30/1/04 — 今日我個 friend send 咗佢個 diary 俾我睇。哈哈，我梗係回敬番我嗰個俾佢啦，佢話睇我個 diary，心情好反覆，一篇覺得好搞笑，但睇第二篇又睇到想喊喎。我覺得好奇怪，以為乜原來自己個情緒起伏得咁大，定係我寫得好傷感，令到佢好想喊。再問清楚 d 先知道，原來佢想喊係因為佢覺得我有一個好幸福的家庭，有一對絶世好爸媽，覺得好感動，所以想喊……原來如此！！感謝主賜我一個咁幸福的家庭和一對絶世好爸媽！！Thank you, Lord! 仲有呀，點少得你們咁多位好朋友呢？拉架仔，多謝你做我個朋友呀，我都希望我可以藉着你個 diary 去了解你更多！！
拉架仔話佢要記低自己的事，或者將來會為自己出一本書……每個人寫日記的出發點可能唔同，但我相信最重要的是，我們都希望為自己留下一d回憶，不論出書與否，得閒冇聊睇番自己寫的日記，個感覺都幾得意，仲可以 recall 番一 d已遺忘的事o忝……另外，拉架仔都提醒了我，要為自己的 diaries 作一個 back-up，如果唔係，萬一我個新聞台down 咗，咁我 d 新聞就會從此消失喺呢個世界上……(唔可以，一定唔可以，因為我好俾心機去寫o架) 所以，我好努力咁將我所有的新聞 copy and paste 番去 word 度，準備燒落着 cd 度，咁即使個新聞台真係冇咗，我都唔怕冇晒 d 回憶囉！
哈哈，我有一個朋友叫 Tiger 妹妹，宜家有一個 Liger 仔，真係得意！你兩個永遠都係我個好朋友，I will always be there for you，雖然唔代表我可以隨傳隨到，但只要你願意，我永遠都係你的忠實 fans！！你兩個都要俾心機寫好 d diaries 俾我睇呀！！
31/1/04 — 冇乜特別，留喺屋企做功課。
1/2/04 — 成個幾月冇見的大多終於都返教會啦，終於都見到佢啦，真係好開心呀！講真要你星期日一早九點半由大尾篤入來屯門，都真係好吃力呀……相信由14/2開始情況會有所改善，因為團契會改在星期六下午進行，咁你就可以返埋週六崇拜啦，星期日留喺屋企訓覺覺豬啦。
團契完了之後，約了安琪食飯，一行八人去了“麵藏”食 lunch。之後就去了吉之島幫肥仔買電話 (因為佢個 8250 俾人偷了)。喺新世界度前前後後花了成兩個鐘先買到個電話，唔係因為 d staff的工作效率的問題，而是新世界個 system 有問題——我都唔知佢點搞的，搞到間舖頭好似“躋提”咁，人手調配好有問題，一個人負責幾個職責，幫緊呢個客，轉頭又走去幫第二個客，以為咁樣會快 d，結果咪仲衰……又“懶”有系統咁俾張類似“籌”的紙俾你喎，每個客人至少等成半個鐘，你好唔好意思要個客等咁耐呀？到你“嗌籌”的時候，梗係走減好多人啦……“派籌”係你、“嗌籌”又係你，幫手 serve customers 又係你，你估你有三頭六臂咩？？我諗weekday你都尚可應付得來，weekend就真係要請多幾個人手啦！到我睇電話、揀電話又用了半個鐘，連之後俾錢簽咭都簽成半個鐘，唉……真係好有問題！應該每部電腦都做到整個 sale and purchase 的 procedure架嘛，見你幫我落個 order 都要用晒店內咁多部電腦，都唔知你做乜……係你個問題，定係你們個 system的問題呢？？成日一味得把口話：「歡迎光臨，唔好意思阻你咁耐，麻煩你再等多陣」真係唔識俾反應呀……冇理由一個簡簡單單的買賣要搞咁耐架嘛，你估家吓買車買樓，要做咩按揭咩？？唉…一個下晝就咁冇了啦……
仲有一件好好笑的事，前一陣子爸爸唔小心整爛了副眼鏡，於是佢走去“眼鏡88”配了兩副眼鏡。佢對黑色好大個框的眼鏡情有獨鍾，但 88 話呢 d 係舊款，已經冇出好多年，建議佢轉戴其他款。不過，佢堅持要戴大框的眼鏡，咁人地咪喺倉底搵俾佢囉，但始終都冇佢戴開嗰副咁大，佢好冇奈咁揀了一副喺全間 88入面個框最大的，但個款好唔得 (我形容係藍色底 + 白色暗花，好似 88 個招牌咁)。我叫佢唔好揀呢副，揀過另一副黑色膠框 (當然個框比呢副“88款”細啦)，但佢又唔制喎，而我又猛話嗰副唔好喎。結果，佢就買晒兩副。當我見到佢戴嗰副“88款”，我立即笑了出來，仲叫細佬睇吓似唔似 88 個招牌，細佬睇完都擰轉面笑佢……佢便除副眼鏡睇吓，再望吓個 88袋，自己都不禁笑了出來，仲話我做咩唔早 d 同佢講喎，早知佢就唔配呢副喎……哈，我有同你講架，不過你被它迷住了，所以聽唔入耳之嘛……哈哈！
3/2/04 — 第一份考試成績終於都出了，係Commercial Law，真係嚇死人呀，因為之前聽聞有成 35% 的人fail，真係好驚自己係其中一個。開pigeon hole時，見到自己隻手猛喺度震，仲同個 friend 話：「如果唔得，咁點呀？」喺個 pigeon hole 度拎張 result slip 出來，睇到個分數，初時以為係100 分滿分，50先合格，同個 friend 一齊話：「死啦，真係唔得呀。」好彩睇真 d 原來係 70分滿分，35分就合格啦！我們兩個都合格，真係嚇死我呀……感謝主呀！！我記得我話過，冇論個成績係點，我第一時間都要感謝主，對唔住呀主，我到下午先記得多謝祢，求祢原諒，求祢繼續帶領，叫我懂得凡事謝恩！！希望科科 pass 啦，pls！！
4/2/04 — 尋日晨咁早九點上第一堂，Myrette 又再一次同大家講 Wills & Probate 的卷已被 External Examiners 改完，分數都 finalized 晒，相信尋日下午，或今日上午便可以知道自己個成績。可惜，一等再等，今日截止我 3pm 放學個成績都係未出的……唉，好心就唔好話我知幾時會出啦，搞到我成日心掛掛，成日走去 check個 pigeon hole，睇吓佢出了未……唉……不過，當我返屋企上山行到一半的時候，拉架仔就打電話來問我 check 了成績未，我以為 Wills終於都出了啦，點知原來出的係 Civil Procedure，嚇到我唔識講嘢，惟有等拉架仔幫我 check 啦……一路行上山 (雖然只係得返幾分鐘的路程，但我就覺得好似好耐咁) 猛喺度想個電話快 d 響，又立即求神賜我勇氣去面對和接受。個心又猛喺度諗會唔會係唔合格，拉架仔唔知點同我講，所以咁耐都唔打俾我呢……行到返屋企，準備開度木門時，拉架仔終於都打電話來啦……多謝晒，成績都 ok，感謝主！！返到屋企，就立即打電話俾我對絶世好爸媽，講個 result 俾佢地知啦。
5/2/04 — 今日第一堂係 Accounts，喺十點半開始，我大概十點鐘返到學校，第一時間就梗係去開 pigeon hole，拎返 Civil Procedure張result slip啦。點知一大開，見到兩張 result slips，心知一定係 Wills & Probate，好緊張呀……好彩成績都ok，感謝主，我今次第一時間感謝祢呀，多謝祢！！我知一切都係祢賜給我的，謝謝祢！！不過，人就梗係貪心架啦，如果個分高 d就好啦，我會繼續努力的！加油！！俾心機！！
宜家只係得番 Landlord & Tenant未出成績咋，希望可以得到好成績啦！求神帶領！
文章定位：
