生日係咪好開心呢？daddy 話媽咪早幾日諗起個女我就快廿二歲生日便想喊想喊咁呀，點解？
哈，廿二、三年前，daddy 和 mammy 去日本旅行，回港後便有了我啦，哈哈，所以佢地成日話我係 made in Japan 架。怪不得我細個成日俾人話似日本妹啦！哈哈……
話說廿二年前的八月廿二日，懷著七個幾月bb的媽咪患上急性盲腸炎，要立即做切除手術。一個懷孕的女性做手術就梗有一定的危險啦，個 bb 我仲有成七個幾月咁大喎，話大唔大，話細又唔細，都唔知拎唔拎我出來好喎。聽媽咪講番，話當時個外科醫生o係做完手術才敢跟媽咪講，話個手術其實好危險架，仲分分鐘會救唔番我，或者媽咪架。不過，好感恩，個手術總算成功，媽咪和我也冇事，好感恩呀！
之但後，個故事仲未完架喎。你知啦，做完手術個傷口就一定好痛啦。媽咪仲要俾我呢個七個幾月的bb頂住個肚和偒口喎，你話幾痛丫！佢仲要插胃喉去抽番 d “龍”出來喎，真係超級痛呀。媽咪話佢痛到忍唔住要拉番條喉出來，嚇死當時奉我 daddy命在場陪媽咪的姑姐呀！好彩姑娘都放過我媽咪，唔駛插番條喉入去。(媽咪話生完我之後就舒服晒啦，梗係啦，冇了我頂住佢個肚和傷口喎！)
原來一開刀做手術就會令個胎盤脫離子宮，於是我咪趕著要出世囉，本來我個預產期係十月中架，結果就早了成兩個月，o係八月廿四日上午七時多在九龍的聖德勒撒醫院出世，被迫做了“七星妹”啦。但就因為身體太衰弱，只有四磅幾唔出得院。醫生都冇俾媽咪睇我一眼，就吩咐護士把我放入氧氣箱，再轉去就近的公立醫院。(轉醫院的原因係因為要在私家醫院租個氧氣箱住一晚的費用好貴架！所以，醫生便建議爸爸把我轉去公立醫院啦！) 哈，因為生我出來的費用比原先預期的多，所以我亞婆 (即祖母) 就取笑我話，人地 d 女都只係“千金”，但我就做了“萬金”啦。
媽咪佢地形容，我出世時身子好細，細到只有一個暖水袋咁，仲話個手腕只有媽咪隻手指公咁“幼”喎。哈哈，不過我就好易吸收，護士話我好似吹波仔咁，一日一日咁被吹大。在一個星期後，夠五磅的我終於都可以出院返屋企住啦！嗚……好感動呀！感謝主！
所以，真的要感謝神一直的眷顧、帶領，我不單可以健健康康咁活到廿二歲，祢仲賜給我一個充滿愛的家庭，今年仲大學畢業o忝，多謝祢呀！當然唔少得生我出來的媽咪，仲有就係爸爸和媽咪咁多年以來悉心的照顧啦！我會繼續孝順您架，錫晒您們。
文章定位：
