又係時間來講講我的近況啦。
首先，講講新年願望先啦，哈哈，我希望大家都身體健康、平平安安、龍馬精神、心想事成、萬事如意、步步高陞……哈哈，今年年廿八的晚上，與家人吃過團年飯後 (由於年廿九就出發去泰國旅行，所以團年飯提早一天食)，便走咗去屯門個花市買風車啦。哈，唔知由幾時開始，我堅持新年要在花市買一個風車，今年買咗個七彩顏色的布質風車，放咗响我間房個筆筒度。哈，好奇怪呀呵，過去兩年我都將風車放响露台度架，讓它可以不時轉呀轉，但舊年响過完年冇耐就被風吹咗落街，所以我決定今年放返入自己間房，得閒咪自己拎來轉吓佢囉，哈哈。
_____________________________________________________________________
响農曆新年 ( 28.01.2006 – 01.02.2006) 我們一家四口去了泰國旅行，行程都算愉快。而當中難忘的有：
(1) 响大年初一 ( 即 29.01.2006 )，當我騎完大象後，再坐上象牙影相，再去燒槍，然後返上旅遊巴士出發繼續前往 Pattaya時，赫然發現在 2005 年12 月31 日新買的手提電話 Nokia 6230i 唔見咗！！我即時諗起應該係我將部電話放响褲袋度，但在騎大象前又唔記得放番入個手袋度，由於騎大象時搖得好勁而跌咗……當時，我真的好擔心，唔理其他團友的感受，死都話要落車搵。香港導遊試圖打打電話給我，但發現我的電話經已關掉，點算？部電話新買架，用咗一個月都冇呀，點可以唔見架？跟住就同泰國導遊和細佬落車搵，當泰國導遊一問生果檔的老闆後，就叫我們即刻去騎大象的地方，仲叫我們俾 $100 泰幣當作酬勞喎……之後，我同細佬企响騎大象的地方等候，(我就好鬼心急，唔知細佬係唔係)，見到剛才騎大象的“象夫”，以為係佢執到啦，點知佢一臉茫然，唉，咪玩啦，係咪真係搵到架？咪嚇我啦！好好彩，隨即見到另一“象夫”施施然咁騎住大象過來，再還番部電話俾我。wow，真的感謝神！失而復得的感覺真的好好！真的感謝主，响被我發現至尋回都只係 5 分鐘的時間，都算快囉！感謝主！更奇妙的是，當晚《靈命日糧》的靈修題目是「感恩的重要性」，哈，真的感謝主！
(註：當我尋回部電話時，部電話係開着的，所以我相信一早已有人執到我部電話，然後關掉，如果冇人去搵番部電話的話，佢地就會據為己有。不過，唔緊要啦，最後我都搵番部電話，更重要的是當我一話唔見電話時，“象夫”便立即歸還電話，講真嗰句，佢地可以唔出聲，唔一定要拎番部電話出來架。仲有，就係多謝兩位導遊，細佬和其他團友，唔好意思，打攪晒！hehe……)
不過，大頭蝦的我剛剛跌咗張信用卡 (哈，唔知响邊處跌咗，相信係早兩日响 Delifrance 買現今劵時跌咗)，尋日先發現，然後打電話去 cut 咗佢，好彩上網 check 到應該冇被人簽到我張咭。哈哈，都唔知張咭去咗邊，搵唔到啦，惟有cut 咗佢囉，好彩唔駛收 d 咩補發咭的 admin. charges 啫，不過就要等 4 – 5 working days 先拎得番張咭……)
(2) 响芭堤雅的珊瑚島上玩水上活動，有降落傘、海底漫步、香蕉船和水上電單車。好好玩呀，真的好好玩呀！响海底度餵魚食麵包，好多好多魚呀！响我的每張相入面，我塊面總會有只少一條魚架，哈哈。我仲捉到一條魚o忝呀！！仲有摸珊瑚、海膽呀！原來如果你順方向掃海膽的刺，係唔刺手架，仲可以掃出 d黑色的色素架，但如果你反方向咁掃海膽的刺，就會刺手啦。哈哈，真的好得意呀！好好玩呀！yeah！
(3) 响 Pattaya，當 d 團友去做 spa 時，我同媽咪和細佬去咗Royal Garden Plaza 入面玩 “Believe it or not” museum 同鬼屋，wow，個鬼屋好好玩呀！好嚇人呀！正呀！
(4) 响Sriracha Tiger Zoo 餵老虎飲奶呀！佢好得意呀，係咁整低我隻手去飲我手上奶樽的奶，哈，真的好得意呀！但如果佢再細隻番 d，就更 perfect 啦！另外，公園入面的“賽豬”都幾得意呀，當然見到班小朋友同 d 豬一齊賽跑，有 d 更跑到鞋都甩埋就更加搞笑，哈哈！睇人餵鱷魚都幾得意架。
(5) 最後，就係回程班機 delay咗啦。原定應該在 01.02.2006 香港時間晚上 10點左右抵港的飛機，我們結果要在 02.02.2006 香港時間早上 5:30左右先抵港，幸好我事先請多一日假，03.02.2006 先返工，唔係的話，返到屋企要 6:00 a.m.左右，都唔駛瞓，就要換衫返工咯……班機一共 delay 咗 7.5 小時，每人可以 claim 番 HK$250.00 的保險。哈，HK$250.00就要我們响泰國機場呆等成十個鐘，都幾難頂架！成零晨一點先上飛機，哈，我連飛機餐都冇食，只係瞓，哈哈！返到屋企，我們四個咩都唔做，只係刷牙同洗面，跟住就各自返房瞓覺，goods 呀！
_____________________________________________________________________
03.02.2006 年初三返工，當晚公司春茗，本應我係唔需要坐埋去老細圍枱度的，點知班老細嫌亞 Ben 大吃，所以結果我都係要坐埋去……好彩剛剛去完泰國，有 d 話題咁啦。
_____________________________________________________________________
有單 personal injury case not to be warned before 06.02.2006，在張 warned list 上單 case 排到第十幾，冇諗到咁快會 warned 到架！點知，响 07.02.2006 中午前，收到 The Honourable Mr. Justice Suffiad 個 clerk的電話，話單 case 翌日 warned 到喎……唔係卦？咁快？結果下午便要同 client 和 counsel 開會，之後兩日要上 court 咁囉……不過，呢單都唔算係 d 咩 trial，因對家响 07.02.2006突然話 admit liability，所以要審的都只係 assessment of damages，都冇打到 liability……唔知响完 traineeship 前有冇機會真真正正上一次 personal injury 的 trial 呢？
_____________________________________________________________________
放完年假到現在，真的好鬼忙，都冇停過，不停跟 Teresa 上 Master B. Kwan 的 checklist review，佢話我係 lucky star 喎，每逢同我一起上 B. Kwan 的 checklist，都唔會俾 B. Kwan 鬧喎……哈哈，所以林律師都要拉埋我一齊去。又不停去同 counsel 開會喎，新年後返工唔夠一個月，已經上咗兩單 trial、一個 closing submission、開咗三個 counsel meetings……唉！跟住又不停做 translations喎，救命呀！ 02.02.2006瞓醒覺後就開始幫 Teresa translate六份 witness statements，之後 translate番自己個 file 的一份成二十頁的 witness statement，結果 translate咗成三十版出來呀，仲有幾份 documents，諗住做完啦！可以開始寫番份中文的 witness statement 和兩份 advice on liability & quantum 啦，點知，葉律師又話要幫手 translate 喎，我要負責 translate 4 頁 court transcripts，transcripts 即法庭謄本，即係你响法庭度講乜，佢就打番出來，所以好多時 d wordings 好奇怪和好“kiu 口”，你知啦，我們平時講嘢好口語化架嘛 (哈，就好似我 d diary 都好口語化咁) 哈，救命呀！d 咩文來架？第一句係“呢個敷衍式咁樣樣”，哈，真的唔知點 translate 佢先好……
點算？剛剛都叫做完成咗份 translation 和一份中文 witness statement 的 1st draft ，希望今晚可以完成佢地，聽日要開始寫 advice 啦！唉，呢個星期要上四日 court……希望 d 嘢做得幾多得幾多啦，哈，都冇可能做完架啦……仲要剛剛 assign 咗幾個新 files 過我o忝……哈，盡力啦……做唔切都冇計啦……Kelvin，我七月尾走咗之後，d files 就靠你啦！唉， d theft of vehicles 的 files 都冇郁過……(好無奈！)
_____________________________________________________________________
都係時候要搵工啦，唉，真討厭，真的唔鍾意搵工、見工呢個過程，唉……求主帶領，賜女兒一份合適的律師工作，坦白講，我的知識好有限，仲有大把嘢要學，真的有 d 擔心 admit 咗之後要自己 handle 一個 case 的難處和壓力……求主垂憐，賜女兒信心和能力去面對和應付，仲有就係能適應新的工作環境和同事。
哈哈，如果大家知道有邊間 firm 請律師的話，要係做得過嗰 d 呀吓，咪玩我呀！記得話俾我知，等我去 apply 吓，哈哈， ok？ 唔該晒！
_____________________________________________________________________
好啦，要恭喜 Teresa 個秘書 Alice，佢會响 03.03.2006 結婚呀！恭喜晒，祝你和丈夫相親相愛、白頭到老、永結同心、百年好合、三年抱兩……恭喜晒！之後去北海道度蜜月，wow，好 sweet 呢！恭喜晒！咦？唔知03.03.2006 婚宴當晚，我係咪又要坐埋老細嗰圍呢？哈哈……
另外，都恭喜珊珊，佢話出年年尾結婚喎，恭喜晒！上述的祝福說話同樣 apply 响你和丈夫身上，更希望你倆能在主的愛裡建立一個幸福家庭，恭喜晒！
_____________________________________________________________________
最後，為著一 d令人傷感的事禱告，包括埃及車禍、海難，本會泰國宣教士的葉師母的逝世，主呀，眼見萬事皆操控在你手，更知道自己的渺小和卑微，求祢叫女兒及女兒一家能緊緊的倚靠祢，求祢復興我們渴望祢、追求祢的心，甘心樂意的為主事奉，為身邊的人 (特別是爸爸) 作見證，要知道單是自己相信是不足夠的，我們需背負並實踐將主的福音傳遍萬民的使命，主呀，願祢的旨意成全在女兒身上，求祢叫女兒能毫不猶豫地順服，求主垂憐，阿門。
文章定位：
