我之前成日喺度講自己有幾唔鍾意個秘書，又話佢係全公司的公敵，哈……感謝主，喺上次佢向我攤牌後，大家的關係和諧咗，可能係因為佢知我唔鍾意佢咩都奉旨咁、又咩都扮晒大家姐咁，所以佢收歛咗，而我亦都唔想大家的關係繼續僵持落去，所以大家都客客氣氣，互相尊重，或者係大家都開始搵到一個適合大家的相處方式卦……感謝主，我冇咗早前的怨氣，真的希望自己能喺呢間 firm 好好地 train 足兩年，把握每個機會去學習。我唔介意由邊個人來教我，不論佢係老細、秘書、或者 filing clerk，我來呢度係學嘢，只要係學到嘢，教到我的，我唔介意佢係何方神聖，我要求互相尊重，我唔需要你來奉承我，你亦唔好奢望我會奉承你……我只希望大家能合作愉快，將件事辦好便好！！親愛的主，求祢賜女兒諸般的智慧去應付工作上的一切試煉，都叫女兒能活出主的樣式，做個活信徒，求主使用我。
咁我呢排又有咩搞作呢？都冇乜特別，日日如常咁返工，做返放低咗好耐冇做的 OR，主要係因為 Jimmy 做咗 d 203 a/c，我要睇過先可以出街，咁我咪順手 reply 吓 d 十年都未 reply的信件囉……
13.1.2005 — 係靚女秘書 Janice的生日，佢唔想大搞 (因為佢唔鍾意某 d 人)，所以當日 lunch就只有我、Teresa、Patty 和 Jimmy 一齊出街食飯。Tea time 就梗係有生日蛋糕啦，係 Tony Au 買的，真係好羨慕呀！希望出年生日，我老細都會買生日蛋糕俾我啦！最好的就梗係好似 Tony Au咁，又請食飯，又買生日蛋糕、又有利是收啦！！哈哈，我好貪心呀……而當晚的例會，Jimmy 都有出席，完咗之後，我問佢感覺如何，佢就梗係話幾好啦，但就問我們點解唔講嘢喎……哈，有咩好講喎？？呢晚都收到個好朋友的一個好消息，恭喜晒！祝福你！
14.1.2005 – 呢日係我第一次上3 min. summons，不過唔係幫我老細，而係幫 Ms. Ip，因為佢個 trainee 張 training contract 未整好，而佢自己又有另一個 trial，所以就搵我頂上。哈，我從來都冇去過睇 3 min. Summons，突然要我自己上，真係好驚。之前一日就問清楚老細 d procedures係點，又睇晒個file。唔係 d 咩特別嘢，只係我們申請 cease to act 啫，hehe，但未試過，真係好緊張。當日，10:15am我就走過去 high court 度睇吓個形勢，都感受吓個氣氛。感謝主，都叫做順利！未試過，真係唔識，所以真係要俾心機去學。跟住 lunch 就同維他和拉架仔食，都送出咗兩份 Christmas & new year 禮物，hehe，遲來的禮物，請不要見怪，小小心意，希望你們鍾意。
15.1.2005 – LMC 的同學來咗屋企打邊爐，真係好耐都冇請人來屋企玩啦，好開心！真係好開心！雖然只係得十人，但都夠啦，我間屋容納唔到咁多人……嘻嘻。當晚，我們只係玩到 12點度就四散，唔再好似以前咁喺我度玩通宵，哈，冇計，人老啦，要瞓覺呀！！下次再玩過啦，呀，下次要影多 D 相呀！！期待下次的聚會。
16.1.2005 — 哈，瞓到成點先起身，正呀！真係好耐都冇瞓到咁晏，嘻嘻，之後就出荃灣行街。主要係去 Mastina 拎番 d 改好咗的衫，點知喺愉景新城食完嘢之後，行過周生生，見到 d 米奇老鼠的裝飾，就好奇咁走咗入去……哈，出事啦，咁就買咗一套三件的米奇手飾：耳環、吊墜和介指啦……嘻嘻，真係大件事，要節制吓先得啦……
哈哈，講返轉移目標丫，今期 office 至紅的唔係我個秘書，而係另一個 trainee。哈，佢擺款、扮嘢、冇禮貌……呢 d 缺點真係仲犀利過秘書呀！佢仲要對自己個老細都咁冇禮貌，真係好嘢！真係登 Ms. Ip 同秘書Fion 慘呀！講真，佢又冇對我咩，只係佢 d 態度好差。最搞笑係，佢成日走來食我 d 香口珠，食晒咁滯，成日話買番俾我，都係得個講字，我唔係話小家到要同你計較，但你都唔好咁假囉。星期四 (20.1.2005)晚，佢又就來食，猛話唔好意思，因為自己嗰 d 食晒，又成日唔記得買返俾我喎，唉，我咪叫佢買返 d 返來 refill 囉……點知佢話：「咦，係喎，我聽日去買，邊度有得買呀？屈臣氏有冇得買呀？」哈，好嘢，自己買俾自己就識買，叫你買返來大家食，你又唔識，好嘢！！第二朝見你食返自己嗰 d，即係你買返俾自己啦，哈，又話唔識買？只係唔想買啫……雖則你lunch time 返來買返俾我們，仲堅持放喺我度，但真係唔好啦，費事你以為自己買的，成日走來食，又唔知我們見食晒，就自己夾錢買番……唉，仲有好多令我睇唔過眼的嘢……
唉，好討厭呀，討厭自己對人諸多批評，可以少 d 批判，多 d 去欣賞人嗎？主呀！求祢叫女兒去愛身邊所有的人，少說話，多做事！求主垂憐！
21.1.2005 (星期五) 晚諗住同媽咪出街食飯，點知喺臨放工前收到對家的一封信，我們就要連夜諗計覆信，唉……我當晚十點幾離開公司，就過尖沙咀找肥仔，因為佢喺嗰邊“飲”。點知佢要載埋 d 人返屋企，我們要成十一點幾先返到屋企，我當晚只係食咗差唔多半磅栗子做晚餐，同 Teresa 玩 icq 傾到點幾，沖埋涼成兩點先瞓……唔知係咪太夜食栗子的緣故，第二朝起身，個胃唔係好舒服……嘻嘻。
22.1.2005 – 老細差唔多一點先叫我搵 cases，點知個 website 又有 d 問題，IT partners 又來裝 scanner 和colur printer，仲要係用我部機來做主機，d電線喺我腳前，真係討厭，我踢甩d 線，唔好頼我呀！搞到我想放工又放唔到，成 1:40pm 先走，好唔開心！好彩，之後同 Teresa 和 Kenix 去咗中環「天與地」食飯和吹水，當堂開心好多。之後，四點幾就約咗個 friend 睇《The Phantom of the Opera》，點知 IFC d tickets冇晒，只係得返星期日的 tickets，結果我們去咗荃灣 Broadway睇七點三嗰場，好正，真係好好睇！怪不得，Teresa 睇咗兩次，Kenix 睇咗一次，都仲話好想睇，因為真係好好睇！
今日 (23.1.2005) – 返教會，一心又係諗住返主日學，點知都係取消咗，之後去咗剪頭髮。三點幾返到屋企，就即刻睇尋日搵的 cases，再向 Ms. Leung 報告，到咗五點幾、六點，終於都可以停落來啦……感謝主！
*********************************************************************
人大咗，老咗，需要面對生離死別的時間多咗，雖然內心好傷痛，但 C'est La Vie，this is life，我們唔能夠阻止呢 d 事發生，人真係好渺少，唯有主，祢掌管萬有，求祢安慰我們，賜我們勇氣去面對將來，求祢叫我們能珍惜在世的日子，盡力的為主侍奉，願祢的旨意成全，阿們。
*********************************************************************
初一至初四，我會同屋企人去菲律賓旅行，要請半日假，又冇開年雙封利是……嗚嗚……但，真係好耐都冇試過一家人去旅行啦，又未去過菲律賓喎，可以去走走，抖抖，都係件好事，求主帶領女兒一家的腳步，賜我們一個平安和愉快的旅程！
文章定位：
