返了工都有兩個星期啦，同老細和同事的關係有 dd 進步，大家多嘢講咗，又會講吓笑，紓緩一下工作的壓力，我覺得我選擇呢間 firm 係冇錯的。不過，始終有人的地方，就一定會有是非，坦白講，每次聽到我個心都好唔舒服，唔想去理會呢 d 是是非非，求神賜我智慧去分辯是非，求主垂憐，阿們！
星期一來咗一個新的 trainee——Peggy，佢係一個比較靜的人，所以大家都好少講嘢，不過，我覺得佢只係慢熱一 d 啫，冇乜嘢的，希望大家可以喺呢兩年互相扶持啦！喺呢日都約咗 Loretta & Diana 食 lunch，好耐冇一齊食飯，雖然只係一個小時，但可以同你們傾計和食飯，我真係好開心！我們大家都要俾心機，一齊努力去完成呢兩年的 training呀！加油呀！
星期三係大老細——范律師的生日，當晚差唔多全公司的人都去了同老細慶祝，老細喺 Conrad Hotel 度訂咗兩枱 buffet。當晚仲有抽獎呢個環節，人人有份，永不落空，哈，唔駛俾錢，有得食，仲有得拎，哈。最估唔到的是，估唔到我初來報到，都咁好彩抽到個三奬，係現金六百蚊，真係興奮！(二奬係 $1,000，而頭奬係單人來回日本機票) 雖然我最後都貢獻咗一半出來請大家食嘢，用埋另一半入八達通，哈，結果係咩都冇，但贏到個 luck 返來都好好丫！感謝主！
星期四晚放工就見到胡大狀，之前同佢傾過電話 (就係嗰個喺八號風球打來傾計嗰個)，哈，冇咩好講，聽聞佢係一個好 demanding 的人，我諗將來同佢合作，一定會成日俾佢鬧，我就梗係會喊啦！希望佢唔好鬧得我咁“金”啦！求主帶領，賜我智慧去應付工作！呢個星期就要幫胡大狀做 d 嘢啦，希望佢體諒吓我細路女咩都唔識，慢慢教，唔好咁惡啦！
至於呢個星期就做咗幾個 203 accounts，對吓 d contracts，去過 High Court Library 影過幾個 cases，跟 Emba 去政府開咗個會，再見過幾個 clients 咁大把。
呢個星期最唔開心的就係聽到好多是非，同埋俾個白頭伯伯針對囉，唉……呢個白頭伯伯都唔知係邊個來的，個個同事都唔敢講佢係乜水，只係話係大老細的朋友，但佢可以有一間房坐，就知道佢的地位幾高，仲叫我千祈唔好得罪佢o忝！唉，佢真係好討厭！上星期返工，秘書姐姐介紹我俾佢識時，佢就問我喺邊度畢業，聽到係 CityU，就冷笑咁話：「哈，乜咁好彩入到來呀？」今個星期三食 buffet 時，佢原本係坐喺我隔離再隔離，點知食咗幾輪嘢返來，佢就坐咗喺我隔離，又問我中學喺邊間讀，我話喺屯門，佢又“懶”巴閉咁話佢可能識。點知我講完，佢又話唔識，又“懶”巴閉咁話自己係某名校的 Governor，會成日去巡校咁喎……巴巴閉閉咁……討厭！
之前又話我用緊部電腦好慢，個 LCD monitor 有兩點盲點走埋一齊，一定要退貨。今個星期五就搵人將我同 Peggy 的 a/c 整埋喺一部電腦度，結果兩個人 share 一個 hard disk。整完叫我試吓用，睇吓有咩唔同，我話好似比之前嗰部慢 d，佢就一句“得”埋來話：「你要咁快來做咩呀？」哈，咁我都只好講冇嘢啦……又俾張 post-it 我，叫我寫低部電腦有咩問題，可以叫人來整喎。星期六一開機，我發現要等 Peggy login咗，我先開到來用，咁等 Peggy 一返來，我就同佢交換咗大家的 login ID 和 password。點知用咗冇耐，我個 monitor 就出現“signal out of range”，結果需要 boot 機！一機兩人用，Peggy 就梗係受到影響，要 boot 機再來過啦！之後我要用一個公司的程式 (PC Law)，點知又用唔到，出現“is locked, will retry”，哈，又要 boot 機……死得啦，吓吓咁 boot 機，不如唔好俾部電腦我用丫……仲要搞笑到部電腦唔識熄機，去到“關機確定”時，部電腦就停咗喺度，要人手按住個開機掣先熄到部機……
秘書姐姐叫我將呢 d 問題列晒出來俾嗰個白頭伯伯睇，我都問有冇用，因為見佢之前一句“你要咁快來做乜”，都知佢唔會點幫我。哈，結果一如我所料，過咗一陣，佢番到公司，見我寫咗 d 嘢喺張 post-it 度，就自己拎來睇。當我喺老細房出來見到佢，都心知不妙，但逃避唔係辦法，都要行埋佢同佢講。佢見到我就問我“signal out of range”係幾時出現，我咪照答佢囉……佢問咩，我就答咩，仲好客氣咁講晒唔該和唔好意思……佢的反應係：要等 Peggy login 先唔係問題、熄唔到機唔係問題、用唔到 PC Law 唔係問題，暫時來講，我見唔到有咩問題係解決唔到，即係冇問題啦，有咩問題就繼續寫出來，張 post-it唔夠寫，就拎張大 d 來寫……唉，希望快 d 可以整好部電腦俾我用啦！
白頭伯伯，可能係我疑心重咗 d，你唔係有心針對我，俾說話我聽啦！不過，算啦，喺你心目中，我都係嗰 d 成績唔好，入到來都係死好命嗰 d ……你鍾意點睇我唔緊要，我會做好我的份來事，費事俾 d 咩藉口你來插我……希望大家可以融洽咁相處啦，求主垂憐！
文章定位：
