銀行 Lîm Tong-îng
銀行對逐个人的意義、關係攏無相𫝛。我佮銀行就是無緣分，生佇田做少的做田家庭是「生食都無夠，哪有通曝焦」。靠種稻仔顧三頓，逐冬的稻仔割起來曝焦，就是先共米絞仔賒的，𥴊仔店欠的還還咧就賰無偌濟矣。留咧家己食的粟仔攏嘛食袂到割稻仔時。到時無米就去米絞仔賒，無鹽、無油去𥴊仔店提，等到稻仔割了後才清數，逐冬就是按呢咧輪迴。錢寄銀行是連做夢就夢袂著的。
上早佮銀行有交插就是去台北讀冊的時，佇郵局開一个戶頭來予厝裡寄生活費。後來入社會食頭路，初期的薪水是領現金，薪水袋仔是提轉厝原封交予A̋u（阿母），厝裡頭喙濟，應該嘛是無賰甲會當寄銀行。後來薪水改做銀行轉數才佇銀行設戶頭，這嘛猶袂當講有往來。定定聽著的：「好天借你雨傘，落雨天共雨傘收轉去。」這佮我是無啥干礙，一點仔顫悶就無。
一直到家己創業做貿易，才真正佮銀行有往來。做生理是一定需要銀行的幫贊，貨款的進出攏著透過銀行，各種費用嘛著透過銀行。同時公司的信用嘛是銀行提供的。我做國際貿易是定著靠銀行，甚至會用講無銀行的協助，生理是無法度做。早期國際貿易的貨款攏是用LC，就是信用狀（Letter of Credit）。LC是以銀行作買方和賣方之間的付款保證的金融工具，當然是銀行發出來的。公司主要人客是日本，互相較熟似，而且人客若是日本有名有姓的老企業，比較上就較有信用，就會改做佮咱國內的買賣仝款，就是貨款先附定金幾%，貨品完成出貨才付尾款。國內的供應商的貨款，公司的開銷費用、員工薪水當然攏是透過銀行。
就按呢公司開始的時，選擇主要的往來銀行(Main Bank)是誠重要。國際貿易的貨款是對外國匯入來，銀行定著是外匯銀行。我閣希望銀行的英文名有「Taiwan」，按呢人客一看著銀行名就知影是台灣。小小仔的生理嘛著加減予人認捌台灣，盡做一个台灣人的本分。咱國有誠濟優秀的銀行，毋過英文名就看袂出是台灣的銀行，甚至猶有英文名是掛一直喝「欲拍欲刣」的敵國的名。最後阮是選一間分行離公司上近的「臺灣銀行Bank of Taiwan 」，一看就知影是台灣。
較早做生理的貨款攏是開支票，佇銀行著愛開「支票存款帳戶（支票戶）」的戶頭，就是一般講的「甲存戶頭」。猶毋過，新公司佮銀行的往來猶少，規模閣細，向銀行申請「甲存戶頭」，往往是審查袂通過。銀行的審查是看你的營業內容，人客佮訂單有穩定無？利純的水準好抑䆀？ 就按呢銀行若是允准設「甲存戶頭」，就表示這間公司是有某種程度的信用。而且佮供應商正式交易進前，通常供應商攏會做「客戶的信用調查」，調查表攏有一條必添的項目就是「甲存戶頭」。「甲存戶頭」的有無對供應商的信用調查是有真大的影響。
公司成立的時，就佇「臺灣銀行 」開一个「活期存款」的戶頭來用。經過一段時間的出入，就向銀行申請「甲存戶頭」的開戶，毋過一直無通過。當時家己嘛知知，新公司、往來無久、規模細等等欲通過確實是有困難。無「甲存戶」就是公司的信用無得著銀行的認定，阮就認識著這就是公司的「現實條件」。就回轉來公司的本質：「做生理」，先共生理做起來。頭起先就是拍拚爭取人客的訂單就是開拓生理來源。供應商欲賣咱物件是因為有利純，同時貨款確實收會著。初期無「甲存戶」袂當開支票就用現金買賣採用「出貨前匯款」。按呢做供應商就無貨款收袂著的煩惱，就較肯佮咱做生理。生理會成立才有錢趁。
生理愈濟佇銀行的出入金額就愈濟，長久的累積信用就會沓沓仔建立。同時共公司所有費用的出入攏集中佇「台銀」，按呢做嘛是因為往來的金額濟，銀行收的LC費用，匯率等等較會當爭取著較好的條件。另外供應商攏有伊的主要往來銀行，公司就佇幾間主要供應商的往來銀行開戶，主要嘛是欲節省匯款的手續費，同時預防「台銀」的系統萬一故障，猶會當佇品好的日匯款，維持佮客戶的信用（遮爾久猶毋捌發生）。遮的攏是做生理的基本：「開源節流」。
會記得是公司成立三年後的代誌。「台銀」的分行經理敲電話來，問我是按怎佇台銀的出入金額就袂少，汰會無開甲存戶，敢無愛來開？聽著遮的話，實在是誠感嘆，講來就話頭長，目屎是強欲津落來，毋過心肝是誠歡喜，幾年來的拍拚已經得著銀行的認定矣。就共幾年前捌申請無通過的代誌講予聽，伊講當然這擺嘛著照審查程序，照實績看起來應該是無問題。就按呢公司成立三年才申請著「甲存戶」。
開公司做生理是欲趁錢（營利），就是公司法第一條所寫的「公司以營利為目的」。經營公司若是無趁錢，照公司法來講是違法的。公司是提供產品抑是服務來爭取人客的採用，得著相對的利純。逐間公司攏是工夫盡展，欲予愈濟的人客採用、長期交關，就是培養「固定客」抑是講「老顧客」。生理欲久長，一定著培養「老顧客」。
銀行嘛是營利事業，仝款著培養「好人客」變做「老顧客」。銀行對「老顧客」一定是善意用心對待的。無論是做啥生理，經營者是一定著共公司經營做「好人客」。若是按呢，定定聽著的「銀行是好天借你雨傘，落雨天共雨傘收轉去。」對好人客是無啥物干礙，一點仔就無顫悶。（20260322）
（ 刊佇「臺江臺語文學」（第58期，2026年5月，p241-245）
文章定位：
