星期六真的唔係一日好好的返工日子……因為我尋日的心情唔係咁好，平時喺 office 度見親人都會笑吓，但尋日真係冇心情去咁做……
話說一早八點九的時候，巴士已經去到金鐘，準備落車，Karen 就打電話來問我食咗早餐未，我就話食咗，佢就話佢仲喺將軍澳，叫我幫佢去大家樂買早餐……講真同佢真係唔想提早餐呢回事，因為佢上兩個星期約我同佢食早餐，都搞到我遲到返工。第一次係因為佢遲咗十分鐘先到，第二次係因為大小姐佢要去灣仔食早餐……所以喺嗰日之後，我就決定唔會再同佢食早餐，大佬，你遲到係你的事，唔好搵我去陪你。點知今個星期佢要我幫佢買早餐……唉，我唔係話介意幫佢買，但佢真係唔係好得，咩都大安旨意咁，我第一日返工佢已經話只要喺九點三前返到 office 就唔算遲到，但我見佢冇幾多日係九點三前返到公司。今次仲離譜到八點九仲喺將軍澳，佢話返來要九個字的，咁即係九點半先返到啦……日日都趕頭趕命咁返工，日日都同我講話：「趕到我丫！」哈，我真係唔識俾反應你……坦白講，我唔會同情你，係你自己攞來的。有一次，佢仲打電話俾我，但咁啱我上咗去 32 樓做嘢，所以聽唔到，也唔知道，佢返到來一入門口就話我唔聽電話……亞姐，我要做嘢架嘛，你估我家吓為你而隨傳隨到咩？唉……
尋日我執緊一單 case 的 correspondence file，一路以來，我所收到的訊息係correspondence file 只會用來 file correspondence，即同呢單 case 有關的所有書信。其次就有 pleading file——專放 court documents，和 documents file 用來放其他文件，如 payroll slip、contract、medical cert……我一早就執好 d correspondence，仲編埋 no.，做好咗個 index。
但執到一 d 唔係好識執的文件時，咪問吓 Karen 應該點執囉，點知佢就以佢的經驗來話我知嗰 d documents 要 file 埋去 correspondence 度！我覺得好有問題，咪問個明白囉，佢就一味話以佢的經驗係咁執的，仲話 d witness statements 要放埋入去o忝，但我之前睇過幾個 cases 的 files 都唔係咁的，d witness statements 放喺 documents file 度架嘛……佢仲要話呢 d 應該放喺第一、二份 correspondence 後面……咁即係要重新編過 d no. 啦……呢個步驟實在太麻煩，所以我就堅持己見，猛喺度問點解呢 d 唔係 correspondence 的嘢要放入 correspondence file 度……結果，我就梗係冇計啦，佢猛喺度話以佢的經驗係咁執的，你做咗成十年，我先得嗰一個月，邊敢同你撐啫，咪唯有好唔願意咁去問：「咁你宜家想將呢幾份文件放喺邊度呢？」再說：「ok，冇問題。」
哈，點知當我照佢的意思執完，再 print 埋張新的 index 出來，整緊第二個 file 時，佢就走埋來話：「唔好意思呀 Sabrina，我問過 Ms Leung，頭先嗰幾份文件真係要開過一個 documents file放入去架」……唉，我內心深處真係火都來呀……我都話架啦，你又要話唔係，唉，家吓又要再整過啦……好彩我都唔蠢，唔會話重新編過晒 d no.，之前加落去嗰 d，我俾咗 1a, 1b……呢 d no. 俾它，咁就唔駛改晒後面 d documents 啦……哈，佢都知我唔係咁滿意，又冇晒笑容，都猛話：「唔好意思呀，等我整啦」，唉，我就梗係話：「唔駛，得啦，我整啦」。哈，我諗我黑晒口面咁，嚇死佢呀……我之後再問佢第二個 file 的 documents，佢都猛話：「我唔敢講啦，怕教錯你呀，同埋你好惡呀。」哈，咪以為我成個小妹妹咁，就會咩都聽晒你講，唔識自己用腦諗先得架！其實，我都唔係嬲你的，只係發自己忟憎啫，我冇嘢架啦，你見我之後都同你講吓笑咁，冇嘢架啦，好快就冇事！
但喺臨收工的時候，又發生咗一件令我好忟憎的事。就係白頭伯伯話要將我部電腦搬番去原先的位置，問我想坐喺邊喎。唉，嗰度地方有幾大啫，我可以揀坐喺邊丫？況且你要我坐邊咪坐邊囉，你咁大方咁問我又點啫，你會聽我講咩？點知你會唔會好似上次的電腦事件咁，反問我要咁快做咩架？唉……真係討厭！咁就搞到成兩點先走得啦……激死人呀，都唔知你會搞成點呀！遲 d 又話唔知要我搬去邊度坐，唉……
不過，之後返到屯門，搵 daddy & mammy，成個人即係開心番晒，因為同佢地訴咗一輪苦水，哈！再加上，尋晚買咗 d 衫和一部新的好易通，雖然好貴，但真係有咁的需要……
親愛的天父，我知我唔應該發秘書姐姐脾氣，即使真係搞到我好麻煩咁，要整過晒 d 嘢，我都唔應該黑口黑面，求祢賜我忍耐的心和智慧去面對工作所要面對的各樣挑戰 (包括人和事)，要控制一吓自己的情緒，唔好再發忟憎啦。求主垂憐，阿們。
文章定位：
