呢排發覺一個規律,就係每逢星期四五的朝早我都會痛苦不堪,因為兩日都要上中英文的oral。話係oral,但我發覺我比平時上堂講得仲少野。先講中文,它一來悶到仆街,二來又要我一條友坐(因為人數是單數,始終有個人單丁),三來要分組的時候就會好撚麻煩。雖然話老師要每組都有一個男仔,而又因為只有四個男仔同埋四組人,我照計應該唔駛愁同乜人一組先係。但係一到行動的時候,我往往都係最後一個俾人揀的男仔,唔知呢d係咪就叫做賣剩蔗同籮底橙。講起上黎輕鬆,但身處其境才知唔好受。好唔容易捱完中文,又輪到英文oral,情況同上述差唔多,都係悶到仆街,仲覺得自己開始自閉,火氣勁爆,好想搵人打交發洩下,但可惜呢度係連講粗口都無對手的地方……就咁樣一路忍,忍到放學,算係捱完呢個星期四,但仲有個星期五要捱。
一到星期五第一堂,又係我自閉的時候。呢堂的名叫’SPECIAL ORAL ENGLISH’,有別於一般英文堂,因為呢堂係用黎輕鬆講英文的。但對我黎講呢堂一D都唔輕鬆,事關坐我隔離那個男仔正係我好鬼怕的一個(亦即以前提及似細路的一個),我成日都覺得佢係討厭我,逢親要同我講野都好似要去打靶咁。後面那兩個男仔又同我唔熟,又唔想飛象過河同隔離D女仔講野,結果又係自閉。基本上上完第一堂,己經摧毀左我整個上午的心情。小息過後係連續兩堂空堂,根據以往的習慣,我會一個人在圖書館HEA到食飯(因為朋友們要上堂)。但今日由於心情太過惡劣,實在頂唔順再留在學校,所以就趁第四堂一開始個陣,衝出正門去搭車去新城市打機。本來一開始仲有D驚驚地,因為俾人捉到就仆得街。但一到校門前才知係自己過慮了,因為四顧無人,看更亭連鬼影都無一隻。太正啦,我當時是用跑的衝去巴士站搭車既,我仲記得我個陣有幾興奮。
一上到車,立刻計下自己仲有多少時間,咦,有成兩粒幾鐘喎,夠晒啦。一到新城市,二話不說衝去新機地打機,務求將兩日積落黎的怨氣爆發出來。打打下,心情慢慢轉好,望望手錶,十二點,試下打俾阿ke,但他地成班友都無開電話,是但啦。時間差唔多,係時候食飯,因為平時食的野實在太仆街,所以今日決定要食好d,所以就毫不猶疑地走入百人一朱度食。D野一入口,嘩,太正啦,呢d先係人食的野嘛……食食下,突然發覺原來無自己識得的人陪自己食飯都唔一定係壞事。反而咁樣更有助我冷靜情緒,唔會成日想發脾氣,人都輕鬆好多。食完野本來想行多陣,但諗起如果再遲到就要記缺點,不敢怠慢,立刻搭巴士返去。好彩當時無hea耐d,因為原來架車到站的時候,剩下的時間已經唔多。就咁樣,我的心情又轉好啦。跟住上d堂都幾開心,得閒搞下gag,整鬼下後面條友(條友成日話我變態,但我睇佢也不是個正人君子,因為我一講仆街野,佢一定笑)。上完堂,去左棋藝學會度開會,誰知一入房得五個人。而個miss講第一句的說話,竟然係話呢個學會因為太少人搞唔成……搞到我同個同班女仔勁無奈。跟住都無乜特別野,就此歸家。
我而家有樣野越諗越驚,似乎我融入自己呢班確實比任何人都慢。例如英文要做project,d男仔竟然唔俾我同佢地一組,坐我前面那兩個女仔才勉為其難俾我入group。到中文project仲仆街,我同隔離那個竟然到而家都未有組,而且仲要係擺明俾人踢出黎,點算呀仆街…….唉,屌,麻撚煩……點解會咁的呢?可能係我不善交際吧,也可能我太樣衰,更有可能係因為我的演講帶俾人壞印象,仲有可能我在不知不覺間「踩親全班人條尾」。我自問已經盡左全力,見到人事必客客氣氣,面帶笑容,但唔知點解依然咁失敗。總之就真係au晒頭,現在情況比以前中四五仲惡劣,而且仲有可能演化成為絕境……屌,我真係開始後悔做乜撚野要去恒商,真係憨撚尻,自己攞苦黎辛……我有時鑽牛角尖,會以為班人係睇我唔起所以先對我咁樣,每當我一諗起,我就會滿腔鬥志,我要做一番大事俾你地呢班蛋散睇!!!!短期目標除跑步外,就係鍛練力量,我要變成一個大隻佬,甚至係大力士。我要你地呢班咸包散對我刮目相看!情況都幾似我中二的時候,我諗我當時的心情大約就係咁的。希望能盡快見到成績啦。唉,不過一個星期真係好快,好快我又要面對下一個星期四和星期五了…….希望我唔會咁快跳樓…….
文章定位：
