都有兩個星期冇寫 diary 啦，其實真係好想寫多 d，咁就唔駛一次過寫成兩星期嘅嘢，搞到都唔知有冇寫漏，又怕大家一時間消化唔來，但我又真係好攰……真係心有餘，而力不足呀！所以惟有辛苦大家，俾多少少時間，慢慢去睇……
呢兩星期的工作都算係咁啦，每一日都係埋頭咁做，冇乜新突破。最大的突破就係打咗一次電話俾 Mr. Woo，搵佢教我做 P.I. 的procedure 囉……雖然 Mr. Woo 真係好長氣、脾氣又有 d 怪、難服侍、成日小事化大，但佢又真係幾有料的，喺佢身上真係學到嘢！多謝你，Mr. Woo，我會俾心機、虛心去學，但請你高抬貴手，不要嫌我蠢，學得慢就好啦！雖然秘書唔鍾意我搵 Mr. Woo教我 ( 因為佢知 Mr. Woo錫我，而佢同 Mr. Woo的關係又喺較早前破裂咗，所以佢更加唔想我同 Mr. Woo 有咁多接觸 ) 雖則我都覺得可免則免，但我覺得真係學到嘢的，就梗係要好好把握啦！我真係想學嘢架嘛！我呢兩年就係要學嘢架嘛，唔通等兩年後，做律師時先去學咩？搵邊個教呀？
唉，真係對唔住！面對秘書，我真係冇法客觀咁去面對佢，因為佢真係幾討厭！名副其實的“念精學懶”……唉，真係好討厭！就好似上星期咁，執 medical receipts、medical certificates 明明應該係由一個秘書去做，排好 chronological order，打個表出來，但你偏偏就唔肯去做，咁老細咪搵我去做囉。我做完個表出來，老細要你影 d medical receipts 和 certificates俾對家傾 settlement，你就走來問我有冇影到，亞姐，如果係影咗的，老細都唔叫你影啦！最離譜係你話：「不如等我影完，俾你對吓，睇吓有冇影漏丫」……你都痴線的，家吓 table 都幫你整埋，你咪拎住個 table 對，睇吓有冇影漏囉，咩都叫我做，咁你做咩呀？不如乜都唔駛你做，我幫你做埋，竇埋你份人工丫！哈，我梗係唔肯幫佢對啦，咪一句“得”埋去話：「駛乜啫，你咪影完拎住個表去對囉，好易啫！」跟住就轉頭走返去個位度做嘢啦！都真係唔知佢有冇病的，成日話自己好忙，但又咩都“卸”晒俾人做，我真係唔知你忙 d 乜，其實你吹水多過做嘢，d 嘢梗係做唔完啦！
仲有，佢成日用 d 責怪的語氣同人講嘢，真係聽見你把聲都覺得討厭呀！話說有一日 lunch 的時候，大家喺度傾計，我聽唔到你講的一句說話，咪問你講咩，想你講多次囉。點知你就一臉寸樣咁話：「多事」，哈，我都唔執輸咁回應：「好，你以後有咩都唔好問我。」笑死我隔離個秘書，仲叫我唔好咁寸，我只好回應一句：「睇吓對邊個啦。」哈，佢見我黑晒口面咁，之後不停撩我傾計，哈，真係荒謬！講真，我知佢喺度講笑，但我真係頂唔順佢呢 d 不論喺咩時候都要扮大家姐的衰款，真係好討厭！
跟住就要跟大家溫一溫書啦！何謂「不能」、何謂「不為」呢？唉，呢樣嘢梗係又關秘書事啦！佢真係懶得好緊要！我知佢從來都冇諗過要尊重我和聽我講，因為喺佢心目中，我只係一個細路女，咩都唔識，成日俾佢點。Fine！我叫你做，你唔做，唔緊要，咪我自己做返囉，對於我來講，你真係一 d 價值都冇，既然我自己可以一個人搞掂晒 d 嘢，我真係唔知要你來做乜！話說我們大老細係 liquidator，咁破產管理署就會 assign 一 d wound-up 的公司俾我們做清盤人。全公司有起碼二百隻呢 d cases，大老細梗係將佢地 delegate 俾唔同的律師去 handle啦！我老細就有七十幾隻。衰秘書喺我來咗之後，就將所有呢 d OR (official receiver) 的嘢俾晒我做，但 d 嘢實在太亂啦，要求整齊清晰的我，要求一個 list，等我知道邊七十幾間 wound-up co. 係由我老細負責的。我問咗秘書幾次要一個咁樣的list，佢都話冇，後來就 print 咗一個有齊成間 firm 嗰幾百隻的表出來。亞姐，我只係想要 Ms. Leung 嗰七十幾隻咋，你俾個幾十版的表我把鬼咩？我再問多兩次：「可唔可以整一個只係得 Ms. Leung 負責嗰七十幾隻的 list 呀？」你咁都唔肯去整，死都話：「冇呀，得呢個咋，如果要，就要花時間去整……唔駛啦，你拎呢個咪得囉……」fine！我話：「你有 soft copy 嘛，你俾個 soft copy 我啦！」轉頭就返埋位做嘢。唔駛半個鐘，我就整好個 list 出來啦，一共係 75個 files。See？邊有話冇的啫？咩叫冇呀？咩叫整唔到呀？只要你肯去做，邊有話唔得架？你懶就懶啦，諸多藉口！呢 d 咪叫「不為」，而唔係「不能」囉！
唉，老細見我整到 d 嘢幾整齊就叫我教秘書整喎……我好驚訝咁話：「吓？你教啦！」哈，嘥氣的，我教佢，佢咪話：「唉，我都係唔識整呀，都係你整埋佢啦！」都嘥氣的，我得閒幫你教女？你自己的秘書都唔好好去管教，冇理由要我幫你去教啫，況且你又唔係唔知，你個秘書都唔聽人講的，點教啫！要我嘥時間教佢和求佢做嘢，不如自己做埋佢，等我取代埋佢，趕佢出局好過啦！
哈，我好過份呀呵！哈，算啦，我都係呻吓啫，唔理佢咁多，做好自己的本份就算，我冇必要和冇能力去改變佢，咪由佢囉！
哈，秘書將會喺 1/12 – 4/12 放假，真好，難得有幾日可以耳根清靜一 d！
*********************************************************************
又係時候講吓 d 開心嘢啦！上星期六晚約咗英嬸影畢業相，因為舊年冇同佢影到，應承佢今年搵佢影返，我仲問拉架仔借埋舊年件金色袍，咁就一次過影晒舊年和今年的。本身唔諗住搵其他親戚影畢業相，費事打擾大家。點知英嬏搵埋其他親戚返來 bbq，咁我搵得英嬸影，冇理由唔搵埋其他親戚影架！咁我成晚就同大家影咗好多相啦！真係俾 d 閃光燈閃到睇唔到嘢呀！多謝晒！
星期日就約好咗雲姑姐喺教會度影相，順便咪同 d 教友影埋囉。雲姑姐送咗紮好靚的花俾我呀！真係好靚呀！多謝晒！哈，楊太問我：「秀華，邊個靚仔送紮咁大紮的花俾你呀？」哈，我只有好羨慕咁回答：「我都好想呀！可惜唔係，係姑姐送的。」哈，紮花真係好靚，但要我拎住紮花咁喺條街度行，真係咪搞，太樣衰啦！星期四就同穎雯和姑姐影相，咁就同所有親戚影晒啦，哈，估唔到今年都影咗咁多相，hehe，曬相又好貴啦！
最可惜都係唔能夠影返張一家六口的全家福……可惜，可惜。
哈哈，tiger 妹妹睇咗兩張相之後，話我靚咗好多呀！哈哈，多謝晒！呵呵！你真係識講嘢架啫，氹到人地鬼咁開心！
*********************************************************************
星期五跟同事叫 pizza 食，今次我們食 Pepperoni，都真係好好食呀！yummy！星期六同靚女秘書珍妮絲 (Janice) 和 trainee 麗莎 (Teresa)食早餐，原本想食 KFC，點知 PP 間 KFC 執咗，好失望咁惟有走過隔離食 M 記。Lunch 就同同事喺 office 叮熱星期五食剩的嘢食，都真係好飽！之後，成三點幾先離開 office，就同靚女秘書行咗一陣街，四點幾走咗去大家樂食 tea，傾吓計，不知不覺咁就傾到成六點九！哈，嚇死媽咪呀，雖然佢知我同秘書行街，但冇諗到我會咁夜都未返去，又冇打電話俾佢，搞到佢好擔心，擔心個女會人間蒸發呀！因為我不嬲都好有“交帶”的。佢今次打咗成十三個電話俾我，但我又聽唔到喎，所以更加嚇親佢！真係對唔住呀！我以後都唔會咁大頭蝦架啦！唔會再叫你擔心架啦！
*********************************************************************
又到聖誕啦！話俾大家知丫，一年咁多節日入面，我最鍾意的就係聖誕節，因為聖誕節好有氣氛，處處的裝飾都好靚，最靚的當然係聖誕樹和 d 燈飾啦！當然，更重要的係因為我喺聖誕節洗禮架嘛，我今年七歲啦！感謝主！求祢叫我好好預備自己，為主作工，求祢使用我，阿們。
文章定位：
