之前講過新秘書 Sharon 俾 counsel 鬧，我怕佢會頂唔順辭職，哈……原來喺 27.4.05 (即俾 counsel 鬧完的第二日) 佢真的辭職啦……真係估佢唔到呀！邊得你咁快架？當日我聽你講話：「頂唔順咪辭職囉！」，我真的好想同你講，叫你等我走咗先好辭職架，點知你咁鬼快，搞到 Ms. Leung 又唔知幾時先肯放我走啦……嗚……估唔到你會比我更早的離開，真的 What a Surprise！不過，無論如何，我只會返到 31.5.05，1.6.05 我一定會去返新工，唔好嘥大家時間！
最搞笑係上星期四一早，老細話新 trainee 已經有人選，應該可以喺六月中前搞掂，問我可唔可以遲多兩個星期先走……哈，我就梗係話唔得啦，我話經已推遲咗兩個星期，唔可以再推。哈，佢竟然荒謬到話：「你試吓同人地講講啦，都係兩個星期啫，如果有咩問題的，你叫人地打來同我講啦……」哈，真係荒謬！學你話齋，既然得兩個星期，你怕咩放我走啫？況且，我留喺度都唔會幫到你 d咩架啦……仲有呀！你估我會唔會愚蠢到俾你同我新老細傾電話丫？你冇嘢呀？學 Teresa 話齋，你唔係咁天真呀？
星期五 (13.5.05) 係 Sharon 的 last day，真的冇乜特別，佢返工的個半月，最大的功勞就係整咗個 file list ，perfect！將來大家都喺中環返工，得閒搵你食飯，ok？
星期六 (14.5.05) Ms. Leung 有好幾個客要見，又冇秘書，咁唯有我幫佢接電話啦。Mr. Woo 打來，見我接電話，問我老細係咪放假……哈，真的可笑，佢係咪放假，你唔知架咩？然後，佢又問我個 release 搞掂未？哈，你問咩啫，講到唔關你事咁，成件事都係由你幕後操縱架啦，咪再扮嘢啦，唔該！跟住又話，即使家吓簽咗份 release 俾我，成件事都未完，因為我將來 admit 的時候仲要簽一張 Form 4 證明我係 eligible to be a solicitor ……唉，我知丫，所以我冇同大家死撐囉……我真係想好來好去架嘛……點知 counsel 話：「你千祈唔好激嬲師父啦，要乖乖地，要知道你仲有嘢俾佢鍊住」……哈，我唔認同囉，我大不了咪唔要你嗰 10 個月的 training 囉，況且我都唔覺得我學到 d 咩……當然，如果可以攞番呢 10 個月就係最理想不過啦，但倘若你要玩嘢的，咁我咪唔要囉，咪以為自己好巴閉得架……唉……我覺得係你有嘢俾我鍊住多過，我有嘢俾你鍊住囉……我行得正，企得正，事冇不可對人言，唔似你兩個成日鬼鬼崇崇咁，咩都唔俾得人知，難神秘咁……唉……
當日放工就同 Kenix 和 Teresa 去紫玉蘭食 lunch，傾計傾到三點幾先走。
*********************************************************************
11.5.05 (星期三) 係 Ling 的 last day，當晚去咗唱 karaoke，我咁大個女都係第一次去呢 d 地方，坦白講，真的唔太欣賞，所以食完飯，坐咗一陣，喺九點半就同 Janice 和 Sharon 先走啦。
*********************************************************************
15.5.05 (星期日) Janice 去日本旅行呀！去成八日咁多呀！真係羨慕死人啦！記住買多 d 手信返來呀！去開 Disney 就買多 d 米奇俾我啦！你快 d 返來呀，我會好掛住你架…… d 手信，哈！祝你一路順風，玩得開開心心！
*********************************************************************
另外，Kenix放大假去溫書，準備佢的 LLB 考試，你要加油呀！我知你實得的，俾心機，努力呀！而佢就要 31.5.05，即我的 last day 先返……你記住返呀！點都要同我 say 個 goodbye 架，係咪？哈哈……
o，成個 office 冷清咗好多o忝，Janice 去旅行，Kenix 要考試，Sharon 就辭職，聽聞“新新秘書”要 1.6.2005 先可以返工呀，哈，得返 Teresa 坐喺出面個大廳，對住亞珍，好慘呀！我坐喺房度，都唔可以成日走出來傾計架，實悶死佢咯……所以，大家記住快 d 返來呀！
*********************************************************************
哈！仲有一件好好好好笑的嘢呀！星期六坐車返工途中，Teresa 打來話：「Sabrina，我好慘呀！我個電話沖咗落厠所呀……」哈，我個反應係，呆咗一陣，然後話：「吓？你講真架？」再忍住笑咁話，「乜真係沖到走架？」哈，真的冇諗過，原來咁大部電話係可以沖走的……哈哈，真的好搞笑！事緣係佢之前一晚出街食飯，傾住電話的入洗手間，將個電話放喺個水箱上，沖厠時在“噤”完水箱上的沖水掣後，好唔小心咁“high”埋個電話落厠所，就係咁，個電話冇再浮番上來啦……真的可惜……哈，所以大家將來去洗手間的時候，小心 d 唔好沖走個電話呀！哈哈……
雖然佢跌咗個電話，真係好唔開心，之但係佢老細，陳律師就立刻買過一部同型號、同顏色的俾佢，話當係佢將會 admit 的禮物喎！wow ……好細心呀！哈，隨即見到 Teresa 由失落的樣子變為由心底裡笑番出來的樣，真的好羨慕呀！唔知我會唔會有個咁好的老細呢？哈，失而復得的感覺，真的好難容！正呀！
文章定位：
