wow….太耐冇寫 diary 啦，真係好想好想寫返低 d 晒每件發生喺我身上的事，但時間的關係，我只可以將呢 d 事留喺心裡，未能盡錄喺呢個新聞台度，有機會的，先同大家講丫！
喺呢幾個禮拜，喺我身上真的發生咗好多事 (我個人覺得)，其實都冇乜特別的，只是初出茅廬的我覺得難適應啫……哈，呢 d 事就梗係關秘書事啦！一路以來，我都忍氣吞聲，覺得多一事、不如小一事，又覺得一隻手係拍唔響的，所以天真地認為，只要我唔回應，少說話、多做事，咁人地就會講少 d 嘢，亦唔可以將件事繼續發大落去……點知，原來人地會越踩越過，仲會喺你背後做好多事、講好多嘢……直接影響我同老細的關係……
唉，冇計啦！鬼叫人家跟咗老細兩年幾咩？鬼叫老細鍾意聽佢支笛咩？人地鍾意拎對耳來做眼，咁我可以點丫？我一向都唔鍾意聽和講人是非，但偏偏就俾我遇著一個是非精，不單止會講是非，仲好識加鹽加醋、扮可憐，鍾意搞分化、小圈子……最頂唔順的係，又有人聽佢講，仲死蠢到走來俾說話我聽，教訓我喎……哈哈，真係不可理喻呀！呢 d 咪叫精人出口、笨人出手囉！死蠢！真係討厭！我最憎人地搞埋咁多小動作的，有咩你咪直接同我講囉，驚咩啫？驚咪索性唔好講囉！要搵人幫你出口咁低招！cheap 到死！
仲有呀！我同邊個做朋友係我的事，唔關你事！我 daddy和媽咪都冇權去管，你憑咩呀？我唔係你心目中所想的妹妹仔，咩都聽晒你話。我有腦架，都有眼架，有好多嘢我會看在眼內，我唔出聲，並唔代表我唔知道！你鍾意做大家姐係你的事，你要所有人都聽你講都係你的事，但你咪諗住你可以嚇到我，令我降服於你的霸道下！你真係諗都唔好諗呀！唔駛旨意！你有本事的咪同大老細講囉！我驚你呀？到時我咪照講返你 d 嘢囉，全公司的人都知你係一個點樣的人，亦都唔鍾意你，但你就成日話人地針對你，唉，可唔可以先檢討一下自己，先去批判人地呀？咩都係你啱晒的，要聽晒你講的？你慳 d 啦！你假時，我都假。你以為我會信你講嘢咩？我真係有腦架！你究竟係一個點樣的人，我心中有數，聽你講嗰個都真係要買過副眼鏡啦，都麻煩佢嘗試用對眼去睇嘢，唔好用對耳！
我們係 professional 來架嘛！要知道唔係自己親眼見和親耳聽的都唔能夠做證供架嘛，呢 d 只係 hearsay 來架咋！仲咁蠢的信到十足十，真係 stupid！可以俾少少智慧和理智出來去處理件事嗎？唉……
唉……我可以點？只有將一切交託給主，我知道自己能力好有限，我冇能力也唔得閒去 handle 呢 d 咁複雜的事，我要爭取時間做多 d “有謂”的事，唔係就白白浪費呢兩年的 training 時間。主呀，求祢垂憐，帶領女兒的前路，叫女兒行當行的路，用愛心說誠實話，賜女兒智慧去面對和處理呢 d 挑戰。我知祢掌管我的生命，求祢叫女兒靜靜的和耐心的去聆聽和遵行主的吩咐！主呀，求祢垂憐！阿們。
*********************************************************************
講返 d 開心的嘢丫。
19.12.2004晚係公司的 x-mas dinner，地點係 Aviation Club，雖然嘢食就真係麻麻啦，但喺當日的抽獎中，我抽到 $500 現金獎呀！真係好開心，當然如果抽到 $1,000 就梗開心啦！hehe…..當晚仲同同事和直升機影咗好多相o忝呀！真係好開心！感謝主！
星期一收到靚女秘書的靚靚毛毛頸巾做聖誔禮物，星期二跟拉架仔和維他食 lunch，收到拉架仔的 2005 年米奇日曆，好靚呀！多謝晒！當晚喺亞婆度食飯過節，食咗好多件燒肉，都幾好食，點知……
到了星期三 4am 左右，發覺胃口唔係咁好，一度以為自己肚餓，就叫自己繼續訓覺，但 5am 左右，有 d 唔對路，開始有 d 肚痛，就爬起身去洗手間……哈哈，又呵又嘔……結果，請咗一日病假，真係好辛苦，嗚嗚……又冇胃口食嘢喎，只係食咗幾啖粥落肚，成個人手軟腳軟，真係好辛苦！醫生診斷為腸胃炎，俾咗兩日病假我。
星期四個肚仲係超級的痛，但都要死頂返公司趕埋 d 嘢佢，因為有四十幾份 licence agreements 趕住要出。哈，冇咗我唔得？係因為星期三打電話返去同秘書講我病了，又同佢講低要幫我跟 d 咩手尾的時候，佢好客氣咁回應：「哦，好丫好丫，d 嘢要 23 號出，聽日都係 22 號啫，你返來都仲趕得切的……」哈，可惜，我返來的聽日已經係 23 號呢！唉，返到去，個肚痛到不得了，真係諗住返半日就走，點知都係要搞到六點幾先走得……唉，你一味難好心咁問我頂唔頂得順，另一邊箱又堆晒 d 嘢俾我做，我可以話頂唔順咩？個個都睇到我死吓死吓咁，只有你咁冇同情心！唉，不過，算啦，我對你冇任何要求，我知你唔會幫我，咁我咪自己一手一腳做返晒佢囉……
星期五就真係好返好多咯，雖然都冇乜胃口，但個肚唔痛咯。當日係公司的x-mas party，喺 lunch 進行，當然都有交換禮物和抽獎的環節啦！可惜，我一份大獎都抽唔到，真係可惜！我老細和秘書都喺呢日送咗 x-mas gifts 俾我，講真，我真係唔想買禮物俾個秘書，但佢送到俾我，我就唯有回禮啦，真係麻煩。當日都收到 teresa 送的手袋仔吊墜，好靚架，多謝晒！
聖誕當日就和屋企人去了廣州行逛，哈哈，屈咗肥仔買個米奇老鼠袋俾我，哈哈，多謝晒！
Boxing day 就返教會，感謝主，當日都有幾個人接受洗禮，求祢叫佢地和女兒都能謙卑的接受主，讓主掌管我們的一切，都學像基督，活出主的樣式，成為便人的見證。既然我們講咗咁多句：「我願意」，我們就要努力的遵守我們對神和自己的諾言。求主帶領。
多謝文廸和潔雯的畢業和聖誕禮物，多謝晒！
當晚 6pm 就同 LMC 的同學 bbq，雖然只係得十幾個人，但都真係好耐冇見，所以好開心，真係好開心，期待下一次的聚會。
27.12.04就同媽咪去咗睇“功夫”，雖我唔鍾意睇周星馳的戲，但媽咪想睇咪陪佢睇囉。不過，套戲都真係幾搞笑，特技都做得好好，都幾好睇的。之後，就出咗荃灣行街，置新裝啦，唉，又駛錢啦……我好窮呀！
28.12.04 約咗個 F.5 的同學食 lunch，原來佢都係喺金鐘返工架，好耐冇見，好開心！同樣期待下一次新年的飯局，記得預埋我呀！
嘩，一年將要過去，可能我下次寫 diary 時會係 2005 咯，時間過得真係快，真的要好好珍惜眼前的機會，過咗就追唔返架啦！抓緊機會！
*********************************************************************
最後，為著泰國地震一事向主禱告，聽到呢個消息，真的好心痛，死亡人數天天的增多，仍然有好多人失蹤，天災，真的好可怖呀！主呀，求祢看顧所有死傷者和佢地的家屬，憐憫我們，賜我們勇氣去面對未來，求主垂憐，阿們。
文章定位：
