兒歌都有得唱：「世界真細小、小、小，小得真奇妙……」
估唔到呢個世界真係咁細，冇見都有好幾年啦，咁都俾我們見番面。去Shatin IVE 返工唔夠一個月，竟然撞番兩個中五同學，我們有好幾年冇見面啦，雖然傾談的時間唔長，但o係陌生的環境遇到朋友，真的有少少他鄉遇故知的感覺，我們梗係立即交換通訊資料啦，對於一個唔鍾意打電話的我來講，聯絡方法就梗係包埋 icq 啦！攞 mobile no. 都真係其次，因我都唔多打電話，icq 呢種「網上傳情」方法就最適合我啦。所以，呢兩位朋友都真係未必會收到我的來電，哈！不過，見番你們真係好開心，唔需要講 d 咩特別o野，感覺已好親切啦！
另外，心有靈犀呢樣o野就唔係人人都得，但我跟呢位相識十年的朋友就真係心有靈犀啦 (其實我們只是做了一年同班同學咁大把)。話說星期日去吉之島逛街買衫，行了差唔多成日，一個熟人都撞唔到，竟然o係 bossini 撞到你和你的密友，之前成日話要約出來見都冇約到，估唔到o係街上撞到。興奮之餘，仲發現我們戴埋同一款手錶，只係顏色唔同，我o係今年農曆新年買的，而你就o係上兩個星期先買。我買紫色，你買粉紅色，仲要係我都有諗過買粉紅色，但最後決定買紫色o者，真係剛剛好一人一隻，哈！正呀！
仲要大家都o係 bossini 買衫，唔知會唔會買埋同款的衫呢？搵日出來著過俾你睇o下，真係唔話同你心有靈犀都唔得呀。仲記得有年一齊行花市遇見 Ms Ng 一家四口，佢鬼咁驚訝問我們係咪親生姊妹o忝，哈！真搞笑！
坦白講，雖然我們之間都曾經鬧過不愉快的事，事後大家都冇再提起，或唔敢提起，只是當冇事發生。冇所謂啦，我們家下仲係好朋友咪得囉，況且我一向都唔鍾意活在以往，人要向前望先會有進步架嘛！就好似一對親生姊妹一樣，要嗌o下交，鬥o下氣，咁樣先有樂趣架嘛，亦會令大家了解對方多一 d，珍惜呢段友誼多一 d，是嗎，我的好姊妹？
Hey, 真的懷念大家夜晚o係天台食住零食咁睇夜空的星星、月亮，臨瞓前傾心事的時間呀，只可惜近幾年都各有各忙，我又要返暑期工……唔知將來仲有冇機會呢？哈！希望你的另一半唔會呷醋啦！God Bless!!
文章定位：
