24h購物| | PChome| 登入
2023-01-11 08:40:31| 人氣740| 回應0 | 上一篇 | 下一篇

《台語極短篇》做小生理嘛著愛有責任感

推薦 0 收藏 0 轉貼0 訂閱站台

賣包仔、饅頭的固定拜四會來公園今仔日早起,我佇邊仔排列等的時,一位老阿伯無好聲嗽共賣包仔的少年家講:「你頂禮拜哪會無來?」「歹勢,我去花蓮旅行,我叫是阮老母會來,想袂到伊無來。」「頂頂禮拜你嘛無來!」「歹勢,彼日落雨;落雨天阮攏袂來。」「落雨天敢就免食早頓!阮慣勢食你的包仔,你無來,阮欲食啥!」

我感覺好笑,細聲講:「免食。」

買人的物件慣勢,賣的人煞著愛為你負責,這款心理真心適。可能少年家認真會失禮,老阿伯氣勢才愈強,提著包仔,猶那行那踅踅唸 「做小生理嘛著愛有職業道德。」

在我的心內,這家人算是真有職業道德矣。In的產品甜的、鹹的幾若種,好食,價數也公道。而且,自我開始共in交關,兩三年來,若好天,攏會當買著;不過,若傷慢來,買無是你的代誌。

In也真親切,喙甜,問阿姨/阿伯/大姊今仔日欲食啥?起頭查某囝來,伊生做媠媠仔,也真時行,一遍看伊鬥假目睫毛,我呵咾,伊講in媽媽有時也鬥,「和我仝款愛媠。」過後因為伊生囝做月內,換老母來,正經伊也鬥假目睫毛;這位阿媽早結婚,才四十外歲。

舊年開始,換後生來;伊和媽媽、阿姊仝款,也喙笑面笑。而且,也時行,頭毛留中間的,兩爿剃貼貼,是一位飄撇的少年家。

In的生理做袂細,有店面愛顧,閣愛供應固定的寺廟;落雨天, in想講來公園運動的人較少,無出門,也真合理。所以,每禮拜四,我會先看天氣,好天才出門;這是我該負的責任。

《聯副2023/1/11

 

台長: Liu 靜娟
人氣(740) | 回應(0)| 推薦 (0)| 收藏 (0)| 轉寄
全站分類: 圖文創作(詩詞、散文、小說、懷舊、插畫) | 個人分類: 2022起台文作品 |
此分類下一篇:《台語日常》若掠水雞的
此分類上一篇:《啥人是購物頻道?》

是 (若未登入"個人新聞台帳號"則看不到回覆唷!)
* 請輸入識別碼:
請輸入圖片中算式的結果(可能為0) 
(有*為必填)
TOP
詳全文