反應無？我嘛無閣問。主要是因為我準備欲退休，沓沓仔對台日交流的公共事務退落來。而且網路的快速發展，已經出現足濟電視以外的新管道，譬如串流媒體（Streaming media）親像Netflix，KKTV等等，欲掌握時勢、吸收新知， 衛星電視以外是有真濟的選擇。
看幾十年的日本衛星電視，我佇日語能力的精進是得著真大的幫贊，嘛變做生活的一部分。到今我嘛繼續咧看，毋捌停睏過，嘛會一直看落去。我永遠感謝日本的衛星電視，永遠嘛袂去袂記得。
（2025.8）
（《海翁台語文學》第289期p93(2026.1)刊載）
文章定位：
