寫文寫到文學獎 Lîm Tong-îng
真歡喜得著人生的第一个文學獎。散文創作〈朋友〉著今年「年雲林縣文學獎」的「優選」就是第五名。這个散文獎是無分華文、台文，入獎有5篇，首獎佮我這篇是台文。雖然是吊車尾，仝款是坐上車起行， 這是我台文創作的路站碑（milestone）。上蓋值的是用阿爸阿母的話－－台語文創作的， A̋u（阿母）若是猶佇咧，一定會共這个獎提去囥佇紅格桌頂，辦一桌腥臊向祖先秉報。這一切攏是天公伯仔的看顧佮濟濟人的幫贊。
踏入日本經典小說的台譯，人生的頭本冊《羅生門：芥川龍之介短篇小說選Ｉ》台語版就佇2024年出版。審稿的時，鄭順聰先生毋知是佗一條腸仔想著，叫我對芥川的八篇小說，逐篇攏寫一篇「導讀」佮「連想」。實在講，干焦台譯就做甲烏天暗地、步罡踏斗(pōo-kong ta̍h-táu)，台譯做會好就謝天謝地，根本就無彼个心情閣寫彼。鄭順聰先生是我台譯的恩情人，並無放棄一直鼓勵兼鼓吹。到落尾是硬共瞪出來，毋過逐篇攏是短短仔，家己嘛毋知寫了是好抑毋好。
《羅生門》台語版出版以後，讀者見面會、宣傳等等完成以後的10月尾，就繼續做台譯佮精進台語文。毋過，心肝穎仔彼个「欲共過去的一寡仔經驗、有感覺的寫出來」的心聲就定定會浮出來。「順其自然」是退休以後的宗旨，就按呢佇台譯的閬縫，想著啥就共寫出來。講真的，寫文實在是毋捌半項，寫出來的物件就無技巧，人講的文學性嘛攏無，就莫講「普世價值」矣。當然是加減揣冊來看，看人按怎寫。寫一站仔以後，共文章提來看、家己煞掣一趒，這款文章哪會看口得，感覺誠見笑就毋敢閣寫。同時「干焦台譯若做會好就阿彌陀佛矣，閣著操煩寫文，何乜苦咧！」的聲音就閣浮出來矣。
不而過，經過一站仔，心肝穎仔彼个想欲寫的心聲就閣浮出來，毋甘願就閣想著啥就寫啥。就按呢，兩種聲音、兩種倒反的意志一直按呢咧互相搝大索、搝來搝去，就是寫一睏仔歇一睏仔咧輪廻。這个過程中，若有佮鄭先生相拄，伊攏會問我寫了啥款，彼是一種咧鼓勵，其實是一種壓力。伊就建議寫好就去投稿，譬如報紙副刊、雜誌抑是文學獎。一聽著就想起少年的時學日語，學到一个程度就去參加教育部的「留學語言測驗」是仝款，予人來鑑定試鹹汫這嘛佮退休以後學台語文的讀寫，學甲一个程度去參加「台語認證」仝款。就選感覺較好的文投予報紙的副刊佮雜誌。坦白講，家己的程度參加文學獎是猶無到格、猶早咧！
翻轉年的春天，彼篇「一工開始的儀式」得著《臺江臺語文學》的採用（54期，2025.5），予我較有信心，就較認真寫。 鄭先生知影就鼓勵我投文學獎，拄好是逐年文學獎投稿的季節。六月底《自由副刊》來通知講彼篇「枴仔」欲採用，予我愈有信心，就揀較合軀的文投文學獎，心肝當然是毋敢期待。當今的文學獎，有台文組無幾个，會投的就攏投。
10月初，彼篇「枴仔」佇自由副刊刊出來的彼一工，雲林文學獎的承辦人敲電話來通知：〈朋友〉得著「優選」，聽著心肝是足暢的。這个世間就是遮爾趣味，無人會知影：啥物時陣會發生啥物代誌。世間事，䆀事會連紲來，好事嘛會相𤆬做伙來。
這个獎予我足大的鼓勵，本成是干焦欲共「台譯的工課」這項做予好就好。寫文是欲練筆尾，想欲予台譯文閣較媠氣。只是想欲佇閬縫的時，共一寡記持佮經驗寫落來，無疑悟寫仔寫，煞寫甲著文學獎。應該是天公伯仔閣加一个任務予我。天公伯仔的交代，我就繼續做落去。 （了）
（《海翁台語文學》第290期，2026年2月p99）
文章定位：
