喺呢個幾禮拜裡面，亞珍的惹笑指數不斷上升，真係想笑死我們咩？哈哈……最經典的都係 “The Gap is BIG!” 和 “媽咪事件”。
經典一：
話說有一日 lunch time 之後，Jimmy 問我叫咩中文名，講完之後，Tony Au就講笑咁話：「你要記住，係秀華，唔係華秀」，我、Teresa和 Jimmy 都唔明白佢講緊乜，佢就繼續講：「吓？華秀都未聽過？狼過華秀隻狗喎……」我們依然唔知佢講乜，亞珍就搭訕話：「吓？咁出名的典故，你們都唔識？唉，冇計啦，你們冇讀過文學」，再跟 Mr. Au講：「唉，我們同佢地有 generation gap 架。」哈，我們經已忍住唔笑啦。跟住 Tony Au就問 Kenix知唔知“狼過華秀隻狗”點解啦，連 Kenix 都話唔知，哈哈……亞珍就突然彈出一句“The Gap is BIG!!!”，佢仲要係好強調咁講喎，哈哈，我們都真係忍唔住啦，立即爆笑，而我同 Teresa就笑得最大聲，“卡卡聲”笑……哈哈，連 Kenix 都忍唔住喺自己個位度偷笑……哈，我就笑到肚痛咁講：「obviously」，哈哈，真係想死呀！哈哈，我知我們有 gap，咁點丫？都唔駛提醒我們個 gap 好大卦，哈，知唔知咩叫“崩口人忌崩口碗”呀？哈哈……老老實實，佢一味喺度話係 d 咩文學典故，但就一路都講唔出點解，和個出處係咩。哈，Kenix 上網 check，知道呢個係一 d 俗語，形容人地好狼咁解的。亞珍聽到我們喺度討論緊個解釋，搭訕咁問點解和個出處……哈，你又話你識？ 我同 Kenix都覺得文學典故唔會咁俗的，我就串吓亞珍的“典故”話：「咁典故的定義都好廣泛的」，點知亞珍收唔到，仲好認同咁話：「呀，小師妹講得冇錯，典故的定義係好廣泛的」。我返到屋企問讀文學的細佬，佢都話冇聽過，哈……麻煩唔好吹得就吹啦……定係我們個 gap 真係咁 BIG？！
經典二：
話說之前喺 Christmas party 度我同 Brian 影過幅相，佢地取笑 Brian 係我 daddy，咁我們好順理成章咁就互相稱呼對方為 daddy 和女女啦。有一日我發現 daddy 剪咗頭髮，我就好奇咁問：「咦，daddy 你幾時剪頭髮架？」daddy喺度諗緊係幾時剪時，亞珍就彈出一句：「乜佢 (即我) 叫你 (Brian) daddy？咁你即係對我唔好啦？」我同 Brian 都呆咗一呆，哈，我真係唔識俾任何反應，講真呢個又唔知係 d 咩 logic 來的，點知 Brian 就鬼馬咁話：「咁你 (亞珍)可以做媽咪架」，哈，我立即變臉，對住 Brian做口形咁話：「唔係卦」，但我都要幫手打完場，講一句：「我唔介意架」，哈，亞珍就好大反應咁話：「你梗係唔介意啦，我介意呀」，哈哈，真係唔衰攞來衰，唔好咁八卦，咁多嘴咪唔會俾人笑係媽咪囉……亞姐，我媽咪好過你好多架，想我做你個女？咪駛旨意呀！！
經典三：
又有一次，亞珍同 Mr. Au 喺度傾緊計，講緊 Mr. Au同邊個邊個打過 golf，咁佢個秘書Janice就插嘴澄清咁話：「請大家知道，真係好耐好耐以前的事」，因為佢想取笑 Mr. Au好耐冇打 golf，咁 Mr. Au就走埋去 Janice 度作狀要勒死 Janice，見到佢地咁玩，大家都覺得好搞笑，而 Mr. Au 就笑到唔知自己講緊乜，我們就繼續喺度笑佢兩個，點知亞珍就突然拍枱再指住 Mr. Au話：「我係 judge，continue」……哈哈，真係搞笑，你冇嘢呀？話自己係 judge？哈哈……犀利！
*********************************************************************
哈，算啦，唔想好似喺度講是非咁，哈，不過，真係好好笑呀！！
講吓其他，上星期六 lunch 同同事去咗“和民”度食飯和吹水，食到五點就四散，我就返金鐘會合媽咪參加去菲律賓的茶會啦，冇乜特別，聽咗幾個字咁大把就散會，我們就去咗百佳買咗 d “叮叮” 嘢返屋企食啦。
星期日返教會，上返個好耐都冇上的主日學，今次講到閱讀。好慚愧地，我冇閱讀的習慣，所以我份人好“枯”，哈，真係要“的”起心肝去搵 d 自己有興趣的書來睇吓，慢慢培養一個良好的閱讀習慣！
星期三晚原本會同同事唱 karaoke，順度 farewell Grace (屯門秘書)，但因為一 d technical problem，我冇去到，變咗同媽咪行街。希望下次有機會去啦……今日 (星期六) 就係 Grace 的 last day啦，我們影咗好幾張相留念。雖然大家識咗唔係好耐，但我真係好唔捨得你呀，你記得得閒就打俾我，約吓我食飯啦！最緊要係新年的時候，你要派利是俾我呀！！hehe……
星期四 lunch同老細約咗 HAB d 人去鏞記食飯，真係食到捧住個肚返去呀！味味餸都好好食呀！我最鍾意就係個新鮮出爐芝麻饀的煎堆啦，真係好好食呀！Yummy！！個蛋撻都好好食呀！正呀！
星期五就係 Jimmy 的 last day，轉眼間，Jimmy都喺度一個月啦，下星期六佢就要返澳洲繼續學業啦，都係嗰句，雖然大家只相處咗一個月，但你要離開，我們都好唔捨得你呀！下次返來香港，記得搵我們呀！或者再來呢度做 summer student 丫！仲有就係 keep 住 icq 聯絡呀！而尋晚我、Janice、Teresa、Patty就請 Jimmy 食飯啦，喺 PP的 Dan Ryan's 度食，又係食到捧住個肚走，都係好好食呀！下次一定要試埋個 Molten Chocolate Cake先走呀，我們又吹水吹到成十一點幾先走。Jimmy帶咗相機同大家影相，喂，記得 send 返 d 相俾我們呀！喂，星期一 (年廿九) 去澳門茶餐廳食飯，之後再去行花市呀！一齊來丫！
文章定位：
