尋晚食飯時睇了《星期一檔案》，今輯係講述一 d 四肢癱瘓的人士，見到佢地要長期坐在輪椅上，生活的好多事都需要倚賴別人的幫助，真的感到好痛心。眼見自己四肢健全，行得走得，想去邊就去邊，想做咩就做咩，真係好感恩，感謝主賜我一個健全的身體！
令我感動的不單是那班四肢癱瘓人士，雖然身體殘缺，但他們仍對生命永不放棄，不單止不會覺得自己冇用，反而更積極地去面對生命，還會四出幫助有需要的人、鼓勵別人等等。而最令我感動的就是留在他們身邊，不離不棄、不眠不休地照顧他們的家人，有的是夫婦關係、有的是兩姊妹的關係，真的好偉大！好記得當中一位太太講述點解願意十幾年來照顧四肢癱瘓的丈夫？佢的答案真係好感人，佢喊住咁話：「唔知點解，我相信係因為愛……」好偉大、好感人！！
何為愛？真的好值得我們去諗諗……我感恩，我得著上帝的愛、父母的愛、兄弟的愛、朋友的愛……我是被愛的一個，感謝主，也求主教導，叫我懂得如何去愛主、愛身邊的人！阿門。
----------------------------------------------------------------------------------------------------
今日去一間鬼佬 firm interview，我只是抱住見識吓的心態，所以感謝主，我一 d 緊張都冇……哈，我諗係因為我知道它一定唔會請我，同埋係因為它家吓 in 緊 2005 年的 trainee application，哈，我今年就畢業，有得揀我都唔會等到出年先實習……可能亦都係咁我緣故，我一開始就話佢知我今年就 graduate，所以佢都費事再嘥時間，好快咁我就 in 完，走得啦……
不過，我最想講的唔係 interview 呢 part，而係 in 之前的事，就係我見到兩個靚仔……
1) 喺中環過馬路時，同吳彥祖擦身而過。不過，實在來得太快，佢又戴住頂鴨舌帽，所以都冇睇清楚……
2) 上到間 law firm 喺度等做 written test 時，見到陳冠希按門鐘，然後佢同我一齊坐了喺 reception 度等人招呼。因為今次見呢間 firm 有做一 d 同 entertainment & media 有關的 case，而今日 in 我嗰個 recruiting partner 係負責呢個 area 的，所以我諗 Edison 係去搵佢傾呢 d 嘢……
哈，我同拉架仔講，佢問我有冇問佢攞簽名喎……但我自少都唔鍾意做呢 d 嘢，再加上我覺得個場合唔啱做呢 d 嘢，話晒我都係上去 interview 喎，點可以成個靚妹咁問人攞簽名架？所以，我只係對佢微笑了一下……
記得有次跟朋友傾計，講到覺得邊個男明星靚仔，我話吳彥祖，另一個朋友話陳冠希，再有人話兩個都靚仔，哈，估唔到今日俾我見到佢兩個……
哈，人見工，我見工，乜鬼我見工見到好似去睇靚仔咁……哈，等我澄清一下先，我係好認真咁係去搵工架，只係咁啱遇到呢兩個 artists 啫！
搵工方面，真的好需要主的帶領，求主賜我一個 offer！而眼前最迫切的就係考試啦，求主保守，賜我智慧和健康去面對考試，考取好成績！阿門。加油，努力！
P.S.
安琪，多謝你的留言和捧場，哈，原來你會得閒睇我個新聞台，多謝晒！
我近期都冇咩特別，只係留喺家中溫書咁囉，要應付五月的考試嘛。就係因為冇咩搞作，所以冇寫 diary 囉……哈哈，唔好意思，我得閒就寫多 d 俾你睇吓，請多多支持！
文章定位：
