入到恒商,真係擔心多於一切,就連食lunch咁簡單的事都可以煩足成朝。點解咁煩呢?事關間食堂的野食實在太仆街,真係每食一啖都打冷震,搞到超多人叫外賣。但d外賣永遠要遲半個鐘先會到,咁就pk啦,得返半粒鐘食,而且有時仲唔多好味……長此下去,唔胃癌都會營養不良。再加上成日唔知要同什麼人食,有時和同班同學,有時同oli佢地,真係好乸麻煩(因為成日都要為此費煞思量),好想好似以前咁永遠同固定一班人食。
講完食就講下讀書。Econ , pa呢d拿手科目暫時仲未有咩問題,但不滿的是pa成日都好多功課,又要第二日即刻交,完全無人性。數學同埋電腦一開波已經覺得力有不逮。真係有d後悔點解唔讀bussiness,聽落好似簡單d,但我又志不在搞生意…..唉,算啦,既然揀左就唯有頂硬上啦。但我始終唔明好似數統咁撚難的科目點解竟然會係as level,真係勁唔公平。電腦仲要平時做project交去考試局。屌!仲以為唔駛再做project,點知……關於英文堂,真係無話可說,個個老師的英文都larc larc聲,就連同學都勁到仆街,十足十native speaker咁。突然感覺到自己原來好撚渺小。到而家最鍾意上的竟然係中化堂,一來個miss個樣都幾可愛,又親切,令我一上堂就覺得如沐春風。另外中化堂又可以多d野講下,吹下水,無咁悶。最重要的係返左咁多年學,中文呢科終於進化到去講一個民族的文化,真係勁有親切感,因為平時讀開的書唔多唔少都同文化有關連嘛,所以覺得自己在呢方面都有個根底,信心都強d。體育堂每個禮拜上得九個字,減埋換衫之類的時間得半粒鐘,真係想叫學校將呢堂改做空堂算數。
跟住講下活動。事實上我到而家都無什麼心儀的學會,但我而家已經俾oli「介紹」入左樂施行動組做會員。睇佢而家要搞超多野,好煩惱咁的樣真係有點於心難安。至於田徑,聽日就要去九龍灣運動場選拔,真係有d擔心,好驚會「燸」……
如果真係咁不幸落選,咁就可能淨係參加樂施行動組算數,反正仲有長征,唔擔心無活動,仲可以多d時間讀書,最重要係要多d時間做功課同練跑,我係唔會因為人地唔揀我就放棄跑步既。我希望可以在我生日的時候可以死命跑到8k(mission impossible? Or impossible is nothing?)。其實我咁做係有深層意義的。第一,我以前提過我玩的第一集戀愛game<<心跳回憶—起程之詩>>入面的男主角都係想以跑馬拉松來結束自己的高中生活,等自己唔會白白虛渡整個中學生涯。我當時被他呢種想法深深打動,以致我好耐以前已經想效法他的做法(我中二第一次跑完回程時,腦海裏想着的就是他的故事。可惜到中四中五因為懶而無跑)。可能你唔明點解打機一件咁小的事都可以對我有咁大影響,其實我都唔多明。可能我那段時期係渴求浪漫的年紀,加上沒有什麼俗務纏身,對身邊的事件自然能更多地留意,印象也非常深刻。也可能是因為覺得男主角和自己很相似,特別有共鳴吧:大家都沒有什麼特長,成績中規中矩,人緣一般,樣貌一般,生活平凡,愛發不切實際的白日夢,又樂於做海鷗(無固定活動),要形容我們三個字就夠了:很普通,也就是那種不太起眼,一不留神簡直會忽略他們的那類人(這是我對自己的評語,可能人們並不這樣想。可是我想,影響一個人最大的還是他自己如何想自己吧)。我知道對我來說跑馬拉松是無乜可能,但最少都要有個高d的目標,就8k啦。我諗到中七完結我應該可以跑10k以上,總算俾到自己一個交代。再深層點來說,當我跑到十公里的時候,不單止超越了我中三時未完成的長跑路程,其實也就象徵我的中學生涯和兒童時代正式完結了。如此重大而悲痛的事件,難道不應用壯烈的方式來記念嗎?我想當目標達成的那一刻,我應該會坐在地上默默流淚,哀悼我的童真的消逝。(我諗我會經常翻看這段文字,因為在打緊的時候已經有無限感慨,鼻子酸酸的,眼都紅了。)跑長跑的這個夢想似乎再次返回起點,返回中二第一次跑時的那種情景。但現在跑的路程已經不同了,但以往跑那條舊路時的一切情形和光景依然歷歷在目,偶爾想起也覺得非常親切。
再講講人際關係方面的事。呢排開始同坐附近的男仔多野講左,同女仔都有一兩句。特別一提就係班上有個叫阿芝的女仔,個樣有d似鄭楠香。可能係我本身唔太記得鄭楠香本來係乜樣,以致一見到呢個阿芝就會好自然以為佢係鄭楠香,搞到我成日一得閒就忍唔住望一望佢,真係怕會嚇親人,如果人地誤以為d乜野就仲仆街。話說回來,前兩日返學落車個陣有個女仔好親切地喂左我一聲,我一望發覺佢就係阿芝,真係說不出的驚喜,唔知咁樣係咪代表我又多個朋友呢?就算唔係,都代表佢唔討厭我呢個變態啦(順帶一提,我在介紹自己的時候用左好大篇幅講我的變態,而家全班都知我變態,有好些人對我為之側目,我實在很高興)。另外有個女仔都好靚,皮膚勁好,瓜子口面,個樣好成熟,着衫又好好睇。當然我唔會當佢好似梁嘉慧咁頂禮膜拜啦,因為根本無同道中人…….班上有幾個男仔依然未能熟絡,一個幾靚仔,運動又好勁,但離我十萬八千里。另一個個樣好似女仔,或者好似細路,雖然平時都有d野講,但我總覺得佢唔太鍾意我,我亦有點唔鍾意佢,因為佢雖然讀書唔差,但講埋d野好低能,亦覺得佢有點看不起我。雖然如此,但也不能好似在呂中咁,唔妥邊個就擺出一副眼耳口鼻都是狗屎的臭臉,始終呢度唔係自己地頭,唔可以太放肆。而且我直覺在呢間學校,是非新聞會傳得好勁,萬一有乜行差踏錯,俾人加鹽加醋就無謂啦。所以我將全力奉行「少講少錯,唔講唔錯」的政策。另外我發覺我同april同朱家寶雖然來自同一間學校,但非常之唔熟絡,有時同佢地一齊食飯,佢地講野我又插唔到嘴,又無乜特別野能夠攞出黎俾大家打牙交,悶到仆街,只好一味扒飯,咁搞法我真係寧願一個人食好過。
講起佢地,忽然間覺得自己好似同oli的距離突然近左好多,令我有點不知所措,實在非常唔習慣。再加上呢個陶振宇經常打電話黎追問我oli的情況,令我壓力更大,彷彿自己好似做左人地的線人一樣。有時想真係想同oli保持返一定的距離,但又會經常撞到,又唔能夠扮隱形。要再熟絡一d咩,總係覺得唔知點咁,心理有個關口依然未能衝破。可能我咁講你地會覺得我討厭佢。但絕對沒有這回事,相反我對她甚至心存感激,但只要一同佢一齊就會覺得好唔自然,彷彿張顯榮同陶振宇的幽靈在我的背後徘徊一樣。唉,可能真係經驗少,環境一變就有點不知所措了。
要說的都已說得差不多了。很暢快,但也有點寂寞。在此引宋朝無門慧開的一首詩偈:「春有百花秋有月,夏有涼風冬有雪,若無閑事掛心頭,便是人間好時節」。
文章定位：
