Hello，大家好！真係好耐冇見，皆因早前趕緊一個 project，趕完之後，想寫番日記，點知個網站又 down 咗……
Well，唔經唔覺地都返咗工差唔多三個月啦 (到 10 月26日就正式過probation 啦！) ，感覺如何？ So far so good 啦！
喺呢兩個幾、三個月入面，我開始適應日日返工的日子，坦白講，真係好唔想去適應，一星期返足五日半，真係有 d 抖唔到氣的感覺。每朝早六點幾起身，七點幾出門口，八點就一定要上到車，九點 (或九點疏 d) 就正式開工，一路做，做到晚上七點幾，有時成八點先可以放工，返到屋企都成九點……唉，真係對同事多過對屋企人呀。真係又 d 唔開心架……哈，好彩我有一個溫暖的家，爸爸媽媽都好體諒我，我家吓咩家務都唔駛做，連熨衫都駛我做，哈，多謝晒！感謝主！
同同事的關係都 ok 啦，只係有某 d 人有時會令我覺得好討厭，令到坐我隔離的秘書話覺得我暴躁咗，搞到我好擔心，真係要好好控制一下自己的情緒啦！唔可以俾自己繼續暴躁落去啦！雖然有 d 人和有 d 事真係令我覺得好氣忿，真係好想好想打佢地，但又好矛盾咁問自己，作為基督徒的我，係咪應該去愛佢地呢？因為自己都有好多唔可愛的地方。哈，求主帶領，教導女兒如何去控制自己的情緒，如何去面對呢 d 令我忟憎的人和事！求主垂憐。
講開又講，上星期有一件好乞我憎的事發生咗喺我身上。話說我一早入 pantry 洗杯，點知有電話搵我，我咪將已經”jit”咗洗潔精的杯放喺個 sink 盤度囉。點知當我返入去 pantry 時，見到李律師拎住個杯喺個 sink 盤上，我發現我個杯充滿茶渣，而個 sink 係一 d 茶漬都冇的……激死我呀！李律師見到我入去，只係同我講聲“早晨”……雖然我冇親眼見到佢倒 d 茶渣去我度，但佢嫌疑最大，好討厭，好噁心！！一 d 衞生常識都冇，離晒大譜，我點知你有冇病架？SARS都係咁傳播架咋！好過份呀！
因為我太激氣的緣故，我將呢件事話咗俾相熟的同事們聽，點知有幾個話好小事喎，仲話麻甩佬係咁的，反正我都係要洗杯喎……真係離晒大譜呀！試吓你隻杯被人倒 d 茶渣落去丫！！要知道呢個人真係冇 d sense，亦冇 d 責任感，呢 d 叫觀微知著，呢個人連清理自己 d茶渣都唔願意去承擔，大事都唔會見得會做得好，cheap 到死！！諗返轉頭，我應該當住佢面大聲咁話呢個不負責任的人，唔係細細聲咁講，等佢知道我唔係好蝦的，咪見我成個靚妹仔，又成日笑笑口就唔會反抗得架……咪再有下次呀，我實出聲話你架！豈有此理！唉，唔講啦，提起佢就嬲啦！
講吓 d 正面 d的嘢。忙完個 project 之後，終於都有時間睇吓老細俾我 d notes，家吓多 d 機會接觸 personal injuries 的 cases，慢慢學習個 legal procedures、要入 d 咩 court documents、點計 damages 等。真係要俾 d 心機去學，唔可以浪費時間！除此之外，都有 d conveyancing、divorce、probate 的cases，星期四仲自己一個人見個 client o忝！哈，都幾得意架！所以，真係要俾 d 心機去學，勇於發問，唔可以再好似一個細佬女咁架啦，要俾 d 信心人家，俾 d 信心老細和自己！
主呀，求祢賜我智慧去應付工作和人事上的各種挑戰，除咗向住律師的目標前進外，都要教女兒懂得為主侍奉，如何喺我的工作崗位上見証主，求主使用女兒，都叫女兒全心地順服，願祢的旨意成全，阿們。
文章定位：
