新聞| | PChome| 登入
2026-04-27 20:28:17| 人氣10| 回應0 | 上一篇 | 下一篇
推薦 0 收藏 0 轉貼0 訂閱站台

「老顧客」

     「老顧客」 Lîm Tong-îng

   Tsa̋ng下晡佮牽手去眼科做目睭的「定期保養」。人生上尾的願——台譯，逐工攏是釘佇電腦，目睭較損。著定期予醫生檢查，看白內障是偌熟矣。目睭兩粒的保養免偌久就好。

拄好附近的「茉莉書店」有「開心迎新年——買500送100」的活動，就去蹓蹓行行咧。欲買的台譯參考冊揣無，就買幾本冊做家己今年順利的賞品。天猶光光，佇「草梧道」行行趖趖咧，看會當吸收一寡仔少年人的精氣袂？！
天色沓沓仔暗落來，牽手提議講暗頓食食咧才來轉。本成是想講來去「勤美」揣看有無，目睭前就是綠園道新開的「洲際」，規路是妝挺甲白鑠鑠，有人講親像佇外國，我是感覺有年的氣氛。對面就是捷去的「南瓜屋」，老所在，老翁某就行入去。一直咧想無紮「貴賓卡」，袂當拍折真無彩。毋過，心肝底是按算才來佮店員參詳。
無疑悟行入門，店員就拍招呼。咧想講伊敢捌我？細細聲共講：貴賓卡無紮，敢會當拍折？店員隨應講：當然無問題，你是「老顧客」啊。閣講：以前來攏是先敲電話來訂位，今仔日是？伊確實是會記得我，共捾仔的冊提懸，拄才去「茉莉」，行來到這搭。伊嘛應講「茉莉」有真濟人客攏會去。
定定來熟跤熟手，就按呢佮規間少年人做伙食一頓。食完準備「帶馬回府」的時，店員來講：店長欲送一分甜點，叫阮小等一下。原來拄才入門拍招呼的是店長，莫怪喔。
就按呢，食一頓飯，印證著較早讀規晡的「企業管理」的精華：「選擇佮集中」——「選擇」一間會合的店，較捷去（集中）就會變做「老顧客」，尪仔頭（面）會變做「貴賓卡」，閣較會受著重視。這間店嘛誠gâu經營，用「貴賓卡」來培養「老顧客」。
（251230Tong-îng）

我要檢舉
台長： Tong-îng Lîm
人氣(10) | 回應(0)| 推薦 (0)| 收藏 (0)| 轉寄
全站分類: 圖文創作(詩詞、散文、小說、懷舊、插畫)

我要回應
否 是 (若未登入"個人新聞台帳號"則看不到回覆唷!)
* 請輸入識別碼：
請輸入圖片中算式的結果(可能為0) 
(有*為必填)
TOP
詳全文