Wow, 話咁快就 2004 年啦，個 semester break 都就來放完啦，下個禮拜又要返學啦，真係好唔捨得個假期呀……哈！我又咩功課都冇做過啦，真係要奸爸爹！！
呢個假期都冇咩特別，最特別的都係去北京旅行，返到來香港……都係咁啦。
2/1晚就去了搵我個小彤彤玩，初初佢o係電話度叫我過去接佢過來喎，我咪叫佢自己過來囉，點知佢答我：「唔得架，會有人捉我架，你過來接我啦。」結果我同媽咪就o係佢屋企玩到成十一點，o係走的時候，佢猛話要過來我度訓覺喎，佢媽咪我亞嬸就梗係開心到震啦，因為佢可以一覺訓天光嘛。
個靚妹仔第一次過來我度訓覺，所以佢覺得好新奇，o係張床度玩了好耐都唔肯訓，又話要開燈訓喎 (唉，我夜晚一定要熄燈訓覺架嘛)，開了燈佢又猛o係度玩我床頭 d 擺設喎，又問呢樣問o個樣，同佢傾計足足傾了成 45分鐘呀。之但係我又好鬼眼訓喎，叫極佢都唔肯訓，我咪唯有 “拍” 佢訓囉，拍到咁上下，聽到冇聲我咪熄燈訓覺囉。但係，個靚妹仔好 “反訓”，仲 “打橫” 來訓o忝 (咁我點訓呀？？) 佢又成日 “副” 被喎，佢就一覺訓天光，我就成晚起身幫佢蓋被囉……
最搞笑的係佢臨訓時問我：「家姐，你做咩唔攬住我呀？我媽咪攬住我訓架。」咁我咪攬住佢囉，佢就鬼咁興奮咁話：「哈，我攬住米奇老鼠」，咁我就梗係話好啦。跟住佢竟然問我：「你做咩唔攬住米奇老鼠呀？」我咪話：「我攬住了你，咪冇手攬米奇老鼠囉。」點知佢話：「咁你有兩隻手架嘛」……哈，真係唔識俾反應啦……照顧小朋友真係要好多耐性，天下的父母真係偉大！！
3/1個靚妹仔就跟了我們成日，因為我們話帶佢去睇燈飾。咁我梗係要同佢玩和傾計啦，大家知道嗎？我o係唔夠24小時入面，聽了 “巴士爆呔” 的故事有成十萬次咁多呀！！我同佢講：「你咪講過囉」佢跟住就話：「係呀，架巴士爆呔呀，要等第二架巴士呀，冇位坐呀，要企呀，企到我腳軟呀……」你話好唔好笑丫？小朋友就係咁可愛架啦。
尋晚 (5/1) 佢仲搞笑到叫我過去佢屋企同佢訓喎，哈！真係可愛，我鍾意你的程度，真係……唔識講呀，總之見到你、提起你就好鬼開心架啦！不過，過幾年你就冇咁得意架啦……所以，要趁住宜家你得意的時候，就要搵你玩，因為你好快就唔得意啦，到時你亦都唔會同我玩咯。
文章定位：
