新聞| | PChome| 登入
2026-06-19 16:24:16| 人氣12| 回應0 | 上一篇
推薦 0 收藏 0 轉貼0 訂閱站台

【 短文】 〈 Computex 電腦展 〉

 【 短文#625】 〈 Computex 電腦展 〉 Lîm Tong-îng

逐年六月初的Computex，阮攏叫做「電腦展」。應該是當今台灣主辦的展覽會上出名的，全世界業界的大仙的攏會到場的唯一展覽會
。2026年Computex的定位是「AI Together」，媒體的報導誠濟，逐家應該攏有看著。台灣較強的產業，親像鐵馬（自行車），工作母機
，半導體，塑膠橡膠機械等等的專業展覽會，規模嘛真大，受著世界同行的重視，就是無Computex遐爾出名。
在職的時，逐年的Computex，日本人客是一陣一陣來，閣有規大陣來的。幾十年來，Computex攏是公司的一个大節目，逐年行跤到，親像咧行灶跤。退休了後就無安排看展覽，毋過，猶有幾个較早鬥相共的少年人，逐年攏有排擔，就攏會去展場共看、共鼓勵，毋過，看展覽就無遐爾頂真矣。
一行入會場，攏是少年人，親像我這款的老歲仔已經是看無幾个，這个世間就是一湧捒一湧，一代傳一代。在職的時，會場攏會拄著熟似的，這馬就罕得矣。這是該當然的啊，仝沿的嘛仝款退休矣。仝沿的人若猶佇第一線的，攏是事業做甲真大，猶毋願放，毋敢放，放袂落去的。阮攏會笑𪜶是歹命人，看袂破！著honnh！遮的仝沿的嘛毋免家己來會場顧擔，當然是拄袂著！
阮這沿的是綴台灣的經濟發展行過來的，是參與者嘛是見證者。佇這个經濟發展的大湧，同學，做兵做伙的，同事，生理上的朋友，競爭者等等無數相捌的人，有人是早早就陣亡，有人是一直佇大風大湧泅來泅去，有人是佇一間公司平平穩穩做甲退休。有人是佇各行各業出頭，成做各行業喝水會堅凍的人物。家己應該算是對大風大湧有泅出來無淹死的。猶毋過，毋管是啥物人，幕若是放落來，攏著謝場退落來，無留戀，免留戀，這就是人生啊。
這幾年，見若去展覽場，攏會有這款的感嘆，這款症頭，敢是老歲仔人才有的？人攏講無看就好了了，閣聽講食老頭殼著捷看捷振動、較袂戇去。曷到底是看抑是莫看較好啦！？

我要檢舉
台長： Tong-îng Lîm
人氣(12) | 回應(0)| 推薦 (0)| 收藏 (0)| 轉寄
全站分類: 圖文創作(詩詞、散文、小說、懷舊、插畫)

我要回應
否 是 (若未登入"個人新聞台帳號"則看不到回覆唷!)
* 請輸入識別碼：
請輸入圖片中算式的結果(可能為0) 
(有*為必填)
TOP
詳全文