新聞| | PChome| 登入
2026-04-22 10:47:37| 人氣31| 回應0 | 上一篇 | 下一篇
推薦 0 收藏 0 轉貼0 訂閱站台

我的台文路

我的台文路／Lîm Tong-îng

   我是原生台語人，自細漢，爸母、家族，規个庄頭齊是講台語，入國校以前毋捌華語生做圓的扁的。學校的教育雖是華語，毋過一直講台語。後來出社會，家己的新家庭就免講，佇佗位攏會特別要意著講台語。自認台語袂輸人。
   67歲退休的時，一生愛看冊，按算欲來看寡台語冊的時，才發覺家己是「台語誠gâu講，毋過就是袂曉讀、袂曉寫」，就是人講的「台語青盲牛」。誠見笑，就決心欲共讀寫學會曉。頭起先是家己學，學一站仔猶是捎無摠頭，就去參加郭永鏜老師的課程。郭老師共我點破了後，學著就較紲拍。
   當當繼續精進台語文的時，隨拄著兩項阻礙：頭起先就是予華語擋牢咧，咱的教育攏是用華語，看著「漢字語詞」，頭殼隨走出華語音。閣來就是語詞少。七八十年無用，台語無綴咧造新詞，同時共原有的字詞袂記得。
  第一項阻礙我是用土法：抄《教典》。自頭到尾一字一字抄，量其約用兩年外的時間，就按呢看著「漢字語詞」隨有法度用台語發音，同時羅馬字嘛誠熟矣。第一項的語詞少。拄好參與「經典小說的台譯」，翻譯芥川龍之介的短篇小說，用翻譯來增加語詞。揣語詞的時，會反字典，嘛會回想序大人佮家己佇較早是按怎講的？按呢共字詞抾轉來。同時也共抾轉來的字詞鋪佇面冊佮友志分享。
  因為我是全時間的台語人，一工24小時，一年365工攏是用台語思考、講台語，予我對兩項阻礙的對策得著「輕可閣做了好」（事半功倍）的效果。
  （2026.02.12）

我要檢舉
台長： Tong-îng Lîm
人氣(31) | 回應(0)| 推薦 (0)| 收藏 (0)| 轉寄
全站分類: 圖文創作(詩詞、散文、小說、懷舊、插畫)

我要回應
否 是 (若未登入"個人新聞台帳號"則看不到回覆唷!)
* 請輸入識別碼：
請輸入圖片中算式的結果(可能為0) 
(有*為必填)
TOP
詳全文