失蹤咗好多日啦，哈哈，等我又記低番呢排做咗 d 乜先……上次講到 9/1/04
11/1/04 — 返完教會之後，便同媽咪去行吉之島。早幾日媽咪個銀包爛了，其實之前佢生日我都話買個新銀包俾佢，但佢又話唔駛喎，哈……今次爛了，冇計，整定俾我做一次乖乖女，等我買番個新銀包俾你啦……睇了好耐，終於喺千色店買了個 “Valerie”的銀包，我覺得物有所值，又唔係好貴。不過，當爸爸知道我買了個銀包俾媽咪，再知道個價錢之後，就話媽咪做咩要個女買個銀包俾佢喎，又買個咁貴，個女都仲未搵錢……跟住又笑笑口咁同我講話：「你家吓擺明叫我自卑啫，我都冇送過禮物俾我老婆……」哈，兩公婆又玩呷醋啦……呀，我仲買了好多米奇老鼠的新年掛飾o忝。
12/1/04 — Sem B 開始啦，都係咁啦，第一個 week 冇 tutorial，所以有好多天地堂，又冇嘢做喎，悶死人啦……咪同兩個 friends 行吓又一城，食吓 tea咁囉……
14/1/04 — 放學返到屋企見到亞嬸 (明叔個太太)來了睇亞婆，咁我咪順便送去北京 d 小手信俾佢囉，點知亞婆口快快咁話我俾 d 畢業相佢睇喎，佢又話好想睇喎，咁我咪惟有拎俾佢睇囉……其實我唔係介意俾人睇我 d 畢業相，只係我同我 daddy 嗰七個親生細佬妹的家人影相，只係冇同明叔佢地影喎，咁我點好意思俾呢位亞嬸睇 d 相呢？俾佢睇到 d 相，個個都有份影，係惟獨佢一家冇影到，幾咁唔好意思呢……其實，我有叫過明叔同我影架，又叫佢幫我叫埋亞嬸同兩個妹妹喎，不過明叔佢唔記得咗，所以最後都冇同佢地影到囉……亞嬸話明叔冇提過同我影相呢件事喎，我咪惟有答可能佢忙得濟唔記得咗囉……仲話今年 pcll 畢業再搵佢影過，今次問埋亞嬸個手電號碼，實搵到你啦……真係尷尬啦……但我有盡到我個責任架，叫了你架啦，係你唔記得咋，唔係特登唔叫你架……
之後兩日都冇咩特別，咪做吓功課咁囉……
18/1/04 — 行吉之島辦年貨，哈哈，我買了好多衫呀，hehe……夜晚就食團年飯，食盤菜呀，哈……食盤菜彷彿已成為我們陳家過時過節的餐單。明叔一見到我就話唔記得了影相嗰件事喎……算啦，今年十一月 pcll 畢業同你們影番，ok？
21/1/04 — 行吉之島辦年貨，不過，今次係同細佬買衫、褲、鞋、襪，真係全身的都買晒呀……
22/1/04 — 大年初一，一早咪同亞婆、親戚一齊食飯囉，下晝就去了遊車河，仲帶了南南、彤彤和亨仔一齊去o忝。我們去了沙田個 snoopy land玩呀，啱晒班靚仔啦……夜晚又返屋企食飯。班親戚打麻將打到成兩點，搞到我要同班細佬妹睇 vcd 睇到成兩點先有覺訓……點解咁鍾意打麻將？仲要打到天昏地暗？明知 d 細佬會覺得悶都仲要打到咁夜？記得有一年亨仔好無耐咁同我講了一句：「唉……又打麻將，成日都打……」唉，搞到 d 小朋友有微言，又何苦呢？
23/1/04 — 食過開年飯之後，我們又去遊車河啦，今次帶了南南和惠然，想帶埋亨仔架，不過佢冇上來食飯，而敬熙表弟又話同佢去睇戲喎，所以佢唔知我們去遊車河……而我最鍾意的彤彤呢，佢都猛話要跟埋我們去遊車河，可惜一早已經俾“靚女鳳姑姐”book 咗夜晚帶佢去公司個團拜和睇煙花，咁冇計啦，邊個叫你一早應承姑姐喎……我們今次去了將軍澳、路過 tvb電視城、清水灣郊野公園、再經大埔林村棵許願樹便返屋企食飯。今晚除了 d 新年必食的餸菜外，仲食了個西式盤菜，不過它有 d 焦味，所以都係中式盤菜好食 d……
24/1/04 — 年初三赤口，習慣係冇親戚會來打麻將的，咁我們四個人便自己去遊車河啦，去了青衣城食 lunch，哈哈，食我最鍾意的 Pizza Hut。不過，食得唔係咁開心囉，因為爸爸唔鍾意食 pizza，但佢又好大方咁話冇所謂去食pizza喎，入到去叫完嘢食之後就話：「都唔知有咩好食」……我唔睬佢，佢知衰啦，所以成餐飯都猛讚 d 嘢好好食……唉，下次都係唔好同佢去食 pizza 啦，費時搞到大家好難為咁啦……之後車細佬去上水，佢約了朋友食 dinner，哈，又係 pizza hut……返屋企食完飯之後就去了同彤彤玩啦。走的時候，佢又話要去我度訓喎，不過我第二日要返教會，所以冇俾佢來訓。
25/1/04 — 返完教會之後就返屋企接兩個妹妹去玩啦，今次得我同媽咪帶佢地出去玩。首先，帶佢地搭西鐵，真係好快，由屯門到南昌只需要三十分鐘；跟住轉搭地鐵去中環；再搭電車去灣仔；再搭船去尖沙咀。咁就完成了我們的搭交通公具旅程啦，最後咪搭地鐵轉巴士返屋企囉。哈，我們今晚打邊爐，好好食呀……今晚個靚妹同我訓呀，不過佢兩點幾起身話要去厠所，之後就話唔訓要出去玩，唉，咁鬼夜，又凍喎，我梗係話唔得啦，整吓整吓，我都唔得閒理佢啦，自己繼續訓，佢咪又訓囉……哈，咁就訓到第二朝啦……
26/1/04 — 一早同個靚妹喺個廳度玩，都唔知佢係咪玩到傻咗，突然話要同我結婚喎，我話唔同佢結，佢就猛喺度扭計話要同我結婚喎……跟住我就引開佢個注意力，叫佢去睇吓伯娘返來未，咁就終止了呢個話題啦。下午我們就搵埋嬸嬸、南南 + 佢個表姐去遊車河。今次我們去了山頂，原本諗住搭纜車架，不過太多人啦，所以都係等肥仔車我們上去……之後，去了九龍公園玩了一陣就去了海運個露天停車塲準備睇激光表演啦。好唔好睇？ok 啦，都係有煙火效果嗰幾 parts 好睇 d 咁囉……其餘都冇咩好睇啦……
28/1/04 — 又返學啦，嗚……好唔開心咁快就返學……放學時，媽咪打俾我話爸爸個銀包和手電喺公司俾人偷了，好奇怪呀呵，喺公司都可以俾人偷到……原來係有個人走入鋪頭度問的士牌價，俾佢見到我 daddy 個銀包和手電放喺枱面度，就帶我 daddy 出街遊花園，叫爸爸行去某地方搵佢個太太喎。之後自己返去鋪頭叫我媽咪俾張咭片佢，再話出去睇吓部車……咁就俾人拎了爸爸個銀包和手電啦……爸爸中途覺得唔對路便行返公司，離遠已見佢走出鋪頭，以為佢打劫媽咪，便跑返去，見媽咪冇事，先發現自己個銀包和手電被偷去……唉，典型的警訊橋段呀，真係大意……睇吓肥仔你仲敢唔敢將個銀包和手電放喺枱面，驚死冇人知咁……唉，媽咪成日都話佢，又幫佢放返入櫃桶度，但佢自己又拎返出來喎，仲話邊有人會偷丫……我話買返個銀包俾佢架，但佢話唔晒喎……
文章定位：
