上星期都係一個頗為開心的星期。星期六放工約咗個朋友食飯，當晚返咗學校影畢業相，見返 d 好耐冇見的同學仔。星期日買咗兩對高跟鞋、(我話要買都話咗好耐，終於都買到啦！)、媽咪又送咗個好靚的 Monchichi cushion 俾我，星期一帶返公司用，見到 Teresa 買咗個南瓜 cushion，哈，又會兩個咁啱一齊買 cushion 返公司用的，真橋！可惜的係，當日搵唔到一個啱心水的咭片盒，宜家惟有用住個冇咁靚的先啦！我印象中 Mickey Mouse 出過一個用鋼 / 合金之類的咭片盒架，外表見得吓人，既係米奇老鼠，又唔會覺得佢幼稚喎，真係好，可惜我搵唔到……
星期四，我們廿二樓的同事又約埋一齊叫外賣，因為當日叫飯會送紅豆沙，哈，三餸一飯、一湯、一糖水，都只係需要 $21，都算抵食。工作方面都頗為順利和開心，所以上星期都好開心吓！
最搞笑的係上星期五上午八點幾有輛村巴喺西隧入面著火，搞到西隧要全線封閉。當時我搭緊班巴士停咗喺九龍的西隧口的巴士站度，原本瞓緊覺的我，醒一醒見 d 車停晒喺度，又有人落車，我都唔知發生咩事。過咗幾分鐘後，我見 d 車郁都唔郁，結果我落咗車，行去九龍站搭地鐵。本應我可以九點前返到公司，但由於我要喺地鐵站等埋住屯門的秘書，所以我們要九點二先返到公司，好險，因為公司喺 20/10 實行新政策，邊個員工 (當然唔計 d partners 啦) 喺九點三之後先返工，就要罸 $50！我們廿二樓的仲要每早九點三前打電話給三十二樓負責 admin 的律師報到，哈，好荒謬呀呵！是但啦，對我其實冇乜大分別，因我返工係唔會遲到的，通常會喺八點九度就會返到公司，所以對我影響唔大，係麻煩在要每朝早打電話同人報到囉，而呢個人又唔會盡時九點返工喎，唉。
尋日係媽咪的生日，我們冇乜特別的慶祝，只係喺晚上去了洪水橋食泰國菜。而尋日下午就同媽咪睇咗套《龍鳳鬥》，hehe，因為有兩張免費戲飛的緣故。套戲都算 ok 的……
不要動氣的事發生喺今日，唉，其實我真係唔需要動氣，可惜未見過世面的我表現得好唔成熟，俾人搞到我發忟憎，唉……事緣係今日公司來咗個新的 messenger，舊的上星期六 last day，reception 朝早打來叫我通知大家，因為新同事唔熟手，所以要我們將 d By Hand, By Post 的嘢拎上樓上，初初話只係暫時性，轉頭又話呢 d 係我們廿二樓的責任喎，哈，真搞笑，messenger 唔駛收件 or 派件……過了一陣，我負責的 file 需要交錢俾稅務署做影印費，不嬲做開都係 IRD 俾張 Demand note 我們 (messenger)去郵局交錢，我們再 fax 張 receipt 俾 IRD，IRD 就會自動自覺影 d 我們要的 tax return 俾我們。Messenger 通常會自己出住錢先，返來向 account reimburse 返，如果個銀碼大先會開票的。咁我咪照舊俾個 messenger 咁做囉，都係四十幾蚊啫，點知個 reception 打俾我問我點做，又話叫大老細個秘書同我講喎，結果就由另一個秘書同我講，之後由我個秘書同佢講，最後咪又係要個 messenger 去郵局交！但係佢地話個 messenger 新來，唔識開 voucher claim 返錢，死都要我開張支票喎。唉，唔識咪教佢囉，我返工第一日都係咁學啦！唉，又唔係叫 reception你去郵局交，關你咩事啫！唉，messenger = assistant receptionist，messenger 係請返來 assist 個 reception 的，哈，犀利，真係巴閉！
唉，真係嘥氣，左搞右搞，咁就搞咗我成大半個鐘，嘥我時間！都唔知點解 d reception 仲大聲過 d trainee 的，又有咩理由要個 trainee 去遷就個 messenger 丫，認真荒謬！咪見我成日 say yes，就斷定我係唔識 say no 先得架，我會返抗架！唉，呢間 firm 的 training 真係幾好，但 d admin 就認真麻麻，衰 d 講句，真係不知所謂！如果我係老細，我一定唔會請呢 d 唔聽話的員工，要知道你只係一個 reception，職位好低，呢個位仲要係 replaceable的，我有冇需要請一個又懶、做事“質質膞”、又唔聽話、仲要調轉頭吩付老細做嘢、又鍾意搞小圏子和講是非的員工丫？
唉……我惟有講句各處鄉村各處例，算啦，都唔關我事，我行得正，企得正，做好自己的本份，都費事理你呀！我只希望自己唔好再為呢 d 小事動氣，多一事不如小一事，提醒自己：我係一個基督徒，我要愛一 d 唔可愛的人！
親愛的天父，冇人比祢更清楚我，祢知我就係咁抵唔住頸的發咗忟憎起來。主呀，求祢原諒女兒，求祢叫女兒學會忍耐，學會去愛呢 d 令我動氣的事和人，求主垂憐。感謝主令我想起張崇基、張崇德的《原諒》，求祢教導女兒去原諒，Love the Sinner but Hate the Sin，阿們。
《原諒》
曲、詞：張崇德
編 曲：張崇基
只有恨是會更加寂寞，必需要拋開積怨的驅殼，
於世上誰人從無幻覺，犯錯走進死角；
不再問是那方的錯誤，只知道彼此都也覺辛苦，
請放下遺忘重重事故，嘗試減輕痛苦。
能再看清楚他倆眼睛，能記憶起當天的高興，
能原諒他幹過每件壞事情，這種愛才是真感性，
能設想他的感覺處境，能徹底張開心窩傾聽，
能原諒不再記掛舊日事情，這種愛嬴得致敬。
神為你捨己甘願犧牲，憑著愛寬恕世上罪人，
成就了，祂的應許，祂的拯救，這種愛，才是真愛， 如你學懂這寬恕的心，憑著愛可將心窩拉近， 無用再分你我對或錯一起牽手將永恆擁有，真愛可擁有。
文章定位：
