講了好耐的 BBQ 終於都搞得成啦！尋日沙田 IVE 班同事特登來我屋企燒烤( 話實我都好耐冇叫朋友來我屋企 BBQ 啦 )。喺一個月前約定 8/2 BBQ，但喺星期三當我知道星期日會落雨時，便跟各位建議改為打邊爐，大家都話冇所謂，睇吓星期日個天氣再決定，係名副其實的「聽天由命」。
尋日一早見天色陰暗，仲不時落住毛毛雨，我便以為 BBQ一定改為打邊爐，點知咁多位堅持 BBQ……真係夠堅決！(打邊爐咪好囉，天氣咁凍，我最鍾意打邊爐，呀，突然好想食熱騰騰的炒栗子呀，搵日一定要買來食先得，yummy)於是爸爸便幫我搵兩把大的太陽傘，用來遮住個爐，而我們十一個人還可以坐埋入去，唔駛打傘 BBQ。雖然係冇俾雨淋濕 (喺燒嘢食嗰陣，來回叉嘢食的路程係露天的)，但個天氣始終都係好凍，仲要落雨喎，真係凍上加凍！！佢地個個都話市區有八、九度，新界地區低一、兩度，再加上我們喺山上和室外，估計都係最多得六度……真係好凍呀！我咁大個女都未試過喺咁凍和落雨的環境下 BBQ，真係犀利，我的第一次就咁俾了大家啦，真係唔抵……嗚……哈，Wendy今日打來又約我 6/3燒嘢食，尋日燒完，咁快就約下次？好好，到時見……
最搞笑的都係大家一心諗住順便同 Tiffany 慶祝生日 (佢 9/2生日)，我們諗住俾個 surprise 佢，買定個生日蛋糕俾佢，點知尋日喺約定時間都唔見佢時，我便打俾佢問佢幾時會到，佢先話唔記得咗，又話唔得閒，所以來唔到喎，哈，真係surprise……大煲啦，咁個 birthday cake 點呀？仲寫埋佢個名o忝架，點算呢？？我們便諗埋 d 屎橋，諗住睇吓有邊個喺二月生日，頂替壽星仔 / 女的位置，點知十一個人入面，最早生日的都要喺六月，再數落去就要到八月啦……真係離譜，點會咁啱個個的生日都集中晒喺下半年架？！冇計啦，既然買了個蛋糕，點都要食了它，結果我們就好冇聊咁，喺起爐 BBQ前將個 cake 消滅咗……
由於西鐵的通車的關係，好幾條屯門巴士綫被取消，我搭開的 52M 係其中一條。今日 (9/2/2004)便係我第一次轉乘 61M 返屋企啦，它由荔景 (北) 開往友愛 (南)。我一心諗住去總站 (荔景) 搭，於是放學時便喺荔景站出地鐵，我咁大個女都未試過喺荔景出地鐵，完全唔知點行，又唔知個巴士站喺邊喎。由於當時已經係 7pm，天都黑晒，唔係咁方便一個女子去“探路”，所以我選擇搭地鐵去葵芳，再搭 61M……哈，真係傻傻，冇冇聊聊咁嘥咗程地鐵錢……以後都係喺葵芳轉車好啦，反正我見架 61M 去到葵芳都仲有好多位坐。
哈，凡事總有第一次——我第一次喺天寒地凍的環境下 BBQ；第一次喺荔景站出地鐵，第一次搭 61M……哈，雖然可能會撞板，但唔試又點知唔得呢？試吓冇妨的……
文章定位：
