星期日凌晨，我個肚突然好痛，起初我以為自己發夢，因為發夢夢見我唔知玩緊乜整親好痛! (咁迫真~!?) 再目訓，又好痛! 起身去廁所，又唔係喎! 又爬返上張床，重係咁痛既，重要係越黎越痛，入廚房食必理痛...跟住痛到喊叫阿媽起身，然後阿媽同我查藥油，都幾舒服下，跟住就訓著左...其間我都重有痛! 但係好眼訓......
第二朝起身，好鬼痛，無理，換衫返工...終於頂唔順好似隻蝦米咁訓左向地，等老豆黎救命! 打電話約時間睇醫生，唸住睇完就返工啦~ 鬼整姑娘話醫生今日要10點9先返，好...唯有等! 然後又訓左... 到阿姑娘打比我去睇醫生，醫生話我胃抽筋喎! 唸住冇咩野啦~ 不嬲腸胃勁差既我小意思啦...係好痛o者! 止左痛就得啦~ 醫生話開d特效藥比我，等我個胃舒服d! 飛的返公司食藥先，然後做埋d緊要野先啦! 今日阿Step開始放假，所以我會多左野做! 返到公司都差不多11點左右，搞搞下已經lunch hour，食埋頭先個半個飽再食藥休息一陣啦! 到兩點個陣我都冇咩野既...小小痛梗有，開始面色蒼白，我以為食完個d白色藥色冇抹咀先白啦，抹左無耐，Panda話你好面青口膏白喎!不如返屋企啦~ 其實個陣我唔覺有咩野! 差不多4點幾我頂唔順忍到5點走人，又係飛的啦! 我成個人開始好軟，返到屋企前姑娘打黎問我有冇事，我話重係好痛，但佢冇反應只係話你有事就打返黎再睇啦! 上到樓，勁痛~ 突然有一股胃氣想......嘔......終於嘔得出啦! 好辛苦~ 阿媽返黎再覆診，點知阿媽同醫生講要我打針，我話唔打...死都唔打! 醫生都知我好怕打針，點知醫生話少少痛唔怕重好過痛一晚，重要唔知幾時痛完，加埋阿媽把口，我喊住話唔打針，最後都係要打! 姑娘就笑我成機撒嬌，好魚囉我! 我呢世人最怕打針，我真係會喊架! 但係打完真係好好多...... 返到屋企食完通粉食藥沖涼，然後一覺天光~~~zzzZZZZZ 完全唔知個晚發生咩事，淨係聽到阿媽又同家姐佢地講我唔肯打針喊，真羞家!
星期二食完藥換衫返工，但我重見暈暈地，以為藥力未散啦! 點知又黎扮蝦米，最後老豆陪我入Q.E睇急症，無良老豆重話行去Q.E好唔好，玩野咩! 因為係屋企去Q.E.好近，行係最快，搭的士要兜路，最後都係行到去搭103個到搭的士，因為唔洗兜直路轉上就係急症室，多謝15蚊，老豆話唔好意思叫司機收16蚊，不如收20蚊啦!!!!!!!! 收多一蚊都唔知多謝你好唔好!!! 加陣睇急症比以前很麻煩，重好耐，一睇就睇左三個鐘! 中場當然我訓左啦~一個鐘頭後我終於見到醫生，其間醫生重有一個病人，只係拉埋個簾，但係好大聲講野，即係係個幾格既人都知個個人發生咩事，醫生見到乜野既人就問乜野標準問題，好流暢...... 我只係答有冇...答答下亂左，因為醫生問有冇食煙飲酒，我答冇...下一條...咪住! 我有飲酒，不過係星期五韓燒個日既事，完全都冇乜關係，只不過醫生問我呢幾日，咁我咪當星期五都係呢幾日囉! 重有一條我唸唔到會問既問題，當然係冇啦! 不過係奇怪又咩關係!? 醫生要我打針，我話又打呀! 我琴日打完可唔可以唔打! 佢就笑住話唔打唔得! 我話唔打都唔打啦，因為好痛! 新手姑娘打針，痛到我大叫好痛，識唔識打針架!!!! 我又唔記得之前同佢講我打完針會暈，係我大叫完著返好條褲，我已經跪左向地下，姑娘嚇到撲埋黎扶住我出去搵老豆，然後有個藍色衫既阿姐話你個女係怕打針先驚然後暈，無野架! 跟住我就聽到老豆好細聲話"贛居! 你都傻架!".........
無幾耐眼前變返彩色電視，之後又返要驗尿，又唔知點樣老豆同綠色衫既阿姐發生輕微口角，老豆當然冇繼續啦! 唔係有排等! 搞下搞下都好耐lu~ 又要見返醫生覆診，又要落返樓下等拎藥，就係咁一個上晝既時間去左睇"急症"!
已經迷迷曚曚......都唔知呢幾日做過d咩，淨係知食完野，好胃就好痛~~~~~~
Photo: 好難食的白色藥水&勁難吞到落肚既藥丸...(因為非常口乾難吞!!!)
文章定位：
