過山車？
今個星期同秘書姐姐的關係好似坐過山車咁，有起有落。星期一和星期二的上午都冇嘢，大家有講有笑，但之後幾日至星期五下午茶前就喺度冷戰緊。到星期五下午茶後又冇乜嘢啦……不過，有一樣嘢我可以好肯定咁同大家講，我真係好唔鍾意秘書姐姐，因為佢係一個是非精、扮晒大家姐、霸道，成日點人做嘢好似“老奉”咁、多嘢講，但又少做事、成日將自己 d 責任講成係人地的責任……好討厭，真係好討厭！
不過，我都唔會同佢硬碰，佢只係一個秘書啫，學我老細就上星期我被 reception擺上枱時話齋：「大家級數都唔同，reception 之嘛，而你兩年後就係律師啦，冇必要同佢嘈……」哈，唔同級數真係唔同級數，秘書姐姐和 reception一樣，都係咁短視，唔識睇遠 d，你們唔俾將來我做你地的老細架？
話說老細接咗奧委會個 project，要 draft 幾份 agreements，個 client 本身有幾個 samples 俾我們 for reference，咁上星期五老細叫我睇咗五十幾份 licence / lease agreements，然後整個 summary 出來。星期六秘書姐姐就走來同我講話要打好 d agreements 俾老細睇，之後先整 summary，咁我咪話我負責打 licence & lease呢兩份 agreements，而秘書姐姐就負責打其餘兩份囉。到放工的時候，我只係打得起一份 licence，咁我咪同秘書講：「我會帶份 lease 返屋企打，因為我覺得喺公司打好嘥我時間。」其實，我講呢句說話冇乜特別意思，唔係串秘書姐姐，只係我覺得喺公司度，我可以做 d 更有意義的嘢，例如睇吓 d agreements，做吓其他 files，rather than 喺度做埋 d 唔駛用腦的 clerical work。佢聽到我話帶嘢返屋企做就話：「我真係佩服你同 Ms. Leung，成日拎嘢返屋企做，我就一定唔得，放工就唔可以做公司嘢。」
星期一佢問我 d agreements 打成點，又問我喺屋企有冇打到，我話我打得一半，佢就話：「我屋企部電腦呢個 weekend 壞咗呀，所以都打唔到……」真係離晒大譜，你根本就冇拎過番屋企打，亦冇咁諗過，你講乜鬼電腦壞咗啫，扮晒嘢！隨即就叫我打完份 lease ，就要打埋份 security和 general management 的 agreements。我死都唔肯，就話要做埋個 summary 先，佢就問我要用幾多時間，話如果個零鐘頭整好，就整咗先，唔係就要我打埋嗰兩份 agreements 佢，話要俾 Ms. Leung 睇咗先喎……我死都唔肯，堅持要整咗個 summary 先，仲叫佢快 d 去打埋嗰兩份嘢佢，大家同步進行，最多之後我整完幫佢打d 。可惜，我喺電腦度就完全睇唔到佢有繼續打，佢一心就諗住做慢 d ，留俾我打。其實我最唔順氣的係當日要幫佢買早餐和佢將自己責任幻化成我的責任。結果，星期一的上午，我就負責打好份 lease 和 edit 埋份 licence & lease；而下午就睇嗰五十幾份 licence / lease 去整個 summary。
到咗第二朝，佢又走來試探我，問我整好個 summary 未，我話整好咗，但就要核對多一次。我再話我第二日 (星期三) 放假，佢就話：「你聽日放假？你今晚唔知要放幾多點呀，奧委會嗰邊催我們交嘢啦……」我毫不猶豫咁話：「咁你想點丫？」佢就話：「冇，我講聲你聽啫。」就係咁，我死都唔肯幫佢打，即使對完個 summary，做其他嘢都唔肯幫佢打，佢就開始反面唔啋我啦……
哈，你真搞笑，我返工三個幾月以來，你已經係第四次咁樣對我 (仲要次次都係你自己小器，我完全冇做錯嘢的)，之前三次我都有去花時間去氹吓你……可能你都諗住今次我都會咁做，可惜……你當我透明，我都當你透明，繼續同其他同事嘻嘻哈哈……不過，你真係好 cheap，喺老細面前話我冇嘢做，你一定喺老細面前講我好多是非，cheap 精。最搞笑的係，星期四晚放工時，老細問我係咪冇乜嘢做，要俾多 d 嘢我做，又話我唔可以只係做 OR d 嘢，要做吓其他。咁我咪話，我都唔想做呢 d，你最好俾其他嘢我做！哈，咁好明顯個是非精喺我老細面前話我做 OR 都唔幫佢打份 agreement 啦！我真係好嬲，返到屋企同媽咪呻，忍唔住閙個秘書做“八婆”，仲要唔止一次，不停咁話佢係“八婆”！我都不以為然，媽咪就話：「亞女我都知你真係好嬲，因為我從來都冇聽你閙過人做八婆……」哈，我都唔留意到，但秘書襯得起呢個名有餘呀……
但大家要知道，喺上星期四我要跟個 counsel 出去上 court時，個秘書唔想我去，就同我講：「 d OR 要做架啦，要呢一兩個禮拜做晒佢。」點知今個星期我去做啦，唔幫你打嘢，你就向老細篤我，話我好顧住做 d OR 嘢……哈，真係離晒大譜！你個 cheap 精，將所有 OR 的 files 都掟晒俾我，自己又唔做，咩都推晒俾我，我唔做，又話我唔做，我做啦，又話我好去做……你真係 cheap 得緊要！好討厭！所以我都唔怕你，你俾面色我睇咩？我咪眼尾都唔望你囉，咩都直接搵我老細，唔駛經你呀，懶巴閉，咪以為自己真係大家姐得架！我俾面你，都係因為我老細咋！你估我真係怕咗你呀？
所以我話你 cheap 就真係 cheap，星期四 lunch 時，你話要落街買嘢，問其他人要唔要，你喺我面前問晒所有人，都唔問我一聲，你話你幾 cheap 丫！(雖然我都唔駛你幫我買) 你估我好介意你唔啋我？好驚你以後都唔啋我？其實你咁做，都係想我同其他人知你嬲咗我啫！俾面色我睇丫嘛，你估我仲咁得閒去氹你？你以為自己係邊個呀？
我就唔同呢，大方得多，星期五大師兄請食下午茶，我去問 Ms. Leung 要咩，順路咪問埋你囉，學似你咁小器！唉……不過都要多謝大師兄，唔知咪因為我問佢飲咩，佢就冇再嬲我，仲叫我食蛋糕o忝！
唉……雖然家吓冇乜嘢，但我就真係好唔鍾意佢！講是非多過做嘢的，咁 d 嘢就梗係做唔切啦。我同我自己講過，我要同你分清楚，我只會做番自己責任的嘢，我唔會做其他 stupid 的 secretarial work，亞姐！我係 trainee 來架，我來學嘢架，唔係來做 secretary 架！唔該你唔好再踩埋來呀，我會咬人架！咪以為我靚妹仔就好好蝦呀！
其實我真係諗唔明，唔明點解秘書會咁鬼 stupid 的。明知我兩年後就係一個律師，雖然你經驗俾我高，但兩年後我都騎過你啦，你點可以咁短視咁，當正我係妹妹仔咁睇住我來蝦架？你又鍾意將自己的責任演變成我的責任喎。坦白講，我都幾欣賞一手包辦的感覺， draft 信係我，打的係我，連出信都係我，fine，冇問題，我咪當學多樣嘢囉。咩都係我一手一腳咁做，你一係話唔識，一係就話唔得閒，一係話呢 d 嘢我都要識，叫我自己做……哈，冇他的，我自己搞得掂，都唔駛你幫手，或你根本幫唔上手，喺我心目中你咩價值都冇，咁我要你來做咩呀？仲叫我第時請你做秘書喎，你真係慳 d 啦！唔駛旨意呀！我一定唔會請你呢 d 吹水多過做嘢、鍾意講是非、挑撥離間、小事化大、懶散、扮大家姐的人架！
唉……激死人呀！討厭、好討厭呀！不過，我都真係要小心 d，費事俾你捉到 d 咩錯處就發大來講，喺老細同其他人面前唱衰我咪弊？我要少說話，多做事，好好珍惜呢兩年的實習機會，求主帶領！
**********************************************************************************
講番 d 開心嘢先，星期三畢業禮，初時以為冇乜同學會參加，因為舊年 PCLL只有兩行的人出席畢業禮 (得十幾人) ，但今年我們就坐滿五、六行，真係開心！仲有一隻新的米奇老鼠畢業公仔 (佢件袍的色好似我今年件袍架！)，仲有一紮好靚的花呀！多謝爸爸和媽咪！
今日返咗學校同細佬影相，下星期日就會同雲姑姐喺教會影、同穎雯喺 Gold Coast 影、同明叔佢地喺屋企影！ yeah！好開心呀！感謝主的帶領！我家吓就期待緊兩年後正式執業做律師的“執業禮”啦，加油呀，俾心機呀！求主帶領！
而另一件搞笑的嘢就係，星期五我去 high court library 影 cases 和 d laws ，當日 library 收 5:30 pm，到 5:25pm 我見自己欠少少嘢未影咪死留喺度，即使 libarian 叫我走我都話要影多幾張。5:30 pm 啦，我終於都影晒 d materials，點知個電源 cut 咗，搞到我張 octopus card 食咗喺部影印機度……結果要第二日朝去 library 拎番，哈！真係 high-tech！ 最搞笑係當日 lunch 我們叫 pizza 食同 Patty 預祝生日，夾錢時我俾晒 d 十蚊銀出來，當日下午就要同同事搜羅番兩程 $18.2 的車資……哈。
文章定位：
