19.8.04 (星期四)
今晚去睇餃子，好失望……越期待既既戲竟然係咁差勁! 上次咪江湖囉~ 唉! 重知睇三更2啦! 起碼重有兩套日韓電影好似好少少咁……至少韓國個套有李柄憲做呀!!!! Ar……………!!!!! 琴晚簡直係睇緊一套三級情慾片囉…… 睇住千fa就想笑囉! 都係白靈好戲d! 梁家輝隻跛腳都好堅下喎! 呢套戲係比較血淋淋，搞到我冇咩食慾，手上既零食係原封不動，連支檸檬茶都係飲左半支都冇……
出戲院門口，真係要行快兩步，唔好人知我岩岩睇完餃子囉~~~~~~!!!!!! 行去翠華醫肚，唸左好耐唔知食咩好! 跟住我同阿虫表妹發現有波菜餃喎......應該冇記錯係…重知係餃啦! 想唔想食呢??
我突然間有個突然好富貴既表妹……k700i 無貨喎! 我突然間又好似好富貴咁買左k700i都有一星期，又去左H2O買洗臉野...點知! 唔好提... 虫表妹係我買左之後成日勁講唔好比我見到我用呢個電話，又呢樣個樣……因為佢好想換電話囉~
返到屋企，同阿聰傾左一陣都唔知幾耐既電話，哈~ 我幾時突然熟到同佢有咁多野講架? 佢簡直又係一個咀榮既化身! 佢突然話悶叫我出黎睇餃子，"我睇左啦~!" “咁快!?!” "不如等睇三更2吧啦!" 加上就黎都12點重叫我出街，又玩呀!! 佢又話比我知咀榮今日又去睇喎! 哦! 你個死仔呀! 又話唔睇又走去睇!!! 沖完涼，死都要睇埋今晚集楝篤神探先訓，差不多都點半……好眼訓呀! 之後又有個勁豬事八卦既輝龍懶係關心問人做咩重唔訓，你好乞人憎呀又叫人做豬頭! 再叫殺左你!
20.8.04 (星期五)
食完lunch，我帶左Panda去老闆娘到修甲，呀~ 我真係好耐冇去老闆娘到，因為懶得行過去西九龍中心，你知下晝幾熱架啦~ 我今日又試左樣新野，古法線面! 呀~ 今次係線唇! 都冇我想像中話真係好痛，但係Panda試完勁標眼水……hahha
唔…係我地最不受歡迎既排行榜入面Henry Luk同八婆許經惕除後，今次又有新成員，串爆女殺手Melody同貌似廖秀冬既Rosanna，嘩! 簡直係天生一對啦! 一個我公司air dept，一個係CLP接Janet捧睇我地a/c既人! Melody把口不嬲都勁串爆，冇人頂得佢順，連Panda新黎都中招! 唉~ 點解我突然又惹返呢個人架! 我好耐都冇同佢接觸架啦~ 黑仔! 而Rosanna連髮型都似冬冬，塊面撻左成寸厚粉，唔係你行埋黎搵我我平時都唔覺架! 嘩! 衰d講句幾似拍緊倩女幽魂既姥姥!!! 重要新上場使出一招下馬威，喂! 阿嬸! 我地唔受呢招架喎! Sam哥聽到我同Warly講比姥姥生擒，即係打黎問我佢係乜水咩post?! “講野咁X交差Y既?”…… 未來既日子我地都唔知點死，對住個咁既人……
哈~ 呀富貴表妹終於比佢向西環間3買左部K700i，即刻報喜訊比我! 銅鑼灣重要等成3個星期先有貨! 今晚咀榮又比我炳左一小穫，佢話因為有朋友生日迫住佢睇餃子，完全係一套垃圾，我終於有樣野認同佢hahaha!
隔離屋新搬黎個男戶主今日發生交通意外同人發生口角，繼而拉人出黎打，然後冒警! 點解我知咁多野，因為有個蘋果記者問我識唔識個家人，初頭我以為呢個人係推銷員之類，冇點理佢! 因為佢初頭又問我有冇大人係屋企，我想講24歲算唔算成人!? (當然冇咁做啦!) 我老豆睇緊電視背住我，以為我用緊web cam傾計，點知老豆聽到我講野好似唔對路，點解成日都聽到我講我唔識個家人，又問人發生咩事d咁正常既野係我把口發出! 然後老豆同個記者傾得好開心，因為老豆又係想知咩事睇下個記者想做乜野? 然後記者哥哥話佢今日冒警點點點，然後老豆就好認同佢，係呀!........................ 佢成日都話佢係警察黎架………下刪唔知幾多字，兩個人傾得好開心，話時話個家人呢排都唔覺得佢地出現喎! 但係睇完”神探”後成家返左黎喎! 但係哥哥仔又走左喎! 淨係記得叫我地聽日睇報紙! 最好笑既係個記者同老豆自我介紹既時候，佢話比人知我地都係睇蘋果架! 我想問老豆講左比人知，咁係咪有免費報紙睇架?
Photo: 情慾餃子
☆ 有精神分裂就睇下醫生啦~ 唉…不知所謂
☆ 點解我好似越來越憎呢個人……心個句? 口個句?
☆ 填~報~稅~表~~~~~~~~呀~~~~
☆ 星期日去澳門~ 好野!
文章定位：
