今日下午六時發生咗一件事， admin要求所有 trainees、secretaries、filing clerks、 和個 reception開會。在下午知道要開會時，大家都心中有數，知道個 meeting 會講 d 乜。而我都有預感，件事係同星期一新來 messenger 單嘢有關，我亦覺得個 reception 對我的態度和之前相比唔係咁友善……
到了要開會的時間，admin 話今次係要講吓一 d 內部的事宜，隨即就話交由大老細個秘書 (A) 講。A 拎著一張稿，一開口就話：「有人的地方就有是非，不過希望大家聽完要過濾一吓，唔好聽到咩就信咩……公司冇地方，無奈要分兩層，希望大家唔好介意，要守望相助……」講到出信件的問題，就話如果唔係咁 urgent的，麻煩大家唔好用 BY HAND，改用 BY FAX & BY POST。因為公司人手不足，只得一個 messenger……再講吓 d 咩 stationery、聽電話的嘢，就轉問個 reception (B) 有冇咩要補充。
跟住亞 B 就好勞氣、好忟憎咁話：「我想澄清一點，我從來冇講過話唔俾個 messenger落廿二樓個 tray收信件，但唔知點解有人話我唔俾佢落去，我覺得講嗰個人要負責任……我咁聽返，我都係好忟憎……希望大家幫幫手，messenger 真係好多嘢做，麻煩大家上開來就拎 d 信上來……」
哈，好明顯佢就係講緊我啦！坦白講，我星期一當日只係將佢對我講的向廿二樓的同事覆述一次：我問亞 B幾時會帶 messenger 落廿二樓巡視吓；亞 B答暫時都唔會；我問咁我們要拎信上來要維持幾耐；亞B答唔知，仲話其實佢地係唔會落來收信，應該係廿二自己拎上來，只係以前個 messenger 落開去幫我們收咁啫，久而久之我們廿二樓唔拎，等佢地幫我們收喎……
咁亞 B咁講，我咪咁講囉。講句老實說話，佢真係冇講過話唔俾新來個 messenger 落廿二樓收信喎，佢真係冇咁講過，我唔會屈佢！！但點解家吓個版本係咁呢？首先，究竟係邊個同佢講呢 d 嘢呢？照計我們廿二樓的秘書和 trainees 都算醒目，唔會喺卅二樓的人面前亂講嘢丫，即使大家都為一 d 卅二樓的事呻過吓。
第二、咁究竟邊個喺度歪曲事實呢？定係亞 B 喺度加鹽加醋呢？
哈，我真係唔想知！由佢囉，我問心無愧，廿二樓的都聽到我當日點講，絶對唔係亞 B今日講的咁，咁就得啦！我唔知佢話要負責任係咩意思，要我 say sorry？對唔住，我冇做過，我係唔會認的。今次咪同你啃咗隻死貓佢囉，但你要知道，人的容忍係有限度的，你咪再踩過來呀，我唔想有一日我頂唔順走去同大老細投訴你呀！
講真我冇必要跟你一般見識，都冇必要同你硬碰硬，你鍾意玩針對、玩排斥、玩分化係你的事，唔關我事，我做好自己本份，真係唔得閒理你呀！正所謂：「謠言止於智者」。我來呢間 firm 係因為我要做 trainee，兩年後做律師，留喺呢度做最多都係兩年的事。倘若兩年後真係留番喺度，而你又仲係 reception 的話，你估你仲有d咩聲出丫啦？你估你好巴閉，我唔怕你架！
講真，呢件事我真係有 d 唔開心，大佬我都係人嚟架嘛，你咁屈我，我梗有 d唔開心啦！不過都真係冇乜嘢，我隔離個秘書問我有冇事，叫我唔好唔開心，又話其實唔關我事，因為今次個矛頭係指向我個秘書 (坦白講，我一路都知我個秘書和卅二樓 d 人係有心病的)……唉……我唔想理，都唔會理。多一事不如少一事！
回想起兩年前喺 HKU SPACE度做 summer job 的時候，我都曾經被屈食死貓。當時我感覺好委屈，返到屋企仲喊咗出來o忝……哈，對比今日的我，我真係冇嘢，睇清楚 d 人囉，睇清楚間 firm 的 admin / management 喺處理問題的時候做得幾“好”囉！！哈……經一時、長一智，以後有咩盡量都由自己去解決啦，冇謂掀入我個秘書和卅二樓 d 人的是是非非當中啦！
感謝主的帶領，多謝祢賜我平安，多謝祢叫我冇發脾氣，感謝主！我知家吓和卅二樓的同事的關係頗為緊張，希望時間可以沖淡一切啦，話晒都一場同事，無謂搞到個局面咁僵丫！不過，呢 d 嘢我控制唔到，求主帶領，我冇能力去改變任何一個人，惟有主祢可以，求祢照祢的意思去改變我們，求祢賜女兒智慧去面對和應付呢件事和未來的人事關係，願祢的旨意成全。過去的事由佢過去，我要展望將來！求主帶領！阿們。
文章定位：
