哈哈，我終於都學車啦！
由我升上大學開始，爸爸就叫我學車，但我始終都“的”唔起個心肝去學，成日話要讀書，唔得閒學……到咗出來做嘢，就更加大條道理話返工辛苦，放假一定要休息……就係咁，唔經唔覺咁過了六年，就連細佬都响廣州考到個車牌返來，屋企從此多了個司機，yeah！
但次次靠人都唔得架，尤其係我的性格，覺得求人不如求己，如果自己可以做到的，做乜要求人、要倚賴人呢？況且屋企又唔係冇車，如果係短程的，自己都可以做司機嘛！hehe，咁啱 training contract 又完咗啦，爸爸同細佬又係咁說我去學車，結果响我完 training contract前向運輸署報名考車，筆試排期响我由柬埔寨返來的翌日 ( 即8月15 日 )。本來諗住搵私人駕車師傅學車的，但知道香港駕駛學院的考牌合格率極有保證，所以在我出發去柬埔寨前就去咗香港駕駛學院報名啦！哈哈，我報的係「智專」組的「漸進」課程，一個導師跟足全程，分兩次考試——泊車和路試，hehe，我機器白痴來架嘛，慢慢來的好。坦白講，香港駕駛學院的學費好貴哩！其實都真的蠢咗，如果當年讀大學時我肯學的話，學費就唔駛自己俾，家吓又冇理由要屋企幫我俾喎……唉……真是蠢咗！成 9 千幾蚊架！好貴哩！
由於我要响柬埔寨返來後翌日考筆試，所以响我去柬埔寨前的一個星期就開始讀本《道路使用者守則》，呢本嘢幾年前爸爸已經俾咗一本我，但我又唔肯去讀喎，哈，報運輸署時又寄一本俾我，到我報香港駕駛學院時又俾一本我，哈，結果我有三本哩！我臨去柬埔寨前都冇乜心機讀呢本《道路使用者守則》，只係睇咗廿幾版。雖然聽人講筆試好易考，但我呢 d 人好鬼怕死架嘛，唔讀書唔敢去考試架，我又怕瘀喎，如果唔合格咪笑大人地個口？所以在極之唔願意的情況下，我帶埋本《道路使用者守則》去柬埔寨，諗住得閒就拎出來睇吓。哈哈，結果我就梗係冇咁勤力啦！亦由於柬埔寨的短宣生活實在太充實的緣故，亦都冇時間俾我去讀哩！所以，連 d 組員都話：「除了第一日上機見你响度睇吓之外，我都冇見你拎過本嘢出來啦……」哈哈。
我不停同人講我在柬埔寨返來之後翌日就要考筆試，點知個組員 (耀華) 話：「唔係喎，其實你係返到香港當日即刻要考呀，我們班機响 8 月14 日晚 11:50先到香港喎，出境要成12點架啦，已經係 8 月15 日啦……」哈，又係喎……好彩我係考下午咋！
最後，本《道路使用者守則》我係响考試當日的上午成十一點先開始讀，讀到兩點半度就準備出門去考試啦！結果？我呢 d 天資聰敏的就梗係 pass 啦！哈哈，感謝主！
之後就立即去香港駕駛學院改番個泊車考試期，响 10 月3 日考呀！目前為止，一共學了四堂車 (即3 個小時)，識駕車唔難，但要駕得好就好難哩！哈哈，我始終都唔識點轉彎哩！都唔知幾時開始要扭軚、又唔知要扭幾多軚、更唔知幾時開始要回軚喎……哈哈，都真的幾搞笑架！哈哈，不過，我起初以為自己會好“騰雞”、手忙腳亂咁的，但個導師讚我話我好冷靜喎，仲話我第一次駕車算係咁喎……哈哈，香港駕駛學院的「智專」組課程，果然係星級的服務！哈，怪不得收咁貴啦！哈哈！
希望山邊能快 d 考到車牌，將來唔駛吓吓靠人載啦！不過，屋企有兩個鍾意駕車的司機——爸爸和細佬，哈，你們放心喎，就算我考到車牌，都唔會同你們爭做司機架！我極之樂意做乘客哩，尤其係我呢 d無論乘搭任何交通工具都可以瞓覺的人，哈哈！
文章定位：
