Hihi, I'm back!! 四日的華東之旅經已完滿結束，感謝主的帶領，賜給我和媽媽平安的腳步，感謝主。哈哈，今次的旅程真的冇去北京咁好玩，而我又真係全團最年輕的一個 (雖然仲有兩個比我大一、兩年的年輕人)，所以都真係好玩極都有限。不過，d 太太們又好講得笑，所以我們都做咗朋友，仲約定 8/6 一齊飲茶和睇相o忝！
唔知係咪因為特價團的關係，d 導遊的質素和態度都比去北京的差……首先，香港個導遊俾我的感覺係一個字——懶，佢成日都唔出聲，好似將個波交咗俾當地導遊就咩都唔關佢事咁……唉……仲話做咗導遊 4 年咁耐o忝，真係登佢有 d 可憐……佢最好招呼都係最後一日食 lunch 的時候，我諗係因為我們要俾導遊費的緣故……
至於上海個導遊就真係差得緊要咯，由於我們係杭州入、上海走，所以上海個導遊就跟足全程，唉，對佢對足四日真係有 d 難頂。事關佢唔係好識講說話，佢第一日同大家講，話要收錢帶我們去多幾個景點時，已經搞到成車人好唔開心架啦，d 人覺得佢好似明搶咁，講嘢一 d 都唔客氣。又成日講埋 d 低俗的笑話，唉，根本就冇人覺得好笑，但佢卻不停咁重覆，真係頂你唔順呀！
落車講解時，又唔等齊人就自己開始講喎，亞姐，我們好多人都聽唔到你講咩，結果落車都係得個行字，和各顧各咁影相，唔係唔想聽你講，而係你根本冇俾機會我們去聽你講嘢。仲有呀，人地做導遊，拎住支旗有咁高就舉咁高，咁我們離遠都知你行到去邊丫，但你就拎到喺自己個頭度，咁多人，鬼睇到你咩……你知你已經唔等人架啦，自己一支箭咁行，一個人咁講，都冇理會到有冇人聽到 or 跟到，唉，我們呢團有咁多老人家喺度，你要顧吓人先得架，唔係唔跟住你呀，係根本跟唔到……你真係冇鬼用呀……
你帶我們穿州過省，司機哥哥駕駛就梗係要安全啦，我們一團人有成三十九人架喎，你唔話佢不得止，仲幫佢講好說話，話路上的其他司機喎……嘩！你都真係得架啦，由佢喺條公路度左穿右插，話爬頭就爬頭，真係好得人驚呀，學一個團友話齋：「你趕咋，我們唔趕架。」唉……結果，個司機俾警察截停抄牌兼罰款，都真係抵你呀！！唉，學你話齋，上海人好現實，咩都講錢的，哈，你簡真就係一個樣板呀！！哈哈，不過，算啦，都係對你四日啫，真係好彩！！
講番個行程丫，由於我們要喺 4 日去齊杭州、蘇州和上海，所以真係走馬看花咁，仲有好多地方都冇去到。杭州個西湖真係好靚，蘇州個盤門三景就真係冇得頂，而上海個夜景又真係幾迷人呀，和個磁浮又真係好快囉。哈哈，我去旅行，最鍾意就係睇山水、行公園、睇湖、咩博物館呀、歷史文物呀咁，行街就真係認真麻麻……anyway，今次個旅程都好開心，雖然年青人真係唔多，但班太太們都好玩得和好講得笑，所以都好好架啦。最橋的係，團中有一家三口帶埋祖母去，個仔係剛剛喺中大醫科畢業，又係好似我媽咪咁，諗住個女終於都畢業啦，要去一去旅行玩吓，而呢位團友仔個表妹又係叫 Sabrina Chan，所以佢媽媽好鬼興奮咁，差 d 當正我係佢個姪女咁濟呀……哈哈。
旅行完畢，又係時候要返番來現實啦，真係要俾心機搵工呀！希望快 d 搵到個 offer 啦，求主垂憐！
文章定位：
