嘩……話咁快就一年啦，今日係肥仔生日，感謝主喺過去一年的帶領，佢又大一歲啦！求主保守爸爸，叫佢身體健康，事事如意，更希望佢快 d 接受祢！！求主帶領，阿門。
今日我們冇送生日禮物俾肥仔，因為之前佢俾人偷咗個銀包和電話，我們就夾錢買了個銀包俾佢，原本諗住生日先送，點知佢又話要喺街邊買個廿蚊的銀包喎，我們咪提早送俾佢囉。咁亞婆又例牌俾錢叫媽咪買條褲俾爸爸啦……
我今朝起身後咪打電話同個肥仔講聲生日快樂囉，中午上網見到細佬咪提吓佢，叫佢打電話俾肥仔囉……唔知細佬係咪真係唔記得呢？我記得舊年都好似係我叫佢打電話同肥仔講生日快樂架……至於哥哥呢，肥仔話佢舊年一早就喺北京打返來屋企，但今年就冇打到，可能係因為要返工，唔記得咗卦……唔知肥仔會唔會有 d 失望呢？
今晚又照樣出街食飯，又係媽咪請……哈哈……肥仔問係咪我請，我就話我冇錢，等我搵到工先啦，哈，我出年請你食，ok？
今年我們去了巿中心間“客家好棧”度食，其實都唔知開咗間咁的嘢，只係尋晚姑姐話佢去了嗰度飲茶，我們又諗唔到去邊度食，咪去試吓囉。哈，身為客家人都唔知咩係客家菜，又唔識講客家話，真係有 d 慚愧，不過，我諗要我宜家開始學番，都好難咯……至於d 嘢食都係咁啦，ok 啦。最搞笑係媽咪見 d 牙簽包裝得幾靚，就拎咗幾枝走，但又驚人發現，拎咗就隨即塞入肥仔個裇衫袋度，哈哈……搞到好似係爸爸要拎咁……
成餐飯最唔鍾意係隔離枱個女人猛喺度擰個頭過來望我們囉，都唔知佢做乜，由佢自己點菜到佢 d 菜上枱，就來食完啦，都成日望過來，都唔知佢有冇搞錯架，佢已經叫晒我們叫嘅菜架啦，驚死叫漏一樣，蝕底咗咩……真係討厭，搞到人地食得鬼咁唔自在……
舊年我就喺食完飯之後先問肥仔有咩生日願望，今年就喺食飯前。肥仔話今年的願望係：
1) 兩個婆依然行得走得。
2) 我快 d 搵人要咗去，都唔駛搵工架啦 (當然係講笑啦)。我就梗係叫佢發吓夢先啦，媽咪都話咁咪好嘥？！
3) 細佬就身體健康，因為佢來唔來就話頭暈暈咁……
4) 至於哥哥呢，都係咁啦，身體健康。
其實都冇咩特別的生日願望，都係一家人開開心心，健健康康，平平安安咁生活，已經好足夠架啦！！冇錯，一家人喺埋一齊真係好重要，我會好俾心機咁去維繫架！！
哈，我同媽咪講話我們都唔再送生日蛋糕俾爸爸啦，細個爸爸生日，我們一定會買個生日蛋糕，唱生日歌，吹爉燭慶祝，不過，都好多年冇咁做到咯……況且而家肥仔又唔食得甜嘢，所以都冇理由買生日蛋糕同佢慶祝的……哈，我同媽咪講，我今年生日要有生日蛋糕，因為我好鍾意食蛋糕。媽咪話好，我就話：「你舊年都係咁講啦。」佢話：「係咩？咁你今年提吓我啦，如果唔係，我會唔記得架。」哈，話要生日蛋糕講到出面，我都得架啦……真係唔知醜……哈哈……一日三餐咁當飯食，實食得晒啦……hehe
最後，都係嗰句，肥仔，祝你生日快樂，健健康康，開開心心，事事如意……你舊年的生日願望，都叫實現咗架啦，希望你今年的生日願望都成真啦！送給你快樂的祝福、真誠的祝賀、甜蜜的祝福、暖暖的心意……Happy Birthday, my dearest father！！
文章定位：
