自從升中六之後,發覺煩惱多左好多。光計學業,功課多,課程深,多project,而且最令我擔心的是,中化閱讀我仲未有組….唔知點算,叫老師幫囉~但佢又可以點幫呢?的確是一個好問題。課外活動方面,我參加左一次樂施行動組的meeting,十分後悔當初點解要為義氣入組,因為我發覺要同一群我完全唔識的人合作做事,我會有好大壓力,一黎驚做錯野俾人罵,二黎我到而家都唔明要做乜,三黎又無野同人講,好辛苦。人際關係方面,總叫是漸入佳境吧,起碼我再感覺唔到有人敵視我,我已經好安慰。但令我困惑的是,開左學一個月,竟然話要調位,原本在我附近那些人有九成都走左,淨低一個平時比較少野講的女仔(唔知點解,我覺得佢本性唔係咁沉默的,因為有一次佢竟然向我解釋「點解屁股又叫做屎忽」…)唉,而家我唔單止要坐第一排,下下俾老師睥住,仲要俾名副其實的「女兒國」包圍,d女仔好似一個蓋咁覆蓋住我…我唔係唔鍾意同女仔坐,但你都唔好咁誇張丫…而家連粗口都唔敢講多句啦,正一粉腸來的…
昨日我又趁空堂走左出沙田,今次的行程同上次一樣。唔知係咪適應左,無左當初那種成功的興奮感,反而感到有一點寂寞。
另外我應該講一講田徑。自從轉左擲項之後,我終於都俾到一個短期目標自己。我想在學界賽之前盡力加強力量和改善投擲姿勢,希望最少都入到圍,唔好墊人底。再長遠少少,我想在學校陸運會拎返擲項的兩塊牌,當然,我對鐵餅的信心當真非常麻麻,希望學校入面唔好咁多臥虎藏龍啦……在如此短的訓練時間裏面,我諗唯一幫到我的辦法就是重執啞鈴。改善投擲姿勢當然重要,但一星期先練得一次,所以唯有將佢放在第二位。
雖然一路都有玩開肌肉訓練,但因為練得唔全面,搞到有好多弱的部位唔夠力,例如背部、大腿、膞頭、腰側等,要練起上黎當真攞命。我諗在跟住落黎的訓練計劃入面,我要一方面強化原本少訓練的肌群,另一方面增強在推鉛球特別需要的肌群(畢竟主力都是鉛球嘛)。由於這個大腿同時屬於兩個方面,所以我就不得不將佢放在訓練的首位,其次係膞頭同三頭肌,跟住係胸背,再落係腰腹。有接觸過健美運動的人,都會認同練大腿的時候簡直就係地獄:由於肌群體積大,所用的重量要比練其他部位時多很多,而且每一下動作都要力求慢速同標準,每完成一個動作,我對腳都會忍唔住不停咁震,企都企唔穏,行路就更加唔駛講…第二痛苦就係練膞頭,呢個部位的關節係出晒名容易受傷,所以每逢要練膞頭的日子,我一定做足熱身,用的重量唔太重,動作盡量放慢,整個姿勢都要一絲不苟,不過到而家我已經發覺個膞頭開始酸,再谷落可能會受傷,所以都係休息一下...
訓練之後當然要做緩和運動。由於重量訓練的最終目標就係令肌群在訓練後有「腫脹」的感覺,但腫脹感殘留會令運動能力降低,影響下一次的訓練,所以對我黎講,緩和運動絕對唔係例行公事,而係對抗肌肉酸痛和受傷的作戰。
唔知點解,一提到重量訓練我就會滔滔不絕,雖然自己唔係好勁,但始終都叫參與左一段時間,一講起就好似講緊自己老本行咁,好鬼死興奮。因為知道阿酬佢地都健身,所以就分享一下我的經驗。首先亦都係最最最最重要的,就係「保持動作標準和慢速」。動作唔合規格唔係犯法,而係會令好多唔關事的肌群都加入埋個動作入面,一方面令目標肌群得唔到足夠的刺激,二來容易令關節受傷。因此寧可選擇較輕的重量,亦都唔可以用唔正確的動作黎訓練。咁究竟要點樣保持姿勢正確呢?第一唔好彎腰,唔好含胸,用力做動作時要依偱同一個軌跡,唔好搖擉。第二個要點就係慢速,一般黎講,一個包含舉起同放鬆的動作應該最少用四秒完成。Yes,你無聽錯,係最少四秒,而且可能的話要在肌肉收縮到頂峰的時候維持動作一兩秒。唯有慢速先至可能將目標肌群練至完全疲勞,如果你感覺唔到肌肉酸軟腫脹,一係可能你的動作唔規範,肌肉得唔到足夠的刺激,二係可能你的負荷仲未夠。
究竟點樣的負荷先夠呢?一般黎講係你竭盡全力,以完全規範的姿勢,能夠做八次的重量。但如果你係要增加肌肉耐力,就將次數改為十五次,要增加肌肉斤兩同力量,六至八次叫差唔多,再重對身體瘦弱如我們的人係弊多於利(我地點解叫瘦弱?看看六十公斤級的健美人士吧)。接着的是運用意念力,在做每一個動作都將注意力放在正在收縮的肌肉中,咁樣會更加容易令肌肉充血,效果更好。要點大約都係呢幾樣。好好運用gym房的設施吧,尤其係那張最容易俾人忽視的長椅,事實上,我覺得gym房入面其中一樣最有用的野就係那張長椅,有左佢,可以做多好多動作。如果有自由重量的啞鈴同槓鈴,咁就fit哂啦。
講到呢度,忽然覺得自己猛咁講,但自己又未有什麼成績。所以都係收下聲,自己練習下。大家慢慢摸索啦。
文章定位：
