真係激死人啦！部傻瓜機壞了，一心諗住買部 Canon數碼相機來影畢業相，結果畢業袍拎了，但部數碼相機就壞了(一開機個鏡頭收番入去，然後出現E16 code)。25/9買機，18/10拎去維修，超級搞笑地由屯門拎到去 Hung Hom整，點知部機又冇事喎，一場去到咪放低部機俾佢 check 囉，費事畢業禮時影唔到嘛。一個星期後佢打電話叫我去拎機，話check過部機冇事，function as normal，我咪o係30/10去拎返囉。1/11約了同學影相，點知31/10晚開機，又出現 E16的情形，真係激死人，咁1/11做完 Advocacy 2nd assessment 咪再過去Hung Hom，要求佢換機囉，唔換就退錢。點知維修部個同事答我：「咁部機我們 keep住先，manager 今日放假，我星期一通知佢，叫佢盡快覆你。」我咪窒佢話：「manager 放假呀？我都好忙架，都係今日星期六放假先得閒來整機。」我再問佢究竟盡快即係幾時呀？佢再答我盡快(唉……根本就冇答到我個問題) 我梗係唔放過佢啦，迫佢俾個時間我，我話我趕住今日用，特登買部機來11月用，家下用唔到，唔係叫我買部新機，要我用部舊機o下嘛……
大家拉鋸了好耐，佢都係o個句：「manager 今日放假，我星期一通知佢，叫佢盡快覆你。」我問佢拎manager 個電話，等我直接同manager傾，佢先話會叫manager星期一覆我。我再問佢如果星期一收唔到電話咁點？點知佢俾佢個電話我，話有咩事搵佢都得喎。真係搞笑，你搞得掂就唔駛搵 manager 啦！之後佢再好大方、好體貼咁話借部機俾我用住先，用來解決我眼前的需要喎，真係感動到震呀……
好啦，今日亞 manager 打來，佢話：「唔好意思，部機真係有 d 問題，我們之前 check 唔到，不如我們幫你換過個機膽丫……」我梗係話唔得啦，你可以換得個機膽，咁我駛乜買 Made in Japan呀？Made in HK都得啦！都唔知佢有冇 sense架！況且，我點知你係咪真係有換到架？佢又答我：「咁等我再同我個上司傾o下啦，我盡快覆你」我頂唔順佢呢 d耍我的招數，咪話：「你有冇搞錯呀！我山長水遠由屯門拎部機去 Hung Hom俾你們整都有兩次啦，家下要換機都搞咁耐，擺明o係度拖我時間啦。」點知佢答我：「真係唔好意思呀，我們唔係想拖你時間，因為呢度始終都係維修部，要換機唔係我們負責，我都係要同我的上司傾」。我咪話既然唔係你負責，咁你俾換機o個邊的電話，或者你上司個電話我，等我直接同佢地講，唔駛轉來轉去咁麻煩，佢又唔肯喎，只係話會盡快覆我，或者今日夜d覆我喎……結果就梗係冇覆到我啦……
真係激死人呀，Canon咁大間公司，一早就應該將客人 refer 到有關部門去處理問題啦，點會搵 d 唔關事的人走出來架？下下話要問過 manager、要同上司傾，都唔知有冇誠意去解決個問題架？仲要 d managers一星期只係返五日工，真係恨死隔離呀。都唔知有冇搞錯，佢都算係服務性行業，點會放 weekend架，d人weekday要返工，都係得weekend先得閒去整相機o者，諗住可以o係 weekend settle到個問題，點知你話manager放假喎，離晒大譜！manager放成個禮拜假，咁你係咪咩都唔駛做，等manager返來先做？不如唔好開門，索性成個 office d staff一齊放假啦……
唉……離晒大譜呀，激死人呀！我即管俾多兩日時間你，星期四都換唔到部新機俾我呢，我就要退錢，唔退我就告你，去 Consumer Council投訴你……咪以為我成個靚妹咁就易蝦先得架！
文章定位：
