wow, 都有成兩個月冇寫 diary 啦！等我講講我呢排發生 d 咩事啦……
第一大事
大家姐走咗，新秘書 (Sharon) 喺 29.3.05 開始返工，覺得佢份人冇乜嘢，做事都有條理，幾好！相信佢唔會好似大家姐咁咩都推晒俾我做的。話講我打算幫我老細整個 file list (因為大家姐係冇咁做到)， 入面有齊老細所有的files 資料，如 ref. no, court action no, client name 等，讓我知道手頭上有d 咩 cases。點知，新秘書一來到就好努力咁整啦，佢好奇怪咁話唔明點解大家姐冇整到，問我佢係咪好忙喎……當我同佢講話我都整緊一個時，佢就話：「嘩！乜你咁乖的？呢 d嘢應該係由秘書我整架嘛」……相處咗成個月，我覺得佢都幾好人的，可惜……
第二大事
我又搬位坐啦！今次搬咗入房坐，其實個位幾好，起碼都似番一個位，有張四正的書枱，環境靜好多！自成一角咁，有一個屬於自己的小天地，正呀！可惜……
第三大事
可惜，我辭職啦！其實一路以來我都有轉 firm 的念頭，只是我仲未肯“的”起心肝去搵工啫！點解我要辭職？因為我覺得自己留喺度的 exposure 唔係好大，加上大家姐的緣故，令到我同老細之間多咗一道牆，久缺咗一份信任……再加上老細跟 counsel 的私人關係同工作完全 blurred 晒，分唔清呀，搞到我都唔知道究竟邊 d 嘢係由 solicitor 做，邊 d 係由 barrister 做，根本都唔道點先係一個 proper practice……，有時仲要幫佢做 d 唔係屬於呢間 firm 的嘢，最荒謬的係，佢要我幫佢影印一本成七百幾頁的書，好心佢就買咗本書佢啦……終於，我 send 信搵工啦，寄咗三封，得一間有回覆，in 咗一次就成事啦！感謝主！雖然我唔知新嗰間會唔會俾呢度更差，但與其喺呢度都係死路一條，倒不如走出去闖條新血路出來……我知咁做好冒險，但兩年的 training 時間好快就過，我唔想兩年後出來，咩都唔識，最叻只係做 203 a/c……
於是，我喺 13.4.05 辭職，我老細梗係意圖留我啦，又話加我人工呀……出奇地 counsel 話祝我前途似錦……因為我之前好驚咁，唔知點同 counsel 解釋，我只係講我想學吓其他嘢，出去見識吓……同老細和 counsel 講完之後，老細就叫我自己遞信給大老細，我當然照做啦！大老細話不如 internal shift 俾我跟第二個律師，講真嗰句，我真係好想留番喺度做，一來唔駛轉來轉去，二來呢間 firm 的 training 真係唔算差，但……呢度都冇 d 咩 internal shift 的習慣，如果突然俾我調，咪係人都知我同老細有問題？咪落晒佢面？況且佢同 counsel 不嬲都唔鍾意我同其他同事熟絡的，倘若我跟第二個，仲唔激死佢地，實鬧死我啦！所以，我先咁堅決要辭職啫。
第二朝 (14.4.05) 一早，我老細叫咗我入房，問我幾時 last day，又吩咐我唔好同佢 d clients 講，又叫我主力幫佢做 203 a/c……點知，過咗一陣，佢再叫我入房，話大老細唔准佢放我走喎 (因為我同老細簽咗份 training contract，需要有 mutual consent 先可以 terminate 的，所以我老細係要簽份 release 俾我先得)……拉鋸一輪，佢又叫我唔好走，話呢度咁好，俾我跟第二個，唔駛幫佢做喎。如果我應承佢，佢實知我係唔想跟佢先走啦，我咪話咁做對佢唔公平囉……咁佢就話，咁你留低幫我啦，最多我俾你幫其他律師做嘢，俾你跟佢地學嘢囉，我唔介意你問其他人的，你可以跟佢地上 court、開會……我真係一 d 都唔介意，但就一定唔可以俾 counsel 知，我都唔介意你同邊個熟……唉，我都冇講過係呢 d 原因，你自己一輪嘴咁講，講得出即係你介意啦，咩唔介意啫？況且我真係唔鍾意做事偷偷摸摸囉，有 d 咩係唔見得光呢？點樣唔俾 counsel 知呢？點解唔俾佢知呢？其實都唔關佢事，難道佢有份請我？唉，倘若將來我跟第二個律師上 court 俾佢撞到，咁點算呀？唉……
15.4.05 — 我就拎咗張 release 入去搵老細，打算俾佢簽，同時話佢知我都係決定離開。點知佢話要同大老細傾吓。放工的時候，我去問佢，佢話大老細唔俾佢 release 我，我問佢自己的意思係咩，佢就話：「我都係打工啫，話唔到事……」佢仲叫我自己同大老細講。
另一邊廂，臨放工前，我見 Sharon 走咗入 washroom 喊，唔知發生咩事，第二日朝食早餐問佢，佢又話冇事喎。
16.4.05 — 我咪走上去搵大老細傾囉，點知佢同我講，話呢 d 係我同 Ms. Leung之間的事，唔關佢事，又話，Ms. Leung 話我唔尊重佢，事先冇同佢講我辭職，就 by-pass 咁走去大老細度，而大老細就話我喺佢面前作故仔呃佢喎……唉，好冤枉呀！我梗係有同大老細澄清番啦！雖然我唔知究竟係邊個喺度講大話，大老細 / 我老細，但嗰刻真係好驚呀！嚇死我呀！
臨放工前，我就走去問老細，我應該點做佢先肯 release 我，佢都係話唔到佢話事……我再同佢講，話大老細叫我同佢自己搞掂佢，唔關大老細事，佢就話個版本跟佢的唔同，要同大老細再傾傾喎……
17.4.05 — 找來一個律師朋友和 Teresa 傾計，個人冇之前咁緊張，輕鬆咗好多！感謝主！賜我一班支持我，鼓勵我的朋友，最重要的係家人！感謝主！
18.4.05 — 放工前我又同老細傾，佢今次冇再話係大老細唔准佢 release 我，只係不停咁問我點解要走，又話唔明點解我要走……又話我就咁走咗去，係唔啱的，因為份 training contract 係兩年的……唉，講來講去都係嗰 d，我都話我想出去見識吓咯，都係想等你好落台啫，唔通你想我爆大鍋咩？最搞笑係佢問我係咪受人疏擺，又問我父母知唔知呢件事……唉，你估我係三歲細路哥咩？咩都要得父母同意呀？仲有呀，我冇咁易俾人影響到架！唔怕同你講，我父母非常支持我的決定，因為你同 counsel 實在太怪啦！私人生活同工作完全 blurred 晒，又成日偷偷摸摸咁，唉……最後佢叫我打電話俾 counsel，問吓佢的意見喎，又話佢會簽份 release 俾我，但就唔可以俾 counsel 知……唉，咩都係 counsel 的意思……
咁我都唯有照做，打電話俾 counsel 啦，counsel 一來就話唔關佢事，又冇同我老細傾過，但佢講的嘢同老細講的一模一樣，又問我係咪受人疏擺，仲指明道姓咁問係唔係受 tony au 個秘書疏擺喎……哈，真係搞笑，人地由始至終都唔想我走，不停咁勸我留低，你竟然咁樣屈人地……唉，其實我真係唔係咁開心，我同邊個做朋友，你們唔可以去管，仲要成日喺我面前話人地唔好……唉，我唔知佢地好唔好，但你唔鍾意人地，點解要我都唔鍾意人地呢？人地又冇對我做過 d 乜……
跟住又問我父母知唔知，又話好驚訝佢地會支持我的決定 ，仲搞笑到話要約我父母食餐飯，傾吓計，諗諗有咩方法去氹我老細簽份 release 俾我喎……真係搞笑，你話約就約？我媽咪話唔希罕同你食飯，爸爸話俾錢你去買本書，唔駛自己影印喎……
更更搞笑的係，佢話我事先冇同 Ms. Leung 講就向大老細辭職，我咪話當日我係同兩位大人傾過先遞信囉，佢就話：「你呢個唔係 discuss ，而係 unilateral declaration……」哈，咁都得，果然係大狀，咁都俾你諗到，好嘢！哈，咁之前究竟係大老細講大話定我老細講大話呢？大家自己估吓啦！
哈，完全係互相扯貓尾……唉，我都費事理你們呀！不過，好來好去，話晒兩年後，我仲要你幫我簽份 Form 4 先可以 admit 的……that’s why 我唔想爆大鍋囉……
19.4.05 — 我去咗簽約呀！好彩嗰邊願意讓我六月先返工，原本佢想我17.5.05就返工架，感謝主！希望快 d 解決件事啦！求主垂憐！
之後，大家都冇乜點討呢件事，因為我 assume 老細會簽俾我！hehe…不過，到今時今日，老細都仲未簽俾我，但我相信佢肯簽的，希望係啦！求主垂憐！
唉，我又轉 firm 啦！希望我可以喺下一間 firm train 埋餘下的時間啦，轉 firm 轉得多，真係唔係咁好架！求主帶領，賜女兒智慧、忍耐、力量去面對未來的挑戰！
*********************************************************************
23.4.05 — 去咗睇《籍著雨點說愛你》，套戲都 ok 好睇的，女主角竹內結子好靚女呀！
25.4.05 — Loretta 約咗一齊食 lunch，話 Diana 都會來，但結果冇來到，又聯絡不上，咪我同 Loretta 撐枱腳囉，good 呀！
26.4.05 — 大件事！下午三點左右，Ms. Leung 叫我幫幫 Sharon 影印一 d 文件，我去問 Sharon，佢話差唔多完成啦，話唔駛幫手喎。到 4 pm，老細問我整好未，話 urgent 喎，我話 Sharon 話唔駛幫手喎……但我見 urgent 咪去問吓有咩幫到手囉，都係幫手排次序咁，整好咪俾 Ms. Leung approve 囉。講真嗰句，我事前都唔知發生咩事，因為老細喺我辭職後，都冇俾我去跟呢個 case……原來係想明天出個 summons，咁就大件事啦，因為 counsel 份人好性急架，你一定要立刻幫佢完成佢要你做的先得，原來當天早上 counsel 要 Sharon 影印文件，但就搞咗好耐都未得，所以下午老細叫我幫手。到 5 pm，要拎 d 製成品去 counsel 度，Ms. Leung 趕住出去開會，只吩咐我要睇住 Sharon 影好 d 文件，然後叫 Sharon 拎去俾 counsel。點知 counsel 打來催，仲同 Sharon 講：「我信你唔過，你叫 Sabrina 夾住你過來啦」……原本諗住 Sharon 可以代替我過去，點知結果都係要我一齊去……在等的士途中，Sharon 已經話一定會俾 counsel 鬧，但我話唔會的 (因為我唔知原來佢搞咗成日先整好俾 counsel)。
過到去，counsel 真係鬧，都唔係鬧的，教訓囉，講 d 唔係咁好聽的說話，我覺得有少少人身攻擊囉，又話唔鍾意就辭職喎，又話佢連累我喎，因為我都唔做咯……不過，因為件事完全唔關我事，我純粹係陪坐，但就要幫手整好份 summons 佢，我相信 counsel 要我去係想我緩和一下個氣氛，亦同時教訓一下我咁啦…… counsel 一行開，我就同 Sharon 講：「千祈唔好介意，佢係咁的，唔好介意……」。Counsel 又話 Sharon 已經唔係第一次做錯嘢，上次俾 Ms. Leung 話完就喊，好唔啱喎……原來，佢上次喊係因為俾 counsel 和 Ms. Leung 鬧。
走的時候，我問佢頂唔頂得順，佢笑笑口咁話：「頂唔順咪辭職囉！」吓？唔係卦？我叫佢唔好嚇死 Ms. Leung，佢又問我去邊間做，哈！我諗佢有少少明白點解我要走！其實，我之前都冇同佢講我會走，係 counsel 爆出來的，哈！
哈，希望 Sharon 頂住，唔好走啦！
27.4.05 — Loretta 打來問我有冇搵 Diana，話搵唔到佢，唔知佢發生咩事。我話佢會唔會去咗旅行？ Loretta 話應該係下個星期先去，所以約今個星期一食飯，哈，我唔知呀！你約 Diana 的，我唔知你兩個點溝通……
另外，呢日係秘書節，tony au 發起 22/F 的律師請大家食 tea，多謝晒！而我就買咗盒朱古力俾 Sharon，其實我係見佢尋日俾 counsel 鬧，想氹佢開心的，只係咁啱呢日係秘書節啫！
29.4.05 — 終於打到俾 Diana 啦！佢話佢真係去咗旅行喎，我同佢講話 Loretta 好緊張，搵極都搵唔到佢……哈，真係搞笑！第二日，我就約佢兩個 5.5.05 食 lunch，我諗今次大家溝通得好清楚，到時見！
*********************************************************************
想買部 mp3 呀！我睇仲咗 Samsung 的 MT6V，因為佢有綠色，和用恒生咭喺 Broadway 買有折！星期一晚走咗去買，點知冇晒綠色，好唔開心呀！結果就資助咗細佬買咗一部銀色，仲叫佢幫我問吓第二度有冇綠色……希望有啦！如果唔係，我就要俾多幾百元買部 T6V 的綠色啦，功能差唔多，細部一 d，連續播放時間短 d，但要俾多 d 錢喎……都係考慮吓先……
*********************************************************************
緊急呼籲！請大家立即到
http://www.hongkongdisneyland.com/ 登記做會員，然後喺 14.5.05 晚 8:30pm 睇翡翠台的《睡公主》，數吓入面出現過幾多次米奇標誌，然後參加遊戲，抽中可以免費得到 4 張 disney 入場門票！如果大家唔想玩，又唔介意去登記的，可以俾個 login name 和 password 我，等我幫大家玩，hehe，多 d 人參加，多 d 機會贏呀！贏咗梗係要預埋我一齊去玩啦！hehe，請多多幫忙！多謝晒！
