我好開心呀！所以要感謝主！
1) 上星期四中午，媽咪打電話叫我陪佢覆診，因為當日上午婦科檢查那裏話已收到佢之前份 X 光報告，醫生要見佢。於是，媽咪就好緊張，話今次大件事啦，通常係因為報告有問題先會叫病人返去見醫生，冇事的話就唔會，所以媽咪o係診所等見醫生的時候就行唔安，坐唔落咁，我只好安慰佢話冇事的，和叫佢祈禱。結果？感謝主，係冇事呀，X-ray照唔出任何癌細胞，只係有少少良性的改變，要多加留意。聽到個結果的時候，我同媽咪都鬆一口氣，見完醫生就立即打電話俾 daddy，向佢報平安嘛！當然，唔少得立即祈禱感謝主啦！！不過，我真係好感恩，因為o係整件事上 (前後加埋都係幾個鐘) 我內心好平靜，一 d 不安的感覺都冇，我相信係神俾我的平安，係佢賜我信心，叫我相信佢的作為，相信祂是與我同在的，定必帶領我的前路，感謝主！
2) 哈哈，之後就走o左去買數碼相機 (梗係啦，部傻瓜機壞壞地，下個月畢業禮時影唔到咪弊？)。其實都話o左要買好幾個月啦，終於都“的”起心肝去買啦。哈，好正呀！再用部相機幫我個小彤彤影相和拍 video，哈，佢真係超得意呀！你咁可愛，真係抵我咁鍾意你呀！
3) 細佬尋日生日(哈，大個仔啦佢)，所以我們尋晚出街食飯。去了荃灣的明星食，肥仔拎住張 menu揀餸時，就鬧出兩個笑話。一、細佬話想食肥牛，肥仔就話叫碟「白灼香胡肥牛」，我一頭霧水，唔知佢講乜，再睇o下張 menu先知佢想叫「白灼香菰肥牛」，真係笑死。二、話口未完，媽咪話叫碟菜，肥仔就話「西醬炒唐生菜」，唉……我又再一次俾佢考起，以為咩西醬咁新頴，梗係自己見識少，唔知係咪明星 d 咩招牌菜，再睇o下張 menu，搵極都搵唔到西字頭的菜名喎，再睇清楚 d 先知原來係「面醬炒唐生菜」，真係笑爆嘴呀！跟住細佬都唔執輸話要番碟「鼓汁浸京瓜」喎！(其實係「豉汁浸涼瓜」)哈哈，咁樣笑一笑真係胃口都大 d 呀！
4) 今日o係又一城食完 lunch 後，同個 friend 行o左去 Sanrio個 counter 度睇o野，哈，d o野都幾精美架，可惜我情有獨鍾，只愛米奇老鼠，yeah！但最搞笑的都係我個 friend 買了個 Dear Daniel 的奶樽話要用來飲「蒙牛奶」喎……哈，我真係唔識俾反應……哈哈，不過，之後去了 Disney Store 睇我的至愛，真係愛不釋手呀！好想全部拎晒返屋企呀！家下 d 小朋友真係幸福呀！真係好開心呀！！
之但係，近日媽咪同細佬都唔係咁舒服，求主醫治他們軟弱的身體，細佬又血壓高啦……
《誠心敬拜》
全心歡欣，屈膝敬拜，頌讚祢永活神，
誠心歡欣，屈膝敬拜，讚美祢萬世君，
無所不知真理運行，智慧遍佈穹蒼，
難料蹤跡，不可測透，卻捨身救贖我。
頌讚祂，永生神，傾出一生捨己為救恩，
頌讚祂，至高神，基督恩典一生永護蔭。
文章定位：
