咦！都好耐冇寫 diary 咯！等我家下寫返，紀錄返個近況先……
(哎呀！點知個網頁又要做咩升級喎……冇計啦！惟有寫低先，之後一次過 post 返上網啦……)
1) 畢業相終於都影完咯，我最後係俾多 $100租多一個禮拜架。不經不覺都影了好多好多張相，同屋企人啦、親戚啦、朋友啦、同學啦、教會的弟兄姊妹啦、暑期工的朋友啦……結果係影o左成三百幾張相架！！數碼相機的好處就係唔駛用菲林啦，不過亦都係咁的緣故，所以就影了咁多張相啦。我要多謝咁多位同我影相、同我分享我的喜悅的人，多謝晒咁多位呀！我真係好開心呀！Thank you so much!!!!
2) 17/12/03 — 之前講過話 School of Law 個 General Office俾過電話我，我好開心，好想知道個結果。哈哈！個結果終於都有啦！o係17/11/03下午五點幾六點，Robertsons的人打電話來通知我去拎個 Prize，呢個係我入大學三年以來第一個、亦都係唯一一個 Scholarship，真係開心到爆呀！！感謝主呀！！多謝你呢個鼓勵！也要多謝 Zaf你nominate 我拎呢個 prize，thank you!! 我 daddy 和媽咪仲開心，daddy 仲高興到叫我快 d 去買番套靚衫去拎獎o忝……結果我就好豪咁o係 Mastina買o左一套 “New Arrival” 的套裝啦！(唉……認真破費，我不嬲都係等佢大特價先買架嘛！仲要買多個衫去襯喎……)不過算啦，daddy 叫到，佢又鬼咁開心……哈哈！最後，我o係28/11/03下午五點上o左去 Robertsons度拎獎啦，由大老細頒獎俾我，不過佢實在太忙啦，只係傾了幾句計，影了幾張相，前後加埋都唔知有冇十分鐘，佢就走了啦……夜晚就同 daddy & mammy去了西九龍食飯。之前我要返學校拎 d o野，所以就自己搭車去西九龍會合佢地。結果……非常白痴的事發生啦——我又o係長沙灣出地鐵啦 (都唔係第一次啦)，唉……搞到我行o左好耐先行返去西九龍……仲要之前架地鐵o係深水步去長沙灣中間o個條隧道度停了成十分鐘喎……認真傻傻呀！！如果冇落錯車咪唔駛無辜辜咁行幾條街，又唔駛無辜辜咁困o係架地鐵度成十分鐘囉……以後真係要記住西九龍係o係深水步出地鐵呀！！
3) 15/12/03 — Hurray!!!好開心呀！考完試啦！當日下午 1:15pm SLW的PCLL為我們搞了個 Christmas Party，亦為慶祝大家考完試的，不過我們三個又冇去到啦……哈哈！但我們結果都係成四點幾先離開又一城，因為我們o係度傾o下計，食o下飯咁就成四點幾咯……我們都有自己的 Christmas Party，都有慶祝大家考完試架！至於考成點呢？就真係唔知啦……是但啦，都考完咯……遲 d 咪知囉……交託給神啦！！
4) 16/12/03 — 就o係屋企 hea o左成日啦，都有 upload 番 d 相上網的……夜晚咪執 晒d 冷衫出來囉，因為 18/11/03我會同媽咪去北京旅行，主要都係因為媽咪愛子心切，成大半年冇見過個大仔，所以要上去見o下佢囉。再加上佢成日話自己冇試過o係新機場搭飛機，今次就一次過滿足晒佢兩個願望啦！不過，家下北京零下十幾度，咁怕凍的我唔知會唔會凍死呢？？求神保守帶領我們的腳步，賜給我們平安！
5) 23/12/03 — 感謝主！賜給我和媽咪平安的腳步，北京之旅好好玩，雖然係凍了 d ，之前又去過，但感覺真係好好 (冬天和夏天個 feel已經唔同啦)，況且有 d 景點我上次都冇去過。而且今次又同另一班人一齊去，所以感覺唔同，但真係好好，起碼叫做識了班朋友先啦。見到哥哥和亞嫂，最開心的當然係我媽媽啦！！哈！我理解的，五日的行程，只有一日係冇見過亞哥o者，仲要日日都有電話聯絡，媽咪梗係開心啦！！雖然只係五日，但俾媽咪見o下亞哥，又睇o下佢上邊的生活環境，相信媽咪都安心好多 (當然，如果佢地兩口子返來香港，媽咪就更放心啦！！)
好啦！都係時候講o下北京之旅啦：
天氣方面 — 雖然北京係凍 d ，第一日落機只有零下一度，咁怕凍的我就梗係覺得好凍啦，不過事實都唔係想像中咁凍，可能係有備而來，再加上姑姐借俾我的羽絨褸，著到自己成隻椶咁，所以都 ok的。係 d 腳趾仔好凍囉，著兩對襪又凍，著三對又覺得對鞋頂趾喎……哈！真係麻煩。不過北京呢幾日都暖返 d，所以有d 衫我帶了上去都冇著到，得過 “拎” 字……最可惜都係冇落雪囉……可惜可惜……
團友方面 — 今次我們一行十六人加一個香港領隊：當中包括一對姐妹 (姐姐係住o係馬來西亞的華僑，妹妹就o係澳洲做醫生的)、一對香港夫婦 (太太係柬埔寨華僑)、一家三口來自美國三藩市的華人、一行五人來自美國洛杉磯的年青人(三個姐妹 + 兩個男朋友，男朋友都係兩兄弟)、一對來自雅加達的夫婦 (佢地兩個最鍾意買o野，我諗係因為佢地o係雅加達賣o野，所以想o係北京入 d 貨返去雅加達賣卦，所以佢地永遠都係最遲上車的團友，佢兩公婆好搞笑，國語識得少少，英文又識得少少，但我們又唔識講印尼話喎，所以我們都好難同佢地溝通；佢地兩個又成日分道揚鑣咁行喎，見到太太就要搵老公，見到老公又唔知個老婆去了邊，真係好搞笑 ) 最後兩個咪我同媽咪兩母女囉。
另外，大家都知我買了部新的 DC 啦，新的o野就梗係對它 “愛護有加” 架啦，點知我o係 “明十三陵” 度，一下唔小心，跌了部相機落地，雖然佢仲 function 得好好，不過個殼就俾我跌到凹了，唉……真大意……
最難忘的就係星期六晚我們一行十一人走了出去行夜街啦，o係晚上七點半分三部的士出發。首先係俾酒店服務員點了我們去一個叫 “燕莎購物中心” ，它可以話係香港的 SOGO，所以我們逗留了約十分鐘就打的去 “王府井” 啦，但我們唔記得約o係咩地方等，你知啦，”王府井” 話大唔大，話細又唔細喎，成條街咁長真係唔知點先撞得番， “失散” o個批又冇電話可以喎，結果要成九點我們先齊人，便行入 “王府井小吃街”，哈……我們o係o個度都逗留了成個鐘，冇計啦，單係第一間鋪頭對印尼夫婦都逗留了好耐，如果唔係我們要行，我諗佢地仲可以留耐 d，慢慢買o野o忝呀……然後就去了附近一間教堂影相。跟住就再打的去 “三里屯酒巴街” 啦，因為一家三口o個個仔好鍾意飲酒的，餐餐飯都要叫一枝啤酒飲，所以我們就陪佢去啦。入了一間叫 “蘭桂芳” 的 bar 度叫了一打啤酒，個個都有飲，只係三姐妹中的亞妹、媽咪和我冇飲酒，hehe我們飲果汁，哈哈……。其實印尼夫婦都唔想飲，叫了可樂，不過我們之後玩 “摸鼻哥”，佢輸了就要飲啦。媽咪都有輸到，不過佢只係飲果汁o者。到十二點我們就打的返酒店咯，因為星期日我們會去亞哥度住，所以我們要執行理，搞到成點幾先有得訓……。哈，我咁大個女都冇入過 bar，記得上次去北京，其中一晚的行程係放了我們o係 “三里屯酒巴街”，我同兩個朋友便由街頭行到去街尾，之後就叫的士離開，估唔到今次會入bar，仲玩了成兩個鐘o忝……
去到哥哥o個度，就由佢帶我們周圍去逛逛，不過，應該去的景點我們都已經去了，所以都係周圍行o下，去商場、批發市場買o下o野咁，星期一佢送我們到機場，等埋我們 meet 番 d 團友佢先返屋企。
另外，搞笑的就係我們回程的時候，班機有百幾個位，但只有三十幾人乘搭，所以我們鍾意坐邊都得 (除了 First-class) 真係得意……
今次都冇乜點買o野，主要都係幫人買：幫姑姐去 “寶樹堂” 買藥、幫亞叔買對棉鞋去洽爾濱旅行、仲有就係幾份手信送俾 d 親戚的，因為我畢業佢地都有送o野俾我，我話請佢地飲茶，佢地又話唔晒喎，所以就一個家庭一份小手信啦。至於我自己呢，就因為咩都冇買，結果就臨走o係機場等上機o個段無聊時間買了隻熊貓公仔啦，哈，總算有 d 收穫！o係機場等上機的時間，冇o野好做咪同團友傾計囉，笑料就係咁爆啦……真係好開心！
總而言之，呢個 trip 真係好開心，都算識了班新朋友，希望可以 keep 住聯絡啦！Thank you, Lord!!!
文章定位：
