好耐無打過日記,無計啦,成日都咁多野做,根本無時間。到有時間又無心情,難得今日天時地利人和都齊晒,就梗係要整返篇留為紀念啦。
呢排的學校生活逐漸明朗化,真可謂撥開雲霧見青天。因為我終於知道有什麼人是就算我花一生精力,都不可能與之成為朋友的人。知道呢件事就唔會成日盲鐘鐘咁浪費心力同埋自怨自艾啦。其實在恒商生活左一段日子,都明白一個道理:有好多事係上天整定的。自從我決定讀什麼科目的一刻開始,上天已經安排好同我一齊讀書的人。當中可能有我鍾意的,又有可能有我唔鍾意的;有人會喜歡我,亦一定會有人討厭我。為何我當初這麼緊張其他人點睇我同埋竭盡全力同所有人做朋友呢?其實是因為我唔想再重複在呂中的歷史。
回顧呂中的生活,無錯,我地成日都一大班兄弟出出入入,嘻嘻哈哈,令我感覺到好溫暖。但由整個群體黎睇,全部人就劃分為一小堆一小堆咁,而且唔同堆之間又時常鬧不和,其實我是很討厭這樣的,也因為不能結識更多的朋友覺得可惜,而且更擔心自己將來離開了以前的兄弟還懂不懂得交朋友。我以前整天都希望唔同人都能夠和和氣氣咁一齊相處,形成一個溫暖的大群體,但因為我的無能,令我錯失了好多好多交新朋友的機會(尤其異性。其實經過無數次的自省後,我發覺我自卑的性格有很大部分是因交不到異性朋友而引起的。哈哈,想起來,我的確在其他男仔女仔玩得好開心的場合寂靜起來,因為我唔夠自信,連講野都唔敢,怕俾人話悶,更怕被其他人冷落…自卑,可能係身體的求偶系統發出的警號吧)。這種希望是不可能在呂中實現的了。然而,這種希望一直沒有減退,直到我打算離開呂中,這種渴更趨強烈了。我渴望有一個新的環境,等我一一改過以前曾經犯過的一切錯誤,盡我所能,不讓這兩年有任何遺憾。但可惜,我把一切想得太簡單了。
原來世間的事,並不是光靠你一個人努力蠻幹就能成功的,有很多時還得睇天意。自從我中化演講之後,原本諗住脫穎而出的,誰知卻來了個弄巧反拙。我相信自己已經在呢班人心目中扣了勁多分。漸漸地,大家一班同學開始熟絡,但人地好少會同我講野,反而其他人之間就非常熱鬧,無疑我是比較不受大眾歡迎的。我曾經想過很多方法改善,扮正經,扮不正經,做回自己,熱心助人,玩得開放,什麼我都試過了,但結果完全一樣。到今時今日,我灰心了,我憤怒了,我放棄了。我發誓唔會再花時間去討好我自己班的同學(奇怪的是,我和唔同班的人玩得仲開心,甚至大家仲能夠傾心事),以後就安於一個人生活吧。學似張家輝在<<千王之王>>入面話齋「大你五千萬,跟手晒冷,就算死都係一舖ge je!」計返條數,減除大小假期,大約只有十一個月要對住呢班人,要頂,都無問題。不過此刻我又想起<<狐忍>>中我愛羅的說話:人類是不可能扺擋孤獨的。哈,天意,好笑……
文章定位：
